༢༠༢༢ གྱི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་པེ་ཅིང་དུ་འཚོགས་མི་ཆོག 

ཉེ་ཆར་རྒྱ་ནག་གིས་ཨ་རིའི་རྒྱལ་ཡོངས་ལག་རྩེད་སྤོ་ལོའི་རུ་ཚོགས་(NBA)ལའང་གནོན་ཤུགས་སྤྲད་ནས་རུ་ཚོགས་དེ་དང་། དེའི་རྩེད་འགྲན་བ་ཆེ་གྲས་རྣམས་ཀྱིས་རྒྱ་ནག་ལ་མགོ་བོ་བསྒུར་བའི་གནས་ཚུལ་བྱུང་བར་བརྟེན། རྒྱ་ནག་གི་ཧམ་བཤད་དང་འདོད་རྔམ་དེ་ཨ་རིའི་མི་མང་གི་མིག་ལམ་དུ་མངོན་གསལ་དོད་དུ་ཕྱིན་ཡོད་ལ། དེ་དང་ཆབས་ཅིག་ཨ་རིའི་སྤྱི་ཚོགས་ཁྲོད་དུ་རྒྱ་ནག་གི་ཕྱོགས་སུ་སྔར་མེད་པའི་འཇིགས་སྣང་དང་སྡང་སེམས་ཤིག་ཀྱང་སྐྱེ་འགོ་རྩོམ་བཞིན་པའི་སྐབས་འདིར། ཨ་རིའི་གྲོས་ཚོགས་གོང་མའི་འཐུས་མི་རིག-སི་ཁོ་ཋ་(Rick Scott)ཡིས་ ༢༠༢༢ གྱི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་པེ་ཅིང་དུ་འཚོགས་མི་ཆོག་སྐོར་བརྗོད་ཡོད་འདུག 

ཕྱི་ཟླ་༡༠ ཚེས་༢༢ ཉིན་ཨ་རིའི་གྲོས་ཚོགས་གོང་མའི་འཐུས་མི་རིག-སི་ཁོ་ཋ་(Rick Scott)ཡིས་ཨ་རིའི་གསར་འགྱུར་བརྒྱུད་ལམ་གྲགས་ཅན་CNBC ཐོག་རྒྱ་ནག་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་ཡོད་སྟབས། ༢༠༢༢ གྱི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་པེ་ཅིང་དུ་འཚོགས་མི་ཆོག་པ་བཟོ་དགོས་ཞེས་བརྗོད་ཡོད་འདུག 

ཁོང་གིས་“༢༠༢༢ གྱི་ཨོ་ལིམ་ཕིག་རྩེད་འགྲན་ཆེན་མོ་དེར་(པེ་ཅིང)འཚོགས་མི་ཉན། ཁོང་ཚོས་(རྒྱ་ནག)ཨ་རི་དང་འཛམ་གླིང་ཡོངས་ཀྱི་རྩེད་འགྲན་བ་ཚོར་ཞིས་ལ་མི་དགའ་བའི་ཚིག་གཅིག་ཀྱང་ལབ་མི་ཆོག་ཟེར་རྒྱུ་རེད་”ཅེས་སྨྲས་པའི་ཐོག རྒྱ་ནག་འགྲོ་བ་མིའི་ཐོབ་ཐང་ལ་གུས་བཀུར་བྱེད་མཁན་གྱི་རྒྱལ་ཁབ་ཚད་ལྡན་ཞིག་ཏུ་མ་གྱུར་བར། ཨ་རིས་ཚོང་གི་འབྲེལ་བ་གཅོད་དགོས་ཚུལ་ཡང་བརྗོད་ཡོད་འདུག 

