༧གོང་ས་མཆོག་གིས་བྷི་བྷི་སི་གསར་ཁང་གི་གསར་འགོད་པར་བཀའ་ལན་གནང་།

ཉེ་བའི་ཆར་རྒྱལ་སྤྱིའི་གསར་ཁང་ཞིག་གི་བཅར་འདྲི་ལ། ༧གོང་ས་མཆོག་གིས་ཨ་རིའི་སྲིད་འཛིན་ཌོ་ནལ་ཊོམ་ལ་བཟང་སྤྱོད་མེད་པ་དགོངས་ཀྱི་ཡོད་པ་དང་། ཁོང་བོད་ལ་ཕྱིར་ཕེབསརྒྱུའི་རེ་བ་ཆད་མེད་སྐོར་གསུངས་འདུག

ཟླ་༦ པའི་ཚེས་༢༧ ཉིན་བྷི་བྷི་སི་གསར་ཁང་གི་གསར་འགོད་པ་ཞིག་གིས། ༧གོང་ས་མཆོག་ལ་གནད་དོན་ཁག་ཅིག་ལ་བཅར་འདྲི་གནང་བའི་བརྙན་ཐུང་ཞིག་དྲ་ཐོག་ཏུ་བཀོད་འདུག

དེ་ཡང་ཐོག་མར་གསར་འགོད་པའི་ཨ་རིའི་སྲིད་འཛིན་ཊོམ་གྱི་ཐོག་ལ་གཟིགས་ཚུལ་གང་ཡོད་མེད་སྐོར་བཀའ་འདྲི་ཞུས་པར། ༧གོང་ས་མཆོག་གིས་སྲིད་འཛིན་ཊོམ་གྱི་སེམས་ཚོར་བརྟན་པོ་ཞེ་དྲག་མེད་པ་དང་། ཉིན་གཅིག་ལ་ཁོང་གིས་སྐད་ཆ་ཞིག་བརྗོད་ཀྱི་ཡོད་པ་དང་། ཉིན་གཞན་ཞིག་ལ་སྐད་ཆ་མི་འདྲ་བ་ཞིག་བརྗོད་ཀྱི་འདུག་པས། ངོས་ཀྱིས་བྱས་ན་ཁོང་ལ་བཟང་སྤྱོད་མེད་པ་རེད་བསམ་གྱི་འདུག ཁོང་ཐོག་མར་སྲིད་འཛིན་ཆགས་དུས་ཨ་རིའི་ཁེ་ཕན་དེ་གལ་ཆེ་ཤོས་ཡིན་པ་བརྗོད་ཡོད་པས། དེ་ནི་ནོར་འཁྲུལ་རེད། ཨ་རིས་རྒྱལ་སྤྱིའི་འགོ་ཁྲིད་ཀྱི་འགན་ཁུར་དགོས་པ་རེད་ཅེས་གསུངས་འདུག

དབྱིན་ཡུལ་ཡུ་རོབ་མཐུན་ཚོགས་ནས་ཕྱིར་འཐེན་སྐོར་ལ། ༧གོང་ས་མཆོག་གིས་ཁོང་ནི་ཡུ་རོབ་མཐུན་ཚོགས་ཀྱི་སྙོང་སྟོབས་ལ་ཡི་རངས་ཞུ་མཁན་ཞིག་ཡིན་པ་དང་། རང་ཉིད་གནད་དོན་དེའི་ཐད་ཕྱི་མི་ཞིག་རེད་དེ། དབྱིན་ཡུལ་ཡུ་རོབ་མཐུན་ཚོགས་ནང་མུ་མཐུད་གནས་ན་བཟང་བ་དགོངས་ཀྱི་ཡོད་སྐོར་གསུངས།

