༧གོང་ས་མཆོག་གི་སྐུ་ཁམས་དང་བོད།

(བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་༡༠༠༢ )

༧གོང་ས་༧སྐྱབས་མགོན་ཆེན་པོ་མཆོག་སྐུའི་འཕྲོད་བཞེས་ཀྱི་ཆེད་གང་མགྱོགས་ཨ་རིར་ཆིབས་བསྒྱུར་བསྐྱང་གཏན་ཁེལ་འདུག་པ་དང་། བོད་མི་རྣམས་ལ་མཚོན་ན་དེ་ནི་དོ་སྣང་ཆེན་པོ་བྱ་ཡུལ་ཞིག་ཆགས་ཡོད། ༧གོང་ས་མཆོག་དགུང་གྲངས་བཅུ་དྲུག་ནས་བཟུང་དགུང་གྲངས་དགུ་བཅུ་ལ་མ་ཕེབས་བར་བསྟན་འགྲོ་སྤྱིའི་བདེ་ཐབས་ཆེད་སྐུ་ངལ་བརྒྱ་ཕྲག་མང་པོ་ལྷུར་བཞེས་མཛད་ཡོད་པ་དང་། ད་ལྟ་དགུང་གྲངས་མཐོན་པོར་ཕེབས་ཟིན་པས་སྐུའི་འཕྲོད་བཞེས་ཐོག་ལ་ཕྱོགས་ཡོངས་ནས་དགོངས་བཞེས་དང་གྲ་སྒྲིག་འཐུས་ཚང་དགོས་པ་གལ་ཆེན་པོར་གྱུར་ཡོད། བཙན་བྱོལ་བོད་མི་རྣམས་ལ་མཚོན་ན་ད་ལྟའི་ཆར་འཛམ་གླིང་ཤར་ནུབ་ཀྱི་ཡུལ་གྲུ་ཀུན་ཏུ་གནས་སྡོད་བྱས་ཡོད་པ་དང་། འཚོ་བའི་གནས་སྟངས་ཐོག་དཀའ་ངལ་ཆེན་པོ་མེད་པར་གྱུར་ཟིན་པ་ནི། ༧གོང་ས་མཆོག་གི་ཐུགས་རྗེ་བཀའ་དྲིན་དང་ཁོང་གི་མཛད་འཕྲིན་ཁོ་ན་ལ་བརྟེན་ནས་བྱུང་ཡོད་པ་མ་ཟད། མགོན་པོ་གང་ཉིད་གཞིས་བྱེས་བོད་མི་ཡོངས་ཀྱི་ཁོག་པའི་སྙིང་དང་དཔྲལ་བའི་མིག་ལྟ་བུར་གྱུར་ཡོད།

མགོན་པོ་གང་ཉིད་ཀྱི་སྐུའི་འཕྲོད་བཞེས་སྤྱི་དང་ཞབས་ཀྱི་པུས་མོ་སྨན་བཅོས་ཞུ་འཆར་འདིའི་ཐོག་ལ་བོད་མི་ཡོངས་ཀྱིས་སེམས་ཁུར་ཆེན་པོ་བྱེད་དགོས་པ་དང་། རིས་མེད་དགོན་སྡེ་ཁག་གིས་གཙོས་བོད་མི་ཡོངས་ཀྱིས་སྐུའི་ཞབས་རིམ་འཐུས་ཤོར་མེད་པ་བསྒྲུབ་དགོས་པ་དེ་ཧ་ཅང་གལ་ཆེན་པོར་སྣང་ཞིང་། དེ་ནི་བསྒྲུབ་སླ་ཞིང་ནུས་པ་དང་ལྡན་པ་ཞིག་ཏུ་འགྱུར་ངེས་རེད། ༧གོང་ས་མཆོག་གི་དགུང་ནའི་བབས་དང་། བོད་སྤྱི་མཐུན་གྱི་བསོད་ནམས་དམན་པའི་དབང་གིས་གྲ་མ་འགྲིགས་པའི་གནས་ཚུལ་རེ་བྱུང་བའི་དབང་དུ་བཏང་ན། བོད་དོན་ཆབ་སྲིད་ཀྱི་ཐོག་ནས་ནུས་པ་གང་ཡང་མེད་པར་འགྱུར་ངེས་པ་མ་ཟད། སྡུག་ས་ནས་བཤད་ན་བཙན་བྱོལ་བོད་མི་རྣམས་ཁ་འཐོར་དགུ་འཐོར་དུ་འགྱུར་རྒྱུའི་ཉེན་ཁའང་ཆེན་པོ་ཡོད། བོད་གངས་ཅན་ལྗོངས་ལ་མཚོན་ན་འཕགས་པ་སྤྱན་རས་གཟིགས་ཀྱི་འདུལ་ཞིང་ཡིན་པ་དང་། ལས་དང་སྨོན་ལམ་གྱི་འབྲེལ་བ་དམ་ཟབ་ཡོད་པས་༧གོང་ས་སྐུ་ཕྲེང་རིམ་བྱོན་ནི་བོད་དང་བོད་མིའི་མགོན་དཔུང་ཉག་གཅིག་ཏུ་གྱུར་ཡོད།

རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་སྤྱི་དང་། ཨ་རི་དང་རྒྱ་ནག་གི་ཆབ་སྲིད་ཀྱི་འགལ་འབྲེལ་ཐོག་ནས་བཤད་ན། ཨ་རིའི་སྲིད་གཞུང་གིས་སྐབས་རེ་༧གོང་ས་མཆོག་དང་བོད་དོན་ལ་རྒྱབ་སྐྱོར་གྱི་རྣམ་པ་ཤུགས་ཆེན་པོ་དང་། སྐབས་རེ་བེད་སྤྱོད་ཀྱི་བཟོ་ལྟ་སོགས་མི་འདྲ་བ་སྣ་ཚོགས་བྱུང་མྱོང་ཡང་། མདོར་བསྡུས་ནས་བཤད་ན་ཨ་རི་ནི་འཛམ་གླིང་ཤར་ནུབ་ཀུན་ནས་རྒྱ་ནག་ལ་གནོན་ཤུགས་ཆེན་པོ་སྤྲོད་ཐུབ་མཁན་གྱི་རྒྱལ་ཁབ་གཅིག་པུ་དེ་ཡིན་པ་མ་ཟད། རྒྱ་ནག་གི་ངོས་ནས་ཀྱང་ཨ་རིའི་གནོན་ཤུགས་དང་དེའི་ཤུགས་རྐྱེན་ལ་ཞེད་སྣང་ཆེན་པོ་ཡོད་པས། ཁ་ཙམ་ལས་དོན་དུ་རྒྱ་ནག་གིས་ཨ་རི་ལ་བསྟུན་མཁས་དང་སྤྲེལ་ལད་འཁྲབ་པའི་ལོ་རྒྱུས་ཀྱང་ཧ་ཅང་མང་པོ་ཡོད། མ་འོངས་པར་ཨ་རྒྱའི་འབྲེལ་ལམ་ནང་༧གོང་ས་མཆོག་དང་བོད་དོན་བེད་སྤྱོད་ཡོད་པ་ཞིག་ཏུ་གྱུར་ན་དགའ་འོས་པ་ཞིག་ལས། ཞེད་སྣང་དང་འཚེར་སྣང་དགོས་པ་ཞིག་ཏུ་མ་མཐོང་ལ། བོད་དོན་དེ་རྒྱལ་ཁབ་གཞན་གྱི་སྲིད་དོན་ནང་བེད་སྤྱོད་གང་ཡང་མེད་པར་གྱུར་ཟིན་རྗེས་དོན་གྱིས་བོད་དོན་ཤི་ཟིན་པ་རེད།