ཁོང་གིས་གསར་འགྱུར་བརྒྱུད་ལམ་དེའི་ཐོག་ནས་སྐད་ཆ་དེ་འདྲ་ཞིག་མ་བཤད་གོང་དུ་ཡང་། དངོས་སུ་རྒྱལ་སྤྱིའི་ཨོ་ལིམ་ཕིག་རྩེད་འགྲན་ཚོགས་ཆུང་(International Olympic Committee)གི་འགན་འཛིན་ལ་ཡི་གེ་ཞིག་བསྐུར་ནས་༢༠༢༢ ལོར་རྒྱ་ནག་གི་རྒྱལ་ས་པེ་ཅིང་དུ་འཚོགས་གཏན་ཁེལ་བའི་རྩེད་འགྲན་ཆེན་མོ་དེ་ས་གནས་གཞན་དུ་སྤོ་དགོས་པའི་འབོད་སྐུལ་ཞུས་འདུག 

དེ་ཡང་ཁོང་གིས་ཟླ་འདིའི་ཚེས་༡༧ ཉིན་བསྐུར་བའི་ཡི་གེ་དེའི་ནང་། ཉེ་ཆར་རྒྱ་ནག་དང་ཨ་རིའི་ལག་རྩེད་སྤོ་ལོའི་རུ་ཚོགས་བར་བྱུང་བའི་རྩོད་རྙོག་དེ་ནི་དཀའ་རྙོག་ཆེན་པོ་ཞིག་གི་ཕྱིའི་ངོ་གདོང་ཙམ་ཡིན་པའི་འགྲེལ་བརྗོད་གནང་བའི་ཁར། གལ་སྲིད་རྒྱ་ནག་ཏུ་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་འཚོགས་སུ་བཅུག་པ་ཡིན་ན། རྒྱ་ནག་གཞུང་གིས་མགྲོན་ཁང་གི་སྐུད་མེད་དྲ་བ་(Wifi)ཁོ་ན་བརྒྱུད་དེ་རྒྱལ་སྤྱིའི་མི་སྣ་གྲགས་ཅན་རྣམས་དང་། སྲིད་གཞུང་དག་ལ་ཉུལ་ཞིབ་བྱེད་ཐུབ་པས། ཅི་ལ་ཐུག་ཀྱང་དེ་གཡོལ་ཐབས་བྱ་དགོས་པའི་སྐུལ་མ་བཏང་ཡོད་འདུག

གཞན་ཡང་ཁོང་གི་ཡི་གེ་དེའི་ནང་། “ཨོ་ལིམ་ཕིག་རྩེད་འགྲན་ཆེན་མོ་ནི། འཛམ་གླིང་གི་རྩེད་འགྲན་བ་ཡག་ཤོས་ཚོས་སོ་སོའི་རྒྱལ་ཁབ་ཀྱི་ཚབ་མཚོན་མི་སྣ་བྱེད་པའི་གོ་སྐབས་བླ་ན་མ་མཆིས་པ་ཞིག་ཡིན་པས། འགྲོ་བ་མིའི་ཐོབ་ཐང་ལ་གུས་བརྩི་མི་བྱེད་མཁན་གྱི་སྲིད་འཛིན་ཞིས་ཅིན་ཕིང་དང་། རྒྱ་ནག་དམར་ཤོག་རྒྱལ་ཁབ་ལ་དེ་སྐོང་འཚོགས་བྱེད་དུ་འཇུག་མི་ཉན། ངས་ཚོགས་པ་འདི་ལ་རེ་སྐུལ་ཞུ་རྒྱུ་ཞིག་ལ། ཁྱེད་ཚོས་རང་དབང་ལ་རྒྱབ་སྐྱོར་བྱས་ཏེ་རྒྱ་ནག་དམར་ཤོག་རྒྱལ་ཁབ་ལ་ལམ་ནོར་ལྡོག་ཤེས་བྱེད་པའི་དགོས་འདུན་འདོན་དགོས་ལ། ཡང་ན་༢༠༢༢ ལོའི་རྩེད་འགྲན་ཆེན་མོ་དེའི་འཚོགས་ཡུལ་གསར་པ་ཞིག་འཚོལ་དགོས་”ཞེས་འཁོད་ཡོད་འདུག ། 

གསར་འགོད་པ་དཀོན་མཆོག་རབ་བརྟན།