༧གོང་ས་མཆོག་ཉི་ཧོང་དུ་ཆིབས་བསྒྱུར།

ཐེངས་འདིར་༧གོང་ས་མཆོག་གིས་ལྡི་ལི་དང་ཉི་ཧོང་ཁུལ་དུ་བདུན་ཕྲག་གཅིག་ལྷག་ གི་རིང་འཚོགས་འདུའི་ཐོག་བཀའ་སློབ་དང་། དེ་བཞིན་ཤེས་ཡོན་མི་སྣར་ཐུག་འཕྲད་ཀྱིས་དུས་རབས་ཉེར་གཅིག་པའི་ནང་ཞི་བདེའི་ ཁོར་ཡུག་སྐྲུན་ཐབས་ཞེས་པ་སོགས་བརྗོད་གཞི་ཁག་ཅིག་གི་ཐོག་གསུང་བཤད་གནང་རྒྱུ་ ཡིན་པ་རེད་འདུག

དེ་ཡང་ཟླ་འདིའི་ཕྱི་ཚེས་༡༣ ཉིན་༧གོང་ས་མཆོག་བཞུགས་སྒར་ནས་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིར་ ཆིབས་བསྒྱུར་གྱིས། ལྡི་ལི་བོད་ཁང་དང་། Indira Gandhi སྒྱུ་རྩལ་གློག་བརྙན་ལྟེ་གནས་ཁང་གཉིས་ཀྱི་གོ་སྒྲིག་འོག ༧གོང་ས་མཆོག་གིས་ཨེ་ཤ་ཡའི་ནང་དཔལ་ཎཱ་ལེནྜའི་ནང་པའི་ཆོས་བརྒྱུད་ཅེས་པའི་ བརྗོད་གཞིའི་ཐོག་གསུང་བཤད་གནང་རྒྱུ་ཡིན་པ་དང་། ཕྱི་ཚེས་༡༧ ཉིན་ཉི་ཧོང་དུ་ཆིབས་བསྒྱུར་གྱིས་ཚན་རིག་པ་ཁག་ཅིག་དང་མཉམ་ཤེས་ཡོན་དང་མི་ཚེ་ ཞེས་པའི་བརྗོད་གཞིའི་ཐོག་བགྲོ་གླེང་གནང་རྒྱུ་ཡིན་འདུག་ལ། ཕྱི་ཚེས་༢༡ ཉིན་ཤི་ཛུ་ཀ་ཁུལ་དུ་དུས་རབས་ཉེར་གཅིག་པའི་ནང་ཞི་བདེའི་ཁོར་ཡུག་སྐྲུན་ཐབས་ ཞེས་པའི་བརྗོད་གཞིའི་ཐོག་མང་ཚོགས་ལ་གསུང་བཤད་གནང་རྒྱུ་དང་། ཕྱི་ཚེས་༢༣ ཉིན་ཀྱུ་ཏོ་གཙུག་ལག་སློབ་གཉེར་ཁང་དུ་སྒྱུ་རྩལ་དང་རིག་གཞུང་གི་སྐོར་ལ་གསུང་ བཤད་གནང་རྒྱུ་བཅས་ཀྱི་མཛད་འཆར་ཁག་ཅིག་བསྐྱང་འཆར་ཡོད་འདུག

དེ་བཞིན་ཕྱི་ཟླ་༡༢ པའི་ཚེས་༢༥ ནས་ཕྱི་ལོ་༢༠༡༤ ཟླ་༡ ཚེས་༣ བར་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་དུ། མུ་མཐུད་ལམ་རིམ་ཁྲི་ཆེན་བརྒྱད་ཀྱི་ཆོས་འབྲེལ་གནང་རྒྱུ་ཡིན་སྐོར་དགའ་ལྡན་ཕོ་ བྲང་ཡིག་ཚང་གིས་གནས་ཚུལ་སྤེལ་འདུག