“༢༠༡༩ ལོའི་མི་སེར་ཐོབ་ཐང་བསྐྱར་བཅོས”ཞེས་པའི་ཁྲིམས་འཆར་དེ་རྒྱ་གར་གྱི་རྩ་ཁྲིམས་དང་འགལ་བའི་ཁྲིམས་གཏུག

ཟླ་འདིའི་ཚེས་༡༢ བརྒྱུད་ལམ་དུ་གནས་ཚུལ་སྤེལ་བ་ལྟར་ན། རྒྱ་གར་གྱི་རྩོད་གཞི་ཆེ་བའི་ཁྲིམས་འཆར་གསར་པ་སྟེ། “༢༠༡༩ ལོའི་མི་སེར་ཐོབ་ཐང་བསྐྱར་བཅོས་”ཞེས་པར་གྲོས་ཚོགས་གོང་འོག་གཉིས་ཀའི་མོས་མཐུན་ཐོབ་སྟེ་སྲིད་འཛིན་གྱི་མཚན་རྟགས་འཐོབ་རྒྱུར་སྒུག་བཞིན་ཡོད་པས། རྒྱ་གར་རྒྱལ་ཡོངས་ཁ་ཆེའི་སྐྱིད་སྡུག་ཚོགས་པ་(The indian Union Muslim League) ནས་ཁྲིམས་འཆར་དེ་རྒྱ་གར་གྱི་རྩ་ཁྲིམས་དང་འགལ་སྐོར་བཤད་དེ་ཆེས་མཐོའི་ཁྲིམས་ཁང་དུ་ཞུ་གཏུག་བྱས་ཡོད་འདུག 

དེ་ཡང་པ་ཀི་སི་ཐན་དང་། བྷང་ལ་དྷེ་ཤི། ཨབ་གྷ་ནི་ཐན་བཅས་ནས་རྒྱ་གར་དུ་འབྱོར་བའི་ཁ་ཆེ་མ་ཡིན་པའི་མི་མང་རྣམས་ལ་མི་སེར་ཐོབ་ཐང་སྦྱིན་པའི་ཁྲིམས་འཆར་དེར་བདུན་འདིའི་རེས་གཟའ་མིག་དམར་ཉིན་གྲོས་ཚོགས་འོག་མའི་མོས་མཐུན་ཐོབ་རྗེས། ཁ་སང་རེས་གཟའ་ལྷག་པའི་ཉིན་གྲོས་ཚོགས་གོང་མའི་ནང་འོས་བསྡུ་བྱས་ཏེ་མོས་མཐུན་གྱི་འོས་གྲངས་༡༢༥ དང་། མོས་མཐུན་མེད་པའི་འོས་གྲངས་༡༠༥ བྱུང་ནས་རྒྱལ་ཁ་ཐོབ་པར་བརྟེན། ད་ནི་སྲིད་འཛིན་གྱིས་མཚན་རྟགས་བཀོད་ན་དངོས་སུ་རྒྱ་གར་རྒྱལ་ཁབ་ཀྱི་ཁྲིམས་སུ་འགྱུར་རྒྱུ་ཡིན་འདུག 

ཁྲིམས་འཆར་དེར་དགག་པ་རྒྱག་མཁན་ཚོས་དེ་ནི་ཆེད་དུ་ཁ་ཆེ་ལ་དབྱེ་འབྱེད་བྱས་པ་ཞིག་ཡིན་ཚུལ་བཤད་ཀྱི་ཡོད་འདུག་ཀྱང་། ཧིན་དྷུ་མཆོག་ཏུ་འཛིན་པའི་བྷི་ཇི་ཕི་(BJP) སྲིད་གཞུང་ནས་དེ་འདྲ་མིན་ཚུལ་སྒྲུབ་ཀྱི་ཡོད་པའི་ཐོག ཁྲིམས་འཆར་གསར་པ་དེ་ནི་ཆོས་ལུགས་དབྱེ་འབྱེད་ཀྱི་སྡུག་སྦྱོང་མནར་གཅོད་ལས་བྲོས་བྱོལ་དུ་ཡོང་བའི་མི་མང་རྣམས་ཀྱི་བདེ་སྡུག་ལ་དམིགས་པ་ཞིག་ཡིན་སྐོར་བརྗོད་ཡོད་འདུག 

རྒྱ་གར་རྒྱལ་ཡོངས་ཁ་ཆེའི་སྐྱིད་སྡུག་ཚོགས་པ་ནས་ཆེས་མཐོའི་ཁྲིམས་ཁང་ལ་ཕུལ་བའི་སྙན་ཞུའི་ནང་། ཁྲིམས་འཆར་གསར་པ་དེས་རྒྱ་གར་གྱི་རྩ་ཁྲིམས་སུ་འཁོད་པའི་འདྲ་མཉམ་དང་། གཞི་རྩའི་ཐོབ་ཐང་། འཚོ་གནས་ཀྱི་ཐོབ་ཐང་བཅས་ལ་རྡོག་རོལ་བཏང་ཡོད་སྐོར་ཞུས་ཡོད་འདུག 

