༧གོང་ས་མཆོག་གིས་ཚོང་ལས་འགོ་ཁྲིད་པར་བཀའ་སློབ་གནང་།

ཟླ་འདིའི་ཚེས་༦ ཉིན་༸གོང་ས་མཆོག་གིས་དྷ་ས་བཞུགས་སྒར་༸རྒྱལ་བའི་ཕོ་བྲང་དུ་རྒྱ་གར་དང་། ཝེ་ཏི་ནམ། ཨུ་རུ་སུ་བཅས་ཀྱི་ཚོང་ལས་འགོ་ཁྲིད་དང་ཁྱད་ལས་པ་གྲངས་༩༨ ལ་བཀའ་སློབ་བསྩལ་ཡོད་པ་རེད།

སྐབས་དེར་༧གོང་ས་མཆོག་གིས་བཀའ་སློབ་གནང་དོན། “ང་ཚོ་མི་ཚེའི་ནང་དོན་དམ་པའི་དགོས་དམིགས་གཙོ་བོ་ནི། གཞན་ལ་ཞབས་འདེགས་གང་ཐུབ་བསྒྲུབ་རྒྱུ་དེ་ཡིན། ངོས་ཀྱིས་ཉིན་རེའི་ཉམས་ལེན་ནང་ལུས་ངག་ཡིད་གསུམ་གཞན་གྱི་བདེ་སྡུག་གི་ཆེད་དུ་བློས་གཏོང་བྱེད་ཀྱི་ཡོད། ཆོས་ཀྱི་དོན་ངོ་མ་དེ་རེད་ལ། རྒྱ་གར་གནའ་རབས་ཀྱི་ལེགས་བཤད་འཚེ་བ་མེད་པ་དང་སྙིང་རྗེ་ཡང་དེ་རེད།  ངོས་རང་རྒྱ་གར་གནའ་རབས་ཀྱི་ལེགས་བཤད་ལ་སློབ་སྦྱོང་བྱེད་མཁན་གྱི་སློབ་མ་ཞིག་ཡིན། ཆུང་བྱིས་པའི་སྐབས་ནས་ངོས་ཀྱིས་རྒྱ་གར་གནའ་རབས་དཔལ་ན་ལེནྡྲ་ནས་བོད་ལ་དར་བའི་ནང་པའི་གཞུང་གི་རྩ་བ་དེ་དག་བློར་བཟུང་པ་ཡིན། དེ་ནས་གཞུང་གི་རྩ་བ་ཚིག་འབྲུ་རེ་རེ་བཞིན་རིགས་ལམ་ཐོག་ནས་འགྲེལ་བཤད་བརྒྱབ་ནས་སྦྱངས་པ་ཡིན་ ཞེས་བཀའ་སློབ་གནང་བ་དང་།

ངོས་ཀྱིས་རྒྱ་གར་གྲོགས་པོ་ཚོར་དྲན་སྐུལ་གྱི་ཚུལ་དུ་ཞུ་རྒྱུ་ཞིག་ལ། ཁྱེད་ཚོས་རྒྱ་གར་གནའ་རབས་ཀྱི་ལེགས་བཤད་ཚད་མ་རིག་པ་སྦྱོངས་རོགས། དེ་ནི་དངོས་གནས་ཧ་ལས་པ་རེད། ངོས་རང་དཔལ་ན་ལེནྡྲའི་ལེགས་བཤད་སྦྱོང་མཁན་སློབ་མ་ཞིག་ཡིན་པའི་ངོས་ནས་བཤད་ན། སེམས་ཞི་ཞིང་དུལ་བ་ཡོང་བར་དཔལ་ན་ལེནྡྲའི་ལེགས་བཤད་དེ་དག་དངོས་གནས་དྲང་གནས་ཕན་ཐོགས་པོ་འདུག་”ཅེས་བཀའ་སློབ་བསྩལ་རྗེས། མཇལ་བཅར་བ་ཁག་གཅིག་གི་དྲི་བར་བཀའ་ལན་གནང་ཡོད་པ་རེད། དེ་བཞིན་༧གོང་ས་མཆོག་གིས་རྒྱ་གར་བ་ཚོར་རང་གི་གནའ་རབས་ཀྱི་ལེགས་བཤད་དེ་དག་བསྐྱར་གསོ་གནང་ཐུབ་དགོས་པ་དང་། ལྷག་པར་རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དེ་དག་དེང་རབས་ཤེས་ཡོན་སྡེ་ཚན་ཁོངས་སུ་འཇོག་དགོས་སྐོར་བཀའ་སློབ་བསྩལ་བ་མ་ཟད། རྒྱ་གར་འཕགས་ཡུལ་འདི་ཉིད་གནའ་དེང་ཟུང་འབྲེལ་གྱི་ཤེས་ཡོན་སློབ་སྦྱོང་བྱེད་ཡུལ་ཞིག་ཏུ་འགྱུར་ཐུབ་རྒྱུ་ཡིན་པ་དང་། དེ་ལྟར་རྒྱ་གར་མ་གཏོགས་རྒྱལ་ཁབ་གཞན་གྱིས་དེ་ལྟར་བྱེད་ཐུབ་རྒྱུ་ཁག་པོ་ཡིན་སྐོར། ཝི་ཏི་ནམ་ལ་མཚོན་ན་ལོ་རྒྱུས་ཐོག་ནས་ནང་པ་ཡིན་པ་དང་། ཨུ་རུ་སུའི་ནང་པ་ཚོ་བོད་དང་དཔལ་ན་ལེནྡྲའི་སྲོལ་རྒྱུན་རིག་གནས་དང་འབྲེལ་བ་ཤུགས་ཆེན་པོ་ཡོད་སྐོར་གྱི་བཀའ་སློབ་བསྩལ།།

གསར་འགོད་པ་ཆོས་ཉིད་འོད་ཟེར།