༢༠༢༢ ལོའི་གནས་ཚུལ་ཆེ་ཁག་བདུན།

འདས་པའི་ཟླ་བ་བཅུ་གཉིས་ཀྱི་རིང་འཛམ་གླིང་ཁྱོན་ཡོངས་ལ་དམག་འཁྲུག་དང་ནད་ཡམས། དཔལ་འབྱོར་དང་ཚོང་ལས་སོགས་དང་འབྲེལ་བའི་གནས་ཚུལ་མང་དག་ཅིག་ཐོན་ཡོད་པའི་ཁྲོད་ནས་འཛམ་གླིང་དཔལ་འབྱོར་གླེང་སྟེགས་(WORLD ECONOMIC FORUM) ཀྱིས་ཕྱི་ལོ་༢༠༢༢ ལོའི་གནས་ཚུལ་ཆེ་ཁག་བདུན་ཞིག་སྤེལ་གསལ་ལྟར་ན།

༡) ཡུལ་ཐང་འཕར་ཆའི་དཀའ་ངལ།

ཅ་ལག་གི་རིན་གོང་རྒྱུན་ལྡན་ལས་མང་བ་འཕར་རུང་ལས་ཀ་བྱེད་མཁན་གྱི་གླ་ཆ་དེ་དང་བསྟུན་དེ་འཕར་གྱི་མེད་དུས། རིན་གོང་འཕར་ཚད་འདི་ལ་ཡུལ་ཐང་འཕར་ཆ་(Inflation) ཟེར་ཞིང་། རྒྱུན་ལྡན་གྱི་ཡུལ་ཐང་འཕར་ཆ་ནི་བརྒྱ་ཆ་༢% ཡས་མས་ཡིན་མོད་ཀྱང་། ད་ལྟའི་ཆར་རྒྱལ་ཁབ་མང་པོའི་ནང་ཡུལ་ཐང་འཕར་ཆའི་བརྒྱ་ཆ་ལྡབ་མང་པོ་འཕར་ཡོད་འདུག ལོ་འདིའི་ཕྱི་ཟླ་༦ པའི་ནང་ཨ་རིའི་ཡུལ་ཐང་འཕར་ཆ་ནི་བརྒྱ་ཆ་༩.༡% ཟིན་ཡོད་པ་དང་འདས་པའི་མི་ལོ་༤༠ ནང་གི་ཆེ་མཐོ་ཤོས་སུ་གྱུར་ཡོད་འདུག ལོ་འདིའི་ཕྱི་ཟླ་༡༠ པའི་ནང་དབྱིན་ཡུལ་གྱི་ཡུལ་ཐང་འཕར་ཆའི་བརྒྱ་ཆ་ནི་༡༡.༡ ཟིན་ཡོད་འདུག  ཡུལ་ཐང་འཕར་ཆ་ཆེ་བའི་དབང་གིས་ཐ་ན་སྟོབས་ཆེན་རྒྱལ་ཁབ་ཁག་གི་མི་མང་ཚོའི་འཚོ་བའི་ཐོག་ལ་དཀའ་ངལ་ཆེན་མོ་འཕྲད་ཀྱི་ཡོད་པས་ཕྱི་ལོ་༢༠༢༢ ལོར་རྒྱལ་ཁབ་མང་པོ་ལ་དཀའ་ངལ་དེ་འཕྲད་ཡོད་འདུག

