༢༠༢༤ ལོའི་ཨོ་རྩལ་འགྲན་ཚོགས་སྐབས་བོད་མོ་ཆོས་དབྱིངས་སྐྱིད་ལ་ཨང་རིམ་༡༤ པ་ཐོབ་སོང་།

ད་ལྟའི་ཆར་༢༠༢༤ ལོའི་རྒྱལ་སྤྱིའི་དབྱར་དུས་ཨོ་ལིམ་ཕིག་གི་རྩེད་འགྲན་དེ་ཧྥ་རན་སིར་རྩེ་བཞིན་ཡོད་པ་ལྟར།དེ་རིང་ཕྱི་ཚེས་༧གྱི་ཉིན་རྒྱབ་ཕོ་མོ་མཉམ་བསྲེས་ཀྱི་སྤྱི་ལེ་༤༥ཡི་འདུར་རྒྱུག་ཁྲོད།བོད་ཀྱི་ལུས་རྩལ་བ་གྲགས་ཅན་ཆོས་དབྱིངས་སྐྱིད་མཉམ་ཞུགས་ཀྱིས་ཁོང་མོར་ཨང་རིམ་༡༤ པ་ཐོབ་འདུག ཁོང་མོ་རྩེད་འགྲན་འདིར་ཞུགས་པའི་སྔ་ཕྱིར་གཞིས་བྱེས་ཀྱི་བོད་མི་ཚོས་དོ་སྣང་ཆེན་པོ་བྱས་སོང་ལ།ཁོང་མོའི་རྩེད་འགྲན་ལམ་ལྷོང་ཡོང་བ་ཡིག་ངག་གཉིས་ནས་སྨོན་ཚིག་འབོད་མཁན་མང་པོ་འདུག ད་ཐེངས་རྩེད་འགྲན་དངོས་ཀྱི་སྐབས་སུ་བོད་མི་མང་པོ་ཞིག་ཁོང་མོར་རྒྱབ་སྐྱོར་ཆེད་དུ་བསླེབས་འདུག་ལ། ཁ་ཤས་ཀྱིས་བོད་ཀྱི་རྒྱལ་དར་འཕྱར་ནས་ཁོང་མོར་དགའ་བསུ་ཞུས་འདུག གཞན་ཡང་དགའ་སྐྱོའི་ཚོར་སྣང་འབྲི་མཁན་དུ་མ་འདུག་ལ། སྤྱི་ཚོགས་བརྒྱུད་ལམ་གྱི་ཐོག་ཏུ་བོད་མི་མང་པོ་ཞིག་གིས་ཁོང་མོར་གསེར་གྱི་རྟགས་མ་སོགས་རྒྱལ་ཁ་ག་རེ་ཐོབ་ཀྱང་རྒྱ་གཞུང་དགའ་བྱེད་དང་རྒྱ་གཞུང་གི་མིང་རེད། བོད་ཞེན་ཅི་ཙམ་ཡོད་ཀྱང་དེར་རྒྱབ་སྐྱོར་བྱེད་མི་ཐུབ་པ་སོགས། མདོར་ན་བསམ་ཚུལ་དང་ཚོར་སྣང་མི་འདྲ་བ་སྣ་ཚོགས་ཤིག་འདུག བོད་ཀྱི་ལུས་རྩལ་བ་ཆོས་དབྱིངས་སྐྱིད་ནི་ཕྱི་ལོ་༡༩༩༠ཟླ་༡༡ཚེས་༡༡ཉིན་མཚོ་སྔོན་མཚོ་བྱང་ཁུལ་མདའ་བཞི་རྫོང་ཝ་མགྱོགས་སྡེ་བ་ནས་ཡིན་ཞིང་། ད་བར་རྒྱ་ནག་ནང་དང་རྒྱལ་སྤྱིའི་རིམ་པའི་འགྲན་བསྡུར་མང་པོའི་ནང་ཞུགས་ཏེ་བྱ་དགའ་དུ་མ་བླངས་ཡོད་པ་དང་།ལྷག་ཏུ་༢༠༡༢ལོར་ལོན་ཊོན་ཨོ་རྩལ་ཐོག་གསེར་གྱི་རྟགས་མ་ཐོབ་མྱོང་ཡོད་པ་རེད།
གསར་འགོད་པ།བསྟན་འཛིན་ལམ་བཟང་།