དེང་སྐབས་ཤར་ཏུར་ཀི་སི་ཐན་དང་། ཧོང་ཀོང་གི་གནས་སྟངས་དང་བསྡུར་ན་བོད་དོན་གྲག་འགུལ་ཆུང་བ་མ་ཟད། ཐའེ་ཝན་གྱི་གནད་དོན་དང་དེ་བས་ཀྱང་བསྡུར་ཐབས་མེད། བོད་དོན་འཐབ་རྩོད་དེ་རྒྱལ་སྤྱིའི་ཆབ་སྲིད་ནང་ཤུགས་རྐྱེན་ཆེན་པོར་འགྱུར་ཐུབ་དང་མི་ཐུབ་གཙོ་བོ་བོད་ནང་གི་གནས་སྟངས་ལ་རག་ལས་པ་དང་། བཙན་བྱོལ་བོད་མིའི་འཐབ་རྩོད་ཀྱི་ཁ་ཕྱོགས་དང་འབྲེལ་བ་ཧ་ཅང་ཆེན་པོ་ཡོད། བཙན་བྱོལ་བོད་གཞུང་གི་ངོས་ནས་བོད་དོན་འཐབ་རྩོད་ལས། བཙན་བྱོལ་བོད་མིའི་བདེ་ཐབས་གཙོ་བོར་བཟུང་ན་འཕྲལ་ཕུགས་གང་ཐད་ནས་ནུས་པ་ཆེན་པོ་གང་ཡང་མེད་པར་འགྱུར་ངེས་པ་དང་། བོད་དོན་འཐབ་རྩོད་གཙོ་བོར་འཛིན་ཐུབ་ན་བཙན་བྱོལ་ནང་གི་བདེ་ཐབས་ཞོར་དུ་འགྲུབ་ཐུབ། རྩ་བས་ད་བར་བོད་དོན་འཐབ་རྩོད་མུ་མཐུད་གནས་ཐུབ་པ་དེ་༧གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་ཡོད་པ་དང་། མ་འོངས་པར་བོད་དོན་འཐབ་རྩོད་གནས་ཐུབ་མིན་ཡང་༧གོང་ས་མཆོག་གི་སྐུ་ཚེ་བརྟན་ཐུབ་མིན་དང་མཛད་པ་འཕྲིན་ལས་ལ་རག་ལས་ཡོད།

མདོར་ན་༧གོང་ས་མཆོག་གི་མཛད་འཕྲིན་དང་། བོད་དོན་གཉིས་ཁ་འབྲལ་ཐབས་མེད་པ་ཞིག་ཏུ་གྱུར་ཡོད་པ་མ་ཟད། བོད་གཞིས་བྱེས་གཉིས་ནས་༧གོང་ས་མཆོག་ལ་དད་འདུན་དང་དགའ་ཞེན་ནི་རི་རབ་ལས་དཔང་མཐོ་ཞིང་རྒྱ་མཚོ་ལས་གཏིང་ཟབ་པས། ༧གོང་ས་མཆོག་གི་མཛད་འཕྲིན་དང་བོད་དོན་གཉིས་ཁ་འབྲལ་ཐབས་མེད་པར་གྱུར་ཡོད་པའི་རྒྱུ་མཚན་ཡང་འདི་ལ་ཐུག་ཡོད། ཨ་རི་སོགས་སྟོབས་ཆེན་རྒྱལ་ཁབ་ཁག་གིས་༧གོང་ས་མཆོག་ལ་ཆེ་མཐོང་དང་གུས་ཞབས་ཞུ་བའི་རྒྱུ་མཚན་གཅིག་འདི་ཡིན་པ་དང་། བོད་དོན་ལ་རྒྱབ་སྐྱོར་ཚད་མཐོན་པོ་གནང་བ་དེ་ཡང་༧གོང་ས་མཆོག་གི་མཛད་འཕྲིན་ལ་བརྟེན་ནས་བྱུང་ཞིང་། གཞིས་བྱེས་བོད་མི་ཡོངས་རྫོགས་སེམས་ཀྱི་འདུན་པ་གཅིག་ཏུ་གནས་ཡོད་པ་དེ་ཡང་གཙོ་བོ་༧གོང་ས་མཆོག་ལ་བརྟེན་ནས་བྱུང་ཡོད་པས། ༧གོང་ས་མཆོག་སྐུ་ཚེ་ཡུན་དུ་བརྟན་ཐུབ་མིན་དང་བོད་དོན་གཉིས་གཞི་གཅིག་ཏུ་གྲུབ་ཟིན་པས། རྒྱལ་ཁབ་གཞན་གྱི་སྲིད་དོན་ནང་བོད་དོན་ཅི་ཙམ་གལ་ཆེན་པོར་གྱུར་པ་དེ་སྲིད་ཀྱིས་བོད་དོན་བདེན་མཐའ་གསལ་རྒྱུར་ནུས་པ་ཆེན་པོར་གྱུར་ཡོད།།