༡༩༥༠ ལོར་མཉམ་འབྲེལ་རྒྱལ་ཁབ་ཏུ་བོད་དོན་གླེང་མཁན་གྱི་སྐུ་ཞབས་ཨེལ་ཧྥི་རེ་ཌོ་སྐུ་གྲོངས་པར་སྲིད་སྐྱོང་སྤེན་པ་ཚེ་རིང་གིས་མྱ་ངན་གསུང་འཕྲིན།

ཨ་རི་དབུ་མའི་(Central America)རྒྱལ་ཁབ་ཆུང་ཆུང་ཨེལ་སལ་ཝེ་ཌོར་(El Salvador)ནས་ཡིན་པའི་བོད་དོན་རྒྱབ་སྐྱོར་བ་དང་། བོད་ཀྱི་གྲོགས་པོ་རྙིང་ཤོས་སུ་གཏོགས་པའི་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་(Dr Alfredo Martinez Moreno)དགུང་གྲངས་ ༩༨ ཐོག་སྐུ་གྲོངས་པར། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་མྱ་ངན་དང་། ཁོང་གི་ཤུལ་ལུས་ནང་མི་ལ་ཐུགས་གསོ་ཞུས་འདུག
ཕྱི་ལོ་ ༢༠༢༡ ཟླ་ ༡༠ ཚེས་ ༢ ཉིན་སྐུ་གྲོངས་པའི་སྐུ་ཞབས་ཨེལ་ཧྥི་རེ་ཌོ་ནི་བོད་ཀྱི་རེ་སྐུལ་ལྟར་ཕྱི་ལོ་ ༡༩༥༠ ལོར་མཉམ་འབྲེལ་རྒྱལ་ཁབ་ཏུ་“ཕྱིའི་སྟོབས་ཤུགས་ཀྱིས་བོད་ལ་བཙན་འཛུལ་”ཞེས་པའི་གྲོས་འཆར་འདོན་མཁན་དང་། བོད་ཀྱི་གནད་དོན་གླེང་སློང་གནང་མཁན་ཐོག་མའི་གྲས་སུ་གཏོགས་ཀྱི་ཡོད་འདུག
སྲིད་སྐྱོང་སྤེན་པ་ཚེ་རིང་གིས་དེ་རིང་རེས་གཟའ་ཟླ་བའི་ཉིན་དམ་པ་ཁོང་གི་སྐུ་ཟླར་བསྐུར་བའི་ཐུགས་གསོའི་གསུང་འཕྲིན་ནང་། ཁོང་གིས་“སྐུ་ཉིད་ཀྱི་སྐུ་ཟླ་དང་། བོད་ཀྱི་གྲོགས་པོ་རྙིང་ཤོས་སུ་གཏོགས་པའི་སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་ཤེས་རྟོགས་བྱུང་བས་ཧ་ཅང་བློ་ཕམ་བྱུང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཀྱིས་དབུས་པའི་ནང་མི་ཡོངས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན་”ཞེས་བརྗོད་འདུག
སྲིད་སྐྱོང་གིས་“ཨེལ་སལ་ཝེ་ཌོར་རྒྱལ་ཁབ་ཀྱི་སྐུ་ཚབ་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་དང་ཨེལ་སལ་ཝེ་ཌོར་རྒྱལ་ཁབ་ཀྱི་སྐུ་ཚབ་ཚོགས་ཆུང་ངོས་ནས་ཕྱི་ལོ་ ༡༩༥༠ ཟླ་ ༡༡ ཚེས་ ༧ ཉིན་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་བོད་དུ་ཕྱི་རྒྱལ་གྱི་སྟོབས་ཤུགས་བཙན་འཛུལ་བྱུང་བར་སྐྱོན་བརྗོད་ཀྱིས་བོད་ལ་རྒྱབ་སྐྱོར་གནང་བ་དེ་བོད་མི་ཚོས་དྲན་གསོ་དང་བཀའ་དྲིན་བླ་ལྷག་ཏུ་ཆེ་ཞུ་གི་ཡོད་”ཅེས་གསུངས་པའི་ཐོག “ཨེལ་སལ་ཝེ་ཌོར་རྒྱལ་ཁབ་ནི། མཉམ་འབྲེལ་རྒྱལ་ཚོགས་སུ་བོད་ཀྱི་གནད་དོན་སྐོར་གླེང་སློང་གནང་མཁན་ཆེས་ཐོག་མ་དེ་ཡིན་ཞིང་། ང་ཚོས་དུས་རྟག་ཏུ་སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་ནི་བོད་མིའི་འཐབ་རྩོད་ཀྱི་སྣེ་ཁྲིད་མཁན་ཡིན་པ་ལྟར་རྗེས་དྲན་ཞུ་རྒྱུ་ཡིན། སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་གིས་སྐུ་ཚེ་ཧྲིལ་པོར་བོད་དོན་སླད་ལྷག་བསམ་རྣམ་དག་གིས་རྒྱབ་སྐྱོར་གནང་ཡོད་པ་མ་ཟད། ཁོང་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཧ་ཅང་ཉེ་པོ་གནང་སའི་གྲོགས་པོ་ཞིག་ཀྱང་ཡིན་”ཞེས་བསྣན་འདུག
དེ་མིན་ད་དུང་། སྲིད་སྐྱོང་སྤེན་པ་ཚེ་རིང་གིས་ཁོང་སྒེར་ལ་མཚོན་ནའང་ཕྱི་ལོ་ ༢༠༠༦ ལོར་སི་ཀོ་ལན་ཌི་ (Scotland)ནང་དུ་དམ་པ་དེ་ཉིད་དང་དངོས་སུ་མཇལ་འཕྲད་ཞུ་རྒྱུའི་སྐལ་བཟང་བྱུང་བ་དང་། རྒྱལ་ཁབ་ཀྱི་གཞུང་འབྲེལ་སྐུ་ཚབ་དང་ཁྲིམས་རྩོད་པ་ཡིན་པའི་ཆ་ནས་དམ་པ་དེ་ཉིད་ཀྱིས་སྐུ་ཚེ་ཧྲིལ་པོ་ཞི་བདེ་དང་འགྲོ་བ་མིའི་ཆེ་མཐོང་ཞུ་གཏུག་གི་དོན་དུ་བསྐྱལ་བའི་མཛད་རྗེས་ཀྱིས་ང་ཚོར་སེམས་ཤུགས་བསྐྱེད་དུ་འཇུག་ངེས་ཚུལ་སོགས་བརྗོད་འདུག །
གསར་འགོད་པ་དཀོན་མཆོག་རབ་བརྟན།