༧གོང་ས་མཆོག་གི་སྐུ་ཁམས་དྭངས་སྐྱེད་ཡག་པོ་ཡོང་བཞིན་པ་དང་བྱང་ཨ་རིའི་བོད་མི་གཙོས་པས་བརྟན་བཞུགས་བསྟར་འབུལ་ཞུ་རྒྱུ།
ཕྱི་ཟླ་༨ པའི་ཚེས་༥ ་ཉིན་དགའ་ལྡན་ཕོ་བྲང་ནས་༧གོང་ས་མཆོག་གི་སྐུ་གཟུགས་དྭངས་སྐྱེད་ཡག་པོ་འབྱུང་བཞིན་པ་དང་འབྲེལ་བའི་གསལ་བསྒྲགས་ཤིག་ངོ་དེབ་ཐོག་ཏུ་སྤེལ་འདུག གསལ་བསྒྲགས་དེའི་ནང་། ནིའུ་ཡོག་གི་དམིགས་བསལ་གཤགས་བཅོས་སྨན་ཁང་ (Hospital for Special Surgery) གི་དར་མའི་ལུས་པོ་བསྐྱར་བཟོ་དང་རུས་ཚིགས་གཤགས་བཅོས་ཚན་པའི་འགན་འཛིན་སྨན་པ་ཌེ་ཝིཌ་མེ་མེན་ (Dr. David Mayman) གཟའ་མཇུག་ལ་༸གོང་ས་༸སྐྱབས་མགོན་ཆེན་པོའི་སྐུ་མདུན་དུ་བཅར་ཏེ། ༸གོང་ས་མཆོག་གི་ཞབས་པུས་ལ་བརྟག་དཔྱད་དང་། ཞབས་འགུལ་སྐྱོད་གནང་སྟངས་ལ་ཞིབ་འཇུག་གནང་རྗེས། སྨན་པ་ཁོང་གིས། ༸གོང་ས་མཆོག་གི་སྐུ་གཟུགས་དྭངས་སྐྱེད་ཡག་པོ་ཡོང་བཞིན་འདུག་ལ། ཞབས་པུས་འགུལ་སྐྱོད་སླར་གསོའི་སྦྱོང་བརྡར་ལ་འབད་བརྩོན་ཆེན་པོ་གནང་བཞིན་ཡོད་པ་ལྟར། ཡར་རྒྱས་ཆེན་པོ་ཡོང་བཞིན་འདུག །ད་དུང་ཟླ་བ་དྲུག་ནས་བཅུ་གཉིས་བར་མུ་མཐུད་དེ་འདི་ལྟར་དྭངས་སྐྱེད་ཡག་པོ་ཡོང་བའི་འབད་བརྩོན་གནང་དགོས། ད་བར་༸གོང་ས་མཆོག་གི་སྐུ་ཁམས་ལ་ཡར་རྒྱས་ཆེན་པོ་བྱུང་ཡོད་པ་དང་། མུ་མཐུད་ལོ་གཅིག་ནང་ཡར་རྒྱས་ཡོང་བའི་རེ་བ་ཞུ་བཞིན་ཡོད་སོགས་འཁོད་འདུག་ལ། དེ་བཞིན་ཉེ་ཆར་བྱང་ཨ་རིའི་བོད་མི་སོགས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་སྐུ་ཚབ་དོན་གཅོད་ཀྱིས་མི་མང་ལ་བརྗོད་པ་ལྟར། ཁ་སང་ཕྱི་ཚེས་༥ ཉིན་བྱང་ཨ་རིའི་སྐུ་ཚབ་དོན་གཅོད་ལས་ཁུངས་ཀྱིས་དེ་འབྲེལ་གྱི་གསལ་བསྒྲགས་ཤིག་སྤེལ་འདུག་པ་དང་། དེའི་ནང་དུ། བྱང་ཨ་རིའི་བོད་མི་ཡོངས་དང་། སོག་པོ། ཧི་མ་ལ་ཡའི་རི་རྒྱུད་ཁུལ་གྱི་མི་མང་། ཕྱི་རྒྱལ་བ་བཅས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་རིར་བཞུགས་གདན་འཇགས་རིང་མཚོན་དོན་བརྟན་བཞུགས་འབུལ་འཐུས་ཆོག་པ་དང་། མང་ཚོགས་ལ་ཞལ་མཇལ་གསུང་ཐོས་ཀྱི་སྐལ་བཟང་གོ་སྐབས་གསོལ་སྩལ་ཡོང་བའི་གསོལ་འདེབས་ཞུས་པར་ཞལ་བཞེས་ཐོབ་སྟེ། ཕྱི་ལོ་ ༢༠༢༤ ཟླ་བ་ ༨ ཚེས་ ༢༢ ཉིན་གྱི་སྔ་དྲོ་ས་གནས་ནིའུ་ཡོག་ཏུ་མཚོན་དོན་བརྟན་བཞུགས་འབུལ་གནང་རྒྱུ་ཐུགས་གཏན་འཁེལ་སོང་། ས་གནས་ནིའུ་ཡོག་ཏུ་ཡིན་ཀྱང་། ཞིབ་ཕྲའི་དུས་ཚོད་དང་ཚོགས་ཁང་བཅས་ཉིན་ཤས་རྗེས་གསལ་བསྒྲགས་ཞུ་རྒྱུ་ཡིན། ཞེས་དང་། སྤྱི་འཐུས་ཚོགས་པ་རེ་ནས་ཚོགས་གཙོ་དང་རྒྱུན་ལས་རེ་བཅས་མཉམ་ཞུགས་གནང་མཁན་མི་གཉིས་ཀྱི་མཚན་གཞུང་གང་མགྱོགས་འདི་གར་གཏོང་གནང་ཡོང་བ་དང་། མཚོན་དོན་བརྟན་བཞུགས་ཚེས་༢༢ ཉིན་ཐུགས་གཏན་འཁེལ་བའི་སྐོར་ས་གནས་མང་ཚོགས་ལ་མ་གོ་མ་ཐོས་པ་མེད་པའི་གསལ་བསྒྲགས་གནང་སྐྱོང་ཡོང་བ་དེ་དོན་དགོངས་འཇགས་ཞུ་ཞེས་བཀོད་འདུག
གསར་འགོད་པ། བསྟན་འཛིན་ལམ་བཟང་།