༢ ) དམག་འཁྲུག་གི་དཀའ་ངལ།

 ལོ་འདིའི་ཕྱི་ཟླ་༢ ཚེས་༢༤ ཉིན་ཨུ་རུ་སུས་ཡུག་རེན་ལ་བཙན་འཛུལ་བྱས་ཡོད་པ་དང་། དུས་དེ་ནས་བཟུང་ད་ལྟའི་བར་ཡུག་རེན་གྱི་མི་མང་ས་ཡ་༧.༩ ཙམ་ཞིག་ཁྱིམ་མཚེས་རྒྱལ་ཁབ་ཁག་ལ་བྲོས་བྱོལ་དུ་ཕྱིན་ཡོད་པ་དང་། མི་མང་ས་ཡ་༨ ཙམ་ནི་རང་ཁྱིམ་དོར་ནས་ས་གནས་གཞན་ལ་གནས་སྤོ་བྱེད་དགོས་བྱུང་ཡོད་འདུག  དམག་འཁྲུག་གི་ཁྲོད་དུ་མི་སེར་ཕུད་པའི་ཕྱོགས་གཉིས་ཀྱི་དམག་མི་ཁྱོན་བསྡོམས་འབུམ་གཉིས་ཀྱི་ཚེ་སྲོག་ཤོར་ཡོད་པ་ཚོད་དཔག་བྱས་ཡོད་ལ། དམག་འཁྲུག་ལངས་ནས་ད་བར་ཟླ་བ་༡༠ ལྷག་ཕྱིན་རུང་ད་དུང་ཡང་མཚམས་འཇོག་བྱས་མེད་པ་མ་ཟད། དམག་འཁྲུག་དེའི་དབང་གིས་འཛམ་གླིང་ཁྱོན་ཡོངས་ཀྱི་ཚོང་དང་འབྲེལ་ལམ་དཔལ་འབྱོར་སོགས་ལ་དཀའ་ངལ་ཆེན་མོ་འཕྲད་ཡོད་འདུག འཛམ་གླིང་དམག་ཆེན་གཉིས་པའི་རྗེས་ཡུ་རོབ་ལ་བཙན་འཛུལ་བྱས་པ་ཆེ་ཤོས་དེ་ཆགས་ཡོད་འདུག་པས་ཕྱི་ལོ་༢༠༢༢ ལོའི་གནས་ཚུལ་གལ་ཆེན་ཞིག་ཆགས་ཡོད་འདུག

༣) ཐན་པའི་དཀའ་ངལ།

ལོ་འདིའི་ཕྱི་ཟླ་༨ པའི་ནང་ཡུ་རོབ་ཁུལ་དུ་ཚ་བ་ཆེ་དྲགས་པའི་དཀའ་ངལ་ཆེན་མོ་འཕྲད་ཡོད་ཅིང་། འདས་པའི་མི་ལོ་༥༠༠ ནང་གི་ཐན་པའི་དཀའ་ངལ་ཆེ་ཤོས་དེ་འཕྲད་ཡོད་འདུག་ལ། སྐབས་དེ་ཡུ་རོབ་ཀྱི་ས་ཁུལ་གསུམ་ཆ་གཉིས་ནི་ཐན་སྐྱོན་གྱི་ཉེན་བརྡ་འོག་ཏུ་གནས་ཡོད་འདུག

དེ་བཞིན་རྒྱ་ནག་གི་ས་ཁུལ་མང་པོ་ཞིག་ལ་ཐན་པ་བྱུང་ནས་བཟོ་གྲྭ་མང་པོ་སྒོ་བརྒྱབ་པ་དང་མི་མང་ཁྲི་ཕྲག་མང་པོ་ལ་དཀའ་ངལ་འཕྲད་ཡོད་འདུག

༤) ཆུ་ལོག་གི་དཀའ་ངལ།

ལོ་འདིའི་ཕྱི་ཟླ་༨ པའི་ནང་པ་ཀི་སེ་ཐན་ལ་ཆུ་ལོག་གི་རྐྱེན་ངན་གོད་ཆག་བྱུང་ཡོད་པ་དང་། སྐབས་དེ་རྒྱལ་ཁབ་ཁྱོན་ཡོངས་ཀྱི་གསུམ་ཆ་གཅིག་ཙམ་ལ་ཆུ་ལོག་གི་གནོད་འཚེ་ཕོག་ཡོད་འདུག སྐབས་དེ་མི་གྲངས་ཁྱོན་བསྡོམས་༡༣༩༡ ལྷག་འདས་གྲོངས་སུ་ཕྱིན་ཡོད་ལ། དེ་བཞིན་སྟོན་ཐོག་དང་སྡོད་ཁང་། འཛུགས་སྐྲུན་སོགས་ཨ་སྒོར་ཐེ་འབུམ་༣༠ ལྷག་གི་གཏོར་བཅོམ་ཐེབས་ཡོད།  ཆུ་ལོག་དེའི་དབང་གིས་ད་ལྟ་ཡང་མི་མང་ས་ཡ་བརྒྱད་ལྷག་ལ་འཚོ་བའི་ཐོག་དཀའ་ངལ་ཆེན་མོ་འཕྲད་བཞིན་ཡོད་པས་ཕྱི་ལོ་༢༠༢༢ ལོའི་གནས་ཚུལ་གལ་ཆེ་བ་ཞིག་ཆགས་ཡོད་འདུག