གཞན་ཡང་། ཁྲིམས་འཆར་གསར་པ་དེར་རྒྱ་གར་བྱང་ཤར་གྱི་མངའ་སྡེ་ཨཱ་སམ་(Assam)དུ་མི་མང་གིས་ངོ་རྒོལ་ཤུགས་ཆེན་བྱས་ཏེ་མེ་འཁོར་དང་གནམ་གྲུ་རྣམས་ཀྱང་རེ་ཞིག་མཚམས་འཇོག་བྱེད་དགོས་ཁེལ་ཡོད་སྟབས། སྲིད་གཞུང་གིས་དམག་མི་འབོར་ཆེན་བཏང་ནས་མི་མང་གི་ངོ་རྒོལ་ལ་སྟངས་འཛིན་བྱས་པ་མ་ཟད། མངའ་སྡེ་དེ་གའི་ཁ་པར་གྱི་བརྡ་རྟགས་དང་དྲ་སྒོ་བརྒྱབས་ནས་བཞག་ཡོད་འདུག

རྒྱ་གར་བྱང་ཤར་ཁུལ་གྱི་མི་མང་ཚོས་ཁྲིམས་འཆར་དེར་དེ་འདྲའི་གཞི་རྒྱ་ཆེ་བའི་ངོ་རྒོལ་བྱེད་དགོས་པའི་རྒྱུ་མཚན་ནི། ཁོ་ཚོས་གལ་སྲིད་ཁྲིམས་འཆར་དེ་དངོས་སུ་ཁྲིམས་ལ་གཏན་འབེབས་བྱས་པ་ཡིན་ན། ཕྱི་ལོགས་ནས་ས་ཁུལ་དེར་ཡོང་བའི་མི་མང་ཤིན་ཏུ་མང་པོ་ཞིག་རྒྱ་གར་གྱི་ཁྲིམས་མཐུན་མི་སེར་དུ་གྱུར་ནས་ཁོ་ཚོའི་འཚོ་གནས་དང་། ངོ་བོ་ལ་གནོད་སྐྱོན་ཡོང་བའི་འཇིགས་སྣང་དང་སེམས་ཁྲལ་བྱེད་ཀྱི་ཡོད་པས་ཡིན་འདུག 

རྒྱ་གར་གྱི་སྲིད་བློན་མོ་དྷིས་ཋའུ་ཋར་དྲ་བ་བརྒྱུད་དེ་“ཨ་སམ་གྱི་སྤུན་ཟླ་ཕོ་མོ་རྣམས་ལ་སེམས་ཁྲལ་བྱེད་དགོས་པ་གང་ཡང་མེད་”དང། “དབུས་གཞུང་དང་ངས་རྩ་ཁྲིམས་གཞིར་བཟུང་ཐོག་ནས་ཨཱ་སམ་མི་མང་གི་ས་ཆའི་ཐོབ་ཐང་དང་། རིག་གཞུང་གི་ཐོབ་ཐང་། སྐད་ཡིག་གི་ཐོབ་ཐང་། ཆབ་སྲིད་ཀྱི་ཐོབ་ཐང་བཅས་ལ་མཐའ་གཅིག་ཏུ་སྲུང་སྐྱོབ་བྱེད་རྒྱུ་ཡིན་”ཞེས་བརྗོད་ཡོད་འདུག་ཀྱང་། ད་ལྟ་ས་ཁུལ་དེ་གར་དྲ་བ་དང་ཁ་པར་གྱི་བརྡ་རྟགས་མེད་སྟབས། མི་མང་ཚོས་སྲིད་བློན་གྱི་སྐད་ཆ་ལྟ་ཀློག་བྱེད་རྒྱུ་ཁག་པོ་ཆགས་ཡོད་འདུག 

ཆོས་ལུགས་གཞི་རྩར་བཞག་ནས་མི་སེར་ཐོབ་ཐང་སྦྱིན་པའི་ཁྲིམས་འཆར་དེར་ཕྱིའི་རྒྱལ་ཁབ་དག་གིས་ཀྱང་ངོ་རྒོལ་དང་སྐྱོན་བརྗོད་བྱེད་ཀྱི་ཡོད་འདུག་སྟེ། ཨ་རིའི་ཆོས་དད་རང་དབང་ལྷན་ཚོགས་ནས་གལ་སྲིད་རྒྱ་གར་གི་གྲོས་ཚོགས་ཀྱིས་ཁྲིམས་འཆར་དེ་དངོས་སུ་ཁྲིམས་ལ་གཏན་འབེབས་བྱས་པ་ཡིན་ན། ཨ་རིའི་གཞུང་གིས་འབྲེལ་ཡོད་མི་སྣ་རྣམས་ལ་ཉེས་ཆད་གཅོད་དགོས་སྐོར་བརྗོད་ཡོད་འདུག ། 

གསར་འགོད་པ་དཀོན་མཆོག་རབ་བརྟན།