༧གོང་ས་མཆོག་གིས་ཁེ་ན་ཌའི་སྲིད་བློན་ལ་འཚམས་འདྲིའི་གསུང་འཕྲིན་གནང་འདུག
ཟླ་འདིའི་ཚེས་༢༢ ཉིན་ཁེ་ན་ཌའི་རྒྱལ་ཡོངས་འོས་བསྡུ་ཆེན་མོའི་མཇུག་འབྲས་ཐོན་ནས་གུ་ཡངས་ཆབ་སྲིད་ཚོགས་པའི་ཚོགས་གཙོ་དང་སྲིད་བློན་ལས་ཐོག་སྐུ་ཞབས་Justin Trudeau ལ་རྒྱལ་ཁ་ཐོབ་པས། ༧སྐྱབས་མགོན་ཆེན་པོ་མཆོག་གིས་སྲིད་བློན་ཁོང་ལ་འཚམས་འདྲིའི་གསུང་འཕྲིན་གནང་འདུག
ཟླ་འདིའི་ཚེས་༢༢ ཉིན་ཁེ་ན་ཌའི་རྒྱལ་ཡོངས་འོས་བསྡུ་ཆེན་མོའི་མཇུག་འབྲས་ཐོན་ནས་གུ་ཡངས་ཆབ་སྲིད་ཚོགས་པའི་ཚོགས་གཙོ་དང་སྲིད་བློན་ལས་ཐོག་སྐུ་ཞབས་Justin Trudeau ལ་རྒྱལ་ཁ་ཐོབ་པས། ༧སྐྱབས་མགོན་ཆེན་པོ་མཆོག་གིས་སྲིད་བློན་ཁོང་ལ་འཚམས་འདྲིའི་གསུང་འཕྲིན་གནང་འདུག
གསུང་འཕྲིན་དེའི་ནང་ཁོང་གིས་“ངོས་ཀྱིས་གོ་སྐབས་འདི་བརྒྱུད་དེ་འཁྲུག་རྩོད་ཡོད་སའི་འཛམ་གླིང་ས་ཁུལ་ཁག་ནས་བསམ་ཡུལ་ལས་འདས་པའི་དཀའ་སྡུག་མྱངས་ཏེ་བྲོས་བྱོལ་དུ་ཡོང་བ་རྣམས་ལ་སྙིང་རྗེས་ཀུན་ནས་བསླངས་ཏེ་ཡུལ་མིའི་ཐོབ་ཐང་གནང་བའི་ཁེ་ན་ཌའི་སྲིད་གཞུང་གི་སྲིད་བྱུས་དེར་ཡི་རངས་བསྔགས་བརྗོད་ཞུ་རྒྱུ་ཡིན། ངོས་རང་ཉིད་ཀྱང་ཁེ་ན་ཌའི་ཆེ་བསྟོད་མི་སེར་ཞིག་ཡིན་པའི་ཆ་ནས། ཁེ་ན་ཌའི་སྲིད་གཞུང་གི་གཏོང་ཕོད་དང་བཟང་སྤྱོད་ཀྱི་གནང་སྟངས་དེར་དགའ་སྤོབས་སྐྱེ་བཞིན་ཡོད་”ཅེས་གསུངས་ནས་ཁེ་ན་ཌའི་སྐྱབས་བཅོལ་སྲིད་བྱུས་ལ་བསྔགས་བརྗོད་གནང་འདུག
གཞན་ཡང་ཁོང་གིས་གོ་སྐབས་དེ་བརྒྱུད་དེ་ཁེ་ན་ཌའི་གཞུང་མང་གཉིས་ལ་ཁོང་སྐུ་སྒེར་དང་བོད་མི་སྐྱབས་བཅོལ་བའི་ངོས་ནས་ཐུགས་རྗེ་ལེགས་གསོལ་གནང་དོན། “དེ་སྔ་ངོས་རང་ཁེ་ན་ཌར་ཐེངས་མང་སྐྱོད་སྐབས། ཡུལ་མི་ཚོས་མཛའ་བརྩེའི་རྣམ་འགྱུར་བསྟན་པ་དེས་སེམས་འགུལ་ཆེན་པོ་ཐེབས་བྱུང་ལ། ཕྱི་ལོ་༡༩༧༠ ལོ་འགོ་ཙམ་ནས་ཁེ་ན་ཌའི་གཞུང་གིས་འགན་ཁུར་རྐང་བཞེས་ཐོག་བོད་མི་བཙན་བྱོལ་བ་ཁག་ཅིག་སྐྱབས་བཅོལ་དུ་བཞེས་ཡོད་སྟབས་ངོས་ཀྱིས་ཁེ་ན་ཌའི་གཞུང་མང་གཉིས་ལ་གོ་སྐབས་འདི་བརྒྱུད་དེ་ཐུགས་རྗེ་ཆེ་ཞུ་རྒྱུ་ཡིན། བོད་མི་དེ་དག་གིས་མི་རིགས་དང་རིག་གཞུང་སྣ་མང་འདུས་པའི་ཁེ་ན་ཌའི་རྒྱལ་ཁབ་ཀྱི་བདེ་དོན་ཐོག་ཞབས་འདེགས་མི་ཆུང་བ་ཞིག་བསྒྲུབས་དང་སྒྲུབ་མུས་ཡོད་པ་དེར་ངོས་དགའ་སྤོབས་སྐྱེ་བཞིན་ཡོད།”ཅེས་སྲིད་བློན་གྱི་ལས་ཡུན་རིང་ལས་དོན་མཐའ་དག་ལམ་ལྷོང་ཡོང་བ་དང་། ཁེ་ན་ཌའི་མི་མང་གི་མངོན་འདོད་རྣམས་འགེགས་མེད་ལྷུན་འགྲུབ་ཡོང་བའི་ཐུགས་སྨོན་གནང་ཡོད་པ་རེད།།
གསར་འགོད་པ་དཀོན་མཆོག་རབ་བརྟན།
