༧གོང་མ་བདག་ཆེན་འཇིག་བྲལ་རིན་པོ་ཆེའི་སྐུ་གདུང་ཞུགས་འབུལ།

ཟླ་འདིའི་ཚེས་༡༡ ཉིན་དཔལ་ས་སྐྱ་༧གོང་མ་བདག་ཁྲི་རིན་པོ་ཆེ་མཆོག་དང་ངོར་ཀླུ་ལྡིང་མཁན་ཆེན་རིན་པོ་ཆེ་རྣམ་གཉིས་དབུ་བཞུགས་ཐོག ས་སྐྱའི་ཕུན་ཚོགས་ཕོ་བྲང་གི་༧གོང་མ་བདག་ཆེན་རིན་པོ་ཆེའི་སྐུ་གདུང་ཞུགས་འབུལ་གནང་ཡོད་པ་རེད།

དེ་ཡང་ས་སྐྱ་༧གོང་མ་བདག་ཆེན་འཇིག་བྲལ་རིན་པོ་ཆེ་འདི་ལོ་ཕྱི་ཟླ་༤ པའི་ནང་བྱང་ཨ་རིར་ས་སྐྱ་ཕུན་ཚོགས་ཕོ་བྲང་དུ་དགོངས་པ་རྫོགས་ཡོད་པ་དང་། ཟླ་འདིའི་ཕྱི་ཚེས་༧ ཉིན་གང་གི་སྐུ་གདུང་རིན་པོ་ཆེ་བྱང་ཨ་རི་ནས་རྒྱ་གར་གྱི་རྒྱལ་ས་ལྡི་ལིར་ཡོད་པའི་ས་སྐྱ་ཕུན་ཚོགས་ཕོ་བྲང་གི་དགོན་པར་གདན་ཞུ་གནང་ཡོད་པ་རེད། ཕྱི་ཚེས་༨ ནས་༡༠ བར་ཉིན་གྲངས་གསུམ་རིང་བླ་སྤྲུལ་མི་མང་རྣམས་ལ་གདུང་མཇལ་དང་། ཚེས་༡༡ སྔ་དྲོ་དཔལ་ས་སྐྱ་༧གོང་མ་བདག་ཁྲི་རིན་པོ་ཆེ་མཆོག་དང་ངོར་ཀླུ་ལྡིང་མཁན་ཆེན་རིན་པོ་ཆེ་རྣམ་གཉིས་དབུ་བཞུགས་ཐོགས་ཕོ་བྲང་རྣམ་གཉིས་ཀྱི་སྐུའི་གདུང་སྲས་རྣམ་པ་དང་བླ་སྤྲུལ་དགེ་བཙུན་སྟོང་ཚོ་གཅིག་ཙམ་གྱིས་ཕྱོགས་བཞིར་འཁོད་ནས་སྐུ་གདུང་ཞུགས་འབུལ་གནང་སོང་།

གདུང་མཆོད་ཀྱི་མཛད་སྒོའི་ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་གཙོས་པའི་སྤྱི་འཐུས་ཁག་གཅིག་དང་།  ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་དང་བཀའ་བློན་དང་བཀའ་ཟུར། ལྡི་ལི་དོན་གཅོད་བཀའ་ཟུར་འབྲོང་ཆུང་དངོས་གྲུབ། ས་གནས་ཚོགས་སྐྱིད་ཁག་གི་སྐུ་ཚབ་སོགས་ཆེད་བཅང་གནང་བ་དང་། རྒྱལ་བལ་འབྲུག་གསུམ་གཙོས་པའི་འཛམ་གླིང་ཤར་ནུབ་ཡུལ་གྲུལ་གང་སར་དད་ལྡན་སློབ་འབངས་སྟོང་ཚོ་ཁ་ཤས་གདུང་མཆོད་ལ་མཉམ་ཞུག་བྱས་འདུག།

གསར་འགོད་པ་ཆོས་ཉིད་འོད་ཟེར།