༧གོང་ས་མཆོག་གིས་ཡུ་རོབ་གྲོས་ཚོགས་དང་ལྷན་ཚོགས་ཀྱི་ཚོགས་གཙོ་གཉིས་ལ་འཚམས་འདྲི་གནང་།

ཕྱི་ཟླ་༧ ཚེས་༢༢ ༧གོང་ས་༧སྐྱབས་མགོན་ཆེན་པོ་མཆོག་གིས་ལྕམ་རོ་བྷར་ཊ་མེཊ་སོ་ལ་དང་ལྕམ་ཨུར་སུ་ལ་ཝོན་ཊེར་ལེ་ཡེན་རྣམ་གཉིས་ཡུ་རོབ་གྲོས་ཚོགས་ཀྱི་ཚོགས་གཙོ་དང་ཡུ་རོབ་ལྷན་ཚོགས་ཀྱི་ཚོགས་གཙོར་བསྐྱར་འདེམས་བྱུང་བར་འཚམས་འདྲིའི་འཕྲིན་ཡིག་གནང་འདུག

འཚམས་འཕྲིན་གྱི་ནང་དུ། ཡུ་རོབ་མཐུན་ཚོགས་ཀྱིས་འདས་པའི་ལོ་ངོ་དྲུག་ཅུ་ལྷག་གི་རིང་ཚོགས་མི་རྒྱལ་ཁབ་ཁག་དང་ས་ཁུལ་ནང་ཞི་བདེ་རྒྱུན་སྐྱོང་བྱས་ཡོད་པ་དང་། འཛམ་གླིང་དམག་ཆེན་གཉིས་པའི་རྗེས་སུ་བྱུང་བའི་འབྲེལ་ལམ་བསྐྱར་གསོ་དང་མཉམ་ལས་ཀྱི་དགོངས་པའི་ཐོག་ནས། ཡུ་རོབ་མཐུན་ཚོགས་ཀྱིས་རྒྱལ་ཁབ་སོ་སོའི་ས་གནས་ཀྱི་ཁེ་ཕན་ལས་སྤྱིའི་བདེ་དོན་གལ་ཆེ་བར་བརྩིས་ཡོད། འདིས་འཛམ་གླིང་ཕན་ཚུན་གཅིག་ལ་གཅིག་བརྟེན་དང་དཀའ་ངལ་ཅན་དུ་གྱུར་པའི་ནང་། ཤེས་རབ་དང་བློ་གྲོས་ནར་སོན་པ་མཚོན་གྱི་ཡོད་པར་གསུངས་པ་དང་། 
གཞན་ཡང་མགོན་པོ་གང་གིས་ཡུ་རོབ་མཐུན་ཚོགས་དེ་གཞན་གྱི་མིག་དཔེར་འོས་པའི་སྟོབས་ཆེན་གྱི་དཔེ་མཚོན་མུ་མཐུད་དུ་གནས་ཐུབ་ཆེད། ཁོང་གཉིས་ཀྱི་བྱ་བར་ལམ་ལྷོང་ཡོང་བའི་ཐུགས་སྨོན་གནང་འདུག།