དེ་ནས་གསར་འགོད་པས་དབྱིན་ཡུལ་ཡུ་རོབ་མཐུན་ཚོགས་ནས་ཕྱིར་འཐེན་ལ་རྒྱབ་སྐྱོར་བྱེད་མཁན་ཚོས་ལས་འགུལ་སྤེལ་བའི་སྐབས་སུ་༧གོང་ས་མཆོག་གིས་བཀའ་སློབ་གཅིག་སྦྱར་ཡིག་ནང་བེད་སྤྱོད་བྱས་ཡོད་པ་དང་། དེའི་ནང་སྐྱབས་བཅོལ་བ་རྣམས་ཀྱིས་སོ་སོའི་ཡུལ་དུ་ལོག་ནས་བསྐྱར་གསོ་བྱེད་རྒྱུའི་དམིགས་ཡུལ་འཛིན་དགོས། དངོས་ཡོད་རྒྱུ་མཚན་ལ་བསམ་བློ་གཏོང་དགོས། མི་ཚང་མ་ཡོང་རྒྱུ་ནི་ཡོང་མི་སྲིད་པ་ཞིག་རེད་ཅེས་འཁོད་འདུག་ཅེས་དྲིས་སྐབས། ༧གོང་ས་མཆོག་གིས་ཡུ་རོབ་ཀྱིས་སྐྱབས་བཅོལ་བ་དེ་རྣམས་བླངས་ནས་ཤེས་ཡོན་སློབ་སྦྱོང་དང་སྦྱོང་བརྡར་སྤྲོད་དགོས་པ་དང་། དེའི་དམིགས་ཡུལ་ནི་ཕྱིས་སུ་ཁོང་ཚོ་རང་གི་ལུང་པ་ལ་ལོག་རྒྱུ་དེ་ཡིན་དགོས་ཞེས་གསུངས་འདུག

གསར་འགོད་པ་དེས་མུ་མཐུད་ནས་གལ་ཏེ་སྐྱབས་བཅོལ་བ་དེ་དག་ཡུ་རོབ་ནང་དུ་འཚོ་བ་བསྐྱལ་ནས་སྡོད་རྒྱུའི་འདོད་པ་ཡོད་ཚེ། ཁོ་ཚོ་སྡོད་འཇུག་དགོས་པ་མ་ཡིན་ནམ་ཞེས་དྲིས་པར། ༧གོང་ས་མཆོག་གིས་སྐྱབས་བཅོལ་བ་ཚད་བཀག་བཟོས་ཚེ་འགྲིག་གི་ཡོད་པ་དང་། ཡིན་ཡང་ཡུ་རོབ་ཆ་ཚང་ཁ་ཆེའམ་ཨ་ཧྥེ་རི་ཀའི་ལུང་པ་ཆགས་ན་ཡོང་ཐབས་མེད་པས། སྐྱབས་བཅོལ་བ་རྣམས་སོ་སོའི་ལུང་པར་བསྡད་ན་རང་ཉིད་སོ་སོ་ལ་ཡང་ཡག་བ་ཡོད་པས། ཡུ་རོབ་དེ་ཡུ་རོབ་མི་རྣམས་ཀྱི་ཆེད་དུ་བཞག་ན་བཟང་བ་ཡོད་སྐོར་གསུངས་འདུག

བོད་དང་འབྲེལ་བའི་ཐོག་ལ་བཅར་འདྲིའི་སྐབས་གསར་འགོད་པ་དེས་༧གོང་ས་མཆོག་གིས་བོད་ལ་ཕྱིར་ཕེབས་རྒྱུའི་རེ་བ་བློས་བཏང་ཡོད་མེད་སྐོར་དྲིས་སྐབས། ༧གོང་ས་མཆོག་ནས་བོད་དུ་ཕྱིར་ཕེབས་རྒྱུའི་རེ་བ་མུ་མཐུད་བཅང་བཞིན་ཡོད་པ་དང་། བོད་མི་རྣམས་ཀྱིས་ཁོང་ལ་རེ་བ་དང་ཡིད་ཆེས་ཆེན་པོ་བྱེད་ཀྱི་ཡོད་ཁར། ཁོང་ལ་བོད་ལ་ཕེབས་རྒྱུ་ངང་སྒུག་བྱེད་བཞིན་ཡོད། མི་རྒན་པ་མང་པོ་ཞིག་གིས་མིག་ཆུ་གཏོང་བཞིན་ཁོང་བོད་ལ་ཕེབས་རོགས་ཞེས་འབོད་སྐུལ་གནང་ཡོད་སྐོར་གསུངས།

གསར་འགོད་པས་༧གོང་ས་མཆོག་བོད་ལ་ཕེབས་ཐུབ་རྒྱུ་ཞིག་གང་འདྲ་ཡོང་རྒྱུ་ཡིན་སྐོར་དྲིས་པས། ཁོང་གིས་ད་ལྟ་རྒྱ་ནག་འགྱུར་བ་འགྲོ་བཞིན་ཡོད་སྐོར་གསུངས་འདུག

