༧གོང་ས་མཆོག་གི་སྐུ་ཚེའི་ཚེ་སྒྲུབ་ཆེན་མོ།

ཕྱི་ཟླ་༦   ཚེས་༣༠   ནས་ཕྱི་ཟླ་༧  པའི་ཚེས་༦   བར་དགེ་ལུགས་ཡོངས་ཀྱི་ངོས་ནས་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཚེའི་ཚེ་སྒྲུབ་ཆེན་མོ་འབྲས་སྤུངས་སྒོ་མང་གྲྭ་ཚང་གི་འདུ་ཁང་ནང་འཚོགས་གནང་ཡོད་པ་རེད།

དེ་ཡང་དགེ་ལུགས་ཡོངས་ཀྱི་རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་ངོས་ནས་ལོ་འཁོར་གཅིག་རིང་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་སྐུའི་གྱ་སྟོན་དང་འབྲེལ་བའི་རྒྱལ་བའི་བཀའ་དྲིན་རྗེས་དྲན་གྱི་བྱེད་སྒོ་སྣ་མང་སྤེལ་ཡོད་པ་མ་ཟད།     ༧གོང་ས་སྐྱབས་མགོན་ཆེན་པོ་མཆོག་མོན་གྷོ་འདོད་རྒུ་གླིང་དུ་ཞབས་སོར་བཀའ་དྲིན་བསྐྱངས་སྐབས་དང་བསྟུན་ནས་མགོན་པོ་གང་ཉིད་དགུང་གྲངས་༨༠   ལ་ཕེབས་པའི་སྐུའི་འཁྲུངས་སྐར་ལོ་གཅིག་རིང་སྲུང་བརྩི་གནང་བའི་གྲུབ་དོན་ཐ་མ་དེ་༧གོང་ས་མཆོག་དགུང་གྲངས་༨༡  ལ་ཕེབས་པའི་སྐུའི་འཁྲུངས་སྐར་དང་སྟབས་བསྟུན་ནས་དགེ་ལུགས་ཡོངས་ཀྱིས་བརྟན་བཞུགས་བསྟར་འབུལ་གྱི་མཛད་འཆར་དེའི་སྔོན་འགྲོའི་ཚུལ་དུ་བདུན་ཕྲག་གཅིག་རིང་རྗེ་ཚེ་འཛིན་མའི་ཆོ་གའི་སྒོ་ནས་སྐུའི་ཚེའི་ཚེ་སྒྲུབ་ཆེན་མོ་གསོགས་སྒྲུབ་གནང་གནང་ཡོད་པ་རེད།

༧གོང་ས་མཆོག་གི་སྐུ་ཚེའི་ཚེ་སྒྲུབ་ཆེན་མོ་གསོག་སྒྲུབ་གནང་སར་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་དང་ཤར་བྱང་གི་ཆོས་རྗེ་རྣམ་གཉིས་གདན་ས་གྲྭ་ཚང་ཁག་གི་མཁན་པོ་མཁན་ཟུར་རྣམ་པ་དང་དགེ་བཤེས་ལྷ་རམས་པ་དྲག་གྲས་དང་དཔེ་འཁྲིད་རྒན་སོགས་དགེ་འདུན་པ་༡༥༠   ཙམ་ཕེབས་ཡོད་པ་དང་།   ཐེངས་འདིའི་བཀའ་དྲིན་རྗེས་དྲན་དང་འབྲེལ་བའི་མཇུག་བསྡོམས་ཀྱི་བརྟན་བཞུགས་དང་ཚེ་སྒྲུབ་གནང་ཕྱོགས་དེ་ཡང་དགའ་ལྡན་ཁྲི་རིན་པོ་ཆེ་མཆོག་གིས་དགོངས་འཆར་༧གོང་ས་མཆོག་ལ་སྙན་གསན་ཞུས་ནས་དེ་དོན་ལག་བསྟན་དགོས་པའི་བཀའ་བཞེས་ཐོབ་པ་ལྟར་སྐུའི་ཚེ་སྒྲུབ་བདུན་ཕྲག་གཅིག་རིང་གསོག་སྒྲུབ་གནང་ཡོད་པ་རེད་འདུག