༥) དབྱིན་ཇིའི་རྒྱལ་མོ་འདས་གྲོངས་སུ་ཕྱིན་ཡོད།

ལོ་འདིའི་ཟླ་བ་༩ པའི་ནང་དབྱིན་ཇིའི་རྒྱལ་མོ་ཨེ་ལི་ཛ་བྷེ་ཐེ་གཉིས་པ་དགུང་གྲངས་༩༦ ཐོག་དགོངས་པ་རྫོགས་ཡོད་པ་དང་། ཁོང་གིས་དུས་ཡུན་མི་ལོ་༧༠ རིང་དབྱིན་ཇིའི་རྒྱལ་སྲིད་བསྐྱངས་ཡོད་པ་མ་ཟད། འདས་པའི་དུས་ཡུན་དེ་དག་གི་རིང་དབྱིན་ཇིའི་སྲིད་བློན་༡༥ འཕོ་འགྱུར་བྱུང་ཡོད་འདུག་ལ། ཁོང་ནི་འཛམ་གླིང་ཐོག་རྒྱལ་སྲིད་དུས་ཡུན་རིང་ཤོས་སྐྱོང་མཁན་ཨང་གཉིས་པ་དེ་ཆགས་ཡོད་འདུག

༦) མི་འབོར་ཐེ་འབུམ་བརྒྱད་ཟིན་ཡོད།

ཕྱི་ལོ་༡༨༠༣ ལོ་འཛམ་གླིང་ཁྱོན་ཡོངས་ཀྱི་མི་འབོར་ཐེ་འབུམ་གཅིག་ཟིན་ཡོད་པ་དང་། ཕྱི་ལོ་༢༠༡༡ ལོ་འཛམ་གླིང་ཁྱོན་ཡོངས་ཀྱི་མི་འབོར་ཐེ་འབུམ་༧ ཟིན་ཡོད་པ་དང་། འདས་པའི་མི་ལོ་༢༠༠ ལྷག་གི་རྗེས་ཏེ་ལོ་འདིའི་ཕྱི་ཟླ་༡༡ ཚེས་༡༥ ཉིན་འཛམ་གླིང་ཁྱོན་ཡོངས་ཀྱི་མི་འབོར་ཐེེ་འབུམ་༨ ཟིན་ཡོད་པའི་གནས་ཚུལ་ཐོན་ཡོད་ལ། ད་ལྟའི་ཆར་རྒྱ་ནག་ལ་མི་འབོར་ཐེ་འབུམ་༡.༤༢༦ ཡོད་པ་དང་རྒྱ་གར་ལ་༡.༤༡༢ ཡོད། ཨ་རི་ལ་མི་འབོར་ས་ཡ་༣༣༧ ཡོད་པས་རྒྱལ་ཁབ་དག་ནི་འཛམ་གླིང་ཐོག་མི་འབོར་མང་ཤོས་ཡོད་པའི་རྒྱལ་ཁབ་གསུམ་དུ་གྱུར་ཡོད་འདུག

༧) ནད་ཡམས་ཀྱི་དཀའ་ངལ། ཏོག་དབྱིབས་གཉན་རིམས་ཁྱབ་བརྡལ་དུ་ཕྱིན་ནས་ད་བར་མི་ལོ་གསུམ་ལྷག་གི་རིང་འཛམ་གླིང་ཁྱོན་ཡོངས་ལ་མི་ས་ཡ་༦༦༤ དང་ཁྲི་༥༥ ལྷག་ན་ཡོད་འདུག་ལ། ནད་པ་དེ་དག་གི་ཁྲོད་ནས་མི་ས་ཡ་༦ དང་འབུམ་༦ ལྷག་འདས་གྲོངས་སུ་ཕྱིན་ཡོད་འདུག ཕྱི་ལོ་༢༠༢༢ གཅིག་པུའི་ནང་དུ་མི་ས་ཡ་༣༠༠ ལྷག་ནད་པ་ཆགས་ཡོད་འདུག་པས་ནད་ཡམས་ཀྱི་དཀའ་ངལ་དེ་ཡང་ལོ་འདིིིའི་ནང་གི་དཀའ་ངལ་ཆེ་ཤོས་ཤིག་ཏུ་འགྱུར་འདུག

གསར་འགོད་པ། བློ་བཟང་རྒྱ་མཚོ།