རྒྱ་ནག་དང་འབྲེལ་ནས་གསར་འགོད་པས་༧གོང་ས་མཆོག་དང་རྒྱ་ནག་གི་དཔོན་རིགས་དང་འབྲེལ་བ་བྱུང་ཡོད་མེད་དྲིས་པར། ཁོང་གིས་གསང་བའི་ཐོག་ནས་རྒྱ་ནག་གཞུང་དང་འབྲེལ་བ་ཡོད་མཁན་རྒན་ཡོལ་ཕྱིན་པའི་དཔོན་རིགས་དང་དེ་བཞིན་ཤེས་ཡོན་པ་ཁག་ཅིག་དང་འབྲེལ་བ་བྱུང་སྐོར་གསུངས། དེ་ནས་སྲིད་འཛིན་ཞི་ཅིན་ཕིང་གིས་ཁོང་དང་ཐུག་འཕྲད་བྱེད་ཆེད་འབྲེལ་བ་བྱུང་ཡོད་མེད་སྐོར་དྲིས་པར། ༧གོང་ས་མཆོག་གིས་ད་ལྟ་བར་དེ་ལྟར་བྱུང་མེད་སྐོར་གསུངས་འདུག རྒྱ་ནག་གི་དབང་ཤུགས་ཆེ་རུ་འགྲོ་བཞིན་པ་དེས། ཁོང་གི་ཤུགས་རྐྱེན་དང་བོད་དོན་ལ་ཤུགས་རྐྱེན་འགྲོ་ཡི་ཡོད་པར་གཟིགས་ཀྱི་ཡོད་མེད་དྲིས་པར། ཁོང་གིས་རྒྱ་ནག་གི་དབང་ཤུགས་ཆེ་རུ་འགྲོ་བཞིན་པ་དེར་སེམས་ཁྲལ་མེད་པ་དང་། རྒྱ་ནག་མི་མང་ནང་བསམ་བློ་འགྱུར་བ་ཆེན་པོ་འགྲོ་བཞིན་ཡོད་སྐོར་གསུངས་འདུག

མཐའ་མར་གསར་འགོད་པ་དེས་དེ་སྔོན་༧གོང་ས་མཆོག་གིས་ཡང་སྲིད་བུད་མེད་གཅིག་ཡོང་སྲིད་པ་དང་། གལ་ཏེ་དེ་ལྟར་བྱུང་ཚེ་བུད་མེད་དེ་ཡིད་དབང་འཕྲོག་པོ་ཞིག་དགོས་སྐོར་གསུངས་ནས། བུད་མེད་མང་པོ་ཞིག་བཀའ་མོལ་དེར་བློ་ཕམ་བྱུང་ཡོད་པའི་སྐོར་དྲིས་པར། ༧གོང་ས་མཆོག་གིས་བུད་མེད་ཡང་སྲིད་གཅིག་ཡོང་སྲིད་པ་དང་། བུད་མེད་དེ་ཡིད་འཕྲོག་པོ་ཞིག་དགོས་སྐོར་གྱི་བཀའ་མོལ་དེ་ཐེངས་གཅིག་གསུངས་ཡོད་པ་དང་། དེ་ཡང་ཁོང་གིས་བྱས་ན་གལ་ཏེ་བུད་མེད་ཏཱ་ལའི་བླ་མ་དེ་ཡིད་དབང་འཕྲོག་པོ་ཞིག་མེད་ཚེ། མི་ཚོས་ཐུག་འཕྲད་བྱེད་འདོད་ཡོང་མི་སྲིད་ཅེས་བཞད་གད་དང་སྦྲགས་ནས་ལན་འདེབས་གནང་དུས། གསར་འགོད་པ་དེས་གཙོ་བོ་དེ་ནང་གི་ཡོན་ཏན་དེ་གལ་ཆེན་མིན་ནམ་ཞེས་དྲིས་པར། ༧གོང་ས་མཆོག་གིས་རེད། གཉིས་ཀ་གལ་ཆེན་རེད་ཅེས་གསུངས་འདུག །

གསར་འགོད་པ་སྐལ་བཟང་དོན་གྲུབ།