རྩ་བའི་ལོ་འདིར་དགེ་ལུགས་ཡོངས་ཀྱི་རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་ངོས་ནས་འབོད་སྐུལ་ཞུས་དོན་བཞིན།    གདན་ས་གྲྭ་ཚང་ཁག་ནས་ཀྱང་ལོ་རེའི་ནང་གྲྭ་ཚང་སོ་སོའི་ཐུན་མོང་མ་ཡིན་པའི་ཆོས་ཕྱོགས་ཀྱི་བྱེད་སྒོ་ཆེ་ཁག་རྣམས་ཀྱང་༧གོང་ས་མཆོག་གི་སྐུ་ཕྱྭའི་ཞབས་རིམ་ཆེད་འཚོགས་ཡོད་པ་དང་།      དེ་བཞིན་༧གོང་ས་མཆོག་དགུང་གྲངས་བརྒྱད་བཅུར་ཕེབས་པའི་སྐུའི་གྱ་སྟོན་དང་འབྲེལ་བའི་རྒྱལ་བའི་བཀའ་དྲིན་རྗེས་དྲན་ཆེད་རྒྱ་གར་གྱི་རྒྱལ་ས་ལྡི་ལི་དང་གདན་ས་གྲྭ་ཚང་ཁག རྒྱུད་གྲྭ་སྟོད་སྨད་བཅས་སུ་རྒྱལ་བའི་ཆོས་སྲིད་ཀྱི་མཛད་རྣམ་དང་གསང་སྔགས་དང་འདུལ་བ།   ཚན་རིག་དང་ནང་ཆོས་ཀྱི་ཕྱི་ནང་གི་ལྟ་གྲུབ་བཅས་ཀྱི་ཐོག་༧གོང་ས་སྐྱབས་མགོན་ཆེན་པོ་མཆོག་གི་རྒྱུན་དུ་བཀའ་སློབ་ལམ་སྟོན་གནང་བཞིན་པའི་བརྗོད་གཞི་སྣ་མང་ཐོག་བགྲོ་གླེང་མང་པོ་འཚོགས་གནང་ཡོད་པ་རེད།

ལྷག་དོན་ཕྱི་ཚེས་༦   ཉིན་སྐུའི་འཁྲུངས་སྐར་དུས་ཆེན་སྐབས་སྔ་ཐོག་དགེ་ལུགས་ཡོངས་ཀྱི་རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་ངོས་ནས་འབྲས་སྤུངས་དགའ་ལྡན་ཕོ་བྲང་དུ་བརྟན་བཞུགས་བསྟར་འབུལ་ཞུ་རྒྱུ་མ་ཟད།     ལོ་འཁོར་གཅིག་རིང་རྒྱལ་བའི་བཀའ་དགོངས་དང་འབྲེལ་བའི་བཀའ་དྲིན་རྗེས་དྲན་གྱི་བྱེད་སྒོ་མང་དག་ཅིག་སྤེལ་ཡོད་པའི་སྙན་ཐོ་དང་འབྲེལ་དཔེ་དེབ་གཉིས་ཙམ་སྤྱན་འབུལ་གནང་གི་ཡོད་སྐོར་སོགས་བཀའ་དྲིན་རྗེས་དྲན་ཚོགས་ཆུང་གི་ཚོགས་གཞོན་དགེ་ལུགས་སྤྱི་འཐུས་ཨ་ཀྲུག་ཚེ་བརྟན་གྱིས་འགྲེལ་བརྗོད་གནང་སོང་།།
ལྷོ་ཕྱོགས་གསར་འགོད་པ་ཐུབ་བསྟན་བཀྲིས།