༧གོང་ས་མཆོག་གིས་མེཀ་སི་ཀོའི་འདེམས་ཐོན་སྲིད་འཛིན་ལ་འཚམས་འཕྲིན་གནང་། 

ཟླ་འདིའི་ཚེས་༡༤ ཉིན་དགའ་ལྡན་ཕོ་བྲང་གི་དྲྭ་བའི་ཐོག་གནས་ཚུལ་སྤེལ་གསལ་ལྟར་ན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྕམ་སྐུ་ཀ་ལོ་ཌི་ཡ་ཤིན་བོམ་ (Claudia Sheinbaum) མཆོག་མེཀ་སི་ཀོ་རྒྱལ་ཁབ་ཀྱི་སྲིད་འཛིན་ལ་འོས་འདེམས་བྱུང་བའི་བུད་མེད་ཐོག་མ་ཡིན་པར་འཚམས་འཕྲིན་གནང་འདུག 

འཚམས་འཕྲིན་ནང་དུ་མགོན་པོ་གང་གིས་བུད་མེད་ཚོས་གཞན་གྱི་ཚོར་བ་ལ་གདུང་སེམས་མཉམ་སྐྱེད་དང་ཚོར་ཤེས་སྐྱེན་པོ་བྱེད་ཐུབ་ཀྱི་ཡོད་པ་ཡིད་ཆེས་གནང་གི་ཡོད་པ་དང་།ཁོང་གིས་ཁྱད་ཆོས་དེ་དག་ཐོག་མར་མ་ཡུམ་སར་ནས་སྦྱངས་པ་ཡིན་སྐོར། དེ་བཞིན་བུད་མེད་རྣམས་སྙིང་རྗེ་ཆེ་བ་ཡོད་པ་ཚན་རིག་གི་བདེན་དཔང་ཡོད་པས། ཁོང་གིས་དུས་རྟག་ཏུ་བུད་མེད་འགོ་ཁྲིད་ལ་རྒྱབ་སྐྱོར་གནང་གི་ཡོད་པ་སོགས་པ་དང་། གཞན་ཡང་ང་ཚོའི་འགོ་ཁྲིད་ཀྱི་ཁྲོད་དུ་བུད་མེད་མང་ཙམ་ཡོད་ན་འཛམ་གླིང་འདི་སྔར་ལས་བསམ་ཤེས་དང་། ཞི་བདེ་ལྡན་པ་ཞིག་ཏུ་འགྱུར་ངེས་ཡིན་པ་ཁོང་ལ་ཡིད་ཆེས་བརྟན་པོ་ཡོད་པ། འགྲོ་བ་མིའི་ལོ་རྒྱུས་ཀྱི་ནང་དུ་དམག་དཔོན་མང་ཤོས་རྣམས་སྐྱེས་པ་ཡིན་པ་དང་། བུད་མེད་ཚོས་རྒྱུན་དུ་གཞན་གྱི་སྡུག་བསྔལ་ལ་སེམས་ཁུར་དང་བྱམས་བརྩེ་སྟོན་གྱི་ཡོད་སྐོར་དང་།
མགོན་པོ་གང་ཉིད་མེཀ་སི་ཀོ་རྒྱལ་ཁབ་ཏུ་ཕེབས་སྐབས་མི་མང་གི་ངོས་ནས་ཁོང་གི་གཞི་རྩའི་འགྲོ་བ་མིའི་རིན་ཐང་དང་། བྱམས་སྙིང་རྗེ། ཆོས་ལུགས་མཐུན་སྒྲིལ་སོགས་ཀྱི་ཐོག་འབད་བརྩོན་གནང་བ་དེར་དོ་སྣང་དང་རྒྱབ་སྐྱོར་གནང་བར་ཁོང་ལ་སེམས་ཤུགས་བསྐྱེད་ཡོད་པ་སོགས་གསུངས་འདུག་ལ། དེ་བཞིན་ཁོང་མོ་ལ་མེཀ་སི་ཁོ་དང་། འཛམ་གླིང་གི་བདེ་སྐྱིད་གོང་དུ་སྤེལ་བའི་སླད་དུ་དཀའ་ངལ་སོགས་ལ་གདོང་ལེན་ཇི་བཞིན་ཐུབ་པར་མགོན་པོ་གང་གིས་ཐུགས་སྨོན་གནང་འདུག།
གསར་འགོད་པ། བསྟན་འཛིན་ལམ་བཟང་།