༧གོང་ས་མཆོག་དགུང་གྲངས་༨༧ཕེབས་པའི་༧སྐུའི་འཁྲུངས་སྐར་སྲུང་བརྩི།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་གོང་ས་སྐྱབས་མགོན་ཆེན་མོ་མཆོག་དགོང་གྲངས་༨༧ ཕེབས་པའི་སྐུའི་འཁྲུངས་སྐར་གྱི་གཞུང་འབྲེལ་མཛད་སྒོ་དེ་བཞུགས་སྒར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་སྲུང་བརྩི་ཞུས་སོང་།

སྐབས་དེར་མཛད་སྒོའི་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཇཱ་རམ་ཐཱ་ཀོ་(Jai Ram Thaku) ཕེབས་འཆར་ཡོད་ན་ཡང་གནམ་གཤིས་ཀྱི་རྐྱེན་གྱིས་མཛད་སྒོ་ཐོག་དངོས་སུ་ཕེབས་ཐུབ་མེད་པ་དང་ཁོང་གིས་དྲ་ལམ་བརྒྱུད་ནས་གསུང་བཤད་གནང་སོང་། མཛད་སྒོའི་སྐུ་མགྲོན་དུ་ཡང་ཧི་མ་ཅལ་མངའ་སྡེའི་ཤིང་ནགས་བློན་ཆེན་ར་ཀེ་ཤི་(Rakesh Pathania) དང་དམིགས་བསལ་སྐུ་མགྲོན་ཨ་རིའི་གློག་བརྙན་འཁྲབ་སྟོན་པ་གྲགས་ཅན་རི་ཆ་ཊི་གྷེར། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་དགའ་ལྡན་ཁྲི་རིན་པོ་ཆེ་གཙོས་པའི་སེར་སྐྱ་མི་མང་མཉམ་ཞུགས་བྱས་འདུག

ཐེངས་འདི་མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་གིས་བཀའ་ཤག་གི་གསུང་བཤད་སྒྲོགས་སྦྱང་བྱས་པའི་ནང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོའི་འཁྲུངས་ལྷ་དབྱར་གསོལ་གྱི་དུས་ཆེན་སྲུང་བརྩི་ཞུ་སྐབས། རང་ཅག་བཙན་བྱོལ་བ་རྣམས་ལ་༸མགོན་པོ་མཆོག་གིས་བཀའ་དྲིན་མཐའ་ཡས་པ་བསྐྱངས་པའི་རྣམ་ཐར་གྱི་ཆ་ཕྲ་མོ་ཙམ་ཤེས་དགོས་པ་གལ་ཆེན་པོ་ཡིན་ཞིང་། དྲིན་ཤེས་ན་དྲིན་དྲན་ཐུབ་པ་དང་། དྲིན་དྲན་པ་ཡིན་ན་དྲིན་ཆེན་ལ་དྲིན་ལོག་མི་བྱེད་པའི་ཡ་རབས་ཀྱི་སྤྱོད་པ་བསྟེན་ཐུབ་པའི་ཁར། དྲིན་འཇལ་བའི་ཐབས་ཚུལ་ཡག་ཤོས་ཏེ། བླ་མའི་ལུགས་ཟུང་བཀའ་སློབ་བསླབ་བྱ་ཚུལ་བཞིན་ཉམས་སུ་བླངས་པའི་སྒོ་ནས་མི་ཚེ་དོན་ལྡན་སྐྱེལ་བར་མངོན་དུ་ཕྱོགས་ཐུབ་པ་ཡིན་ཞེས་གསུངས་འདུག

བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་སྒྲོགས་སྦྱང་བྱས་པའི་ནང་དུ། དེ་རིང་གི་ཉིན་མོར། གཞིས་བཞུགས་རང་རིགས་སྤུན་ཟླ་རྣམ་པ་དང་། འཛམ་གླིང་ཡུལ་གྲུ་གང་སར་གནས་པའི་བོད་མིས་གཙོས་ཞི་བདེ་ལ་དགའ་བའི་འཛམ་གླིང་མི་མང་ཡོངས་ཀྱིས། དགའ་དད་སྤྲོ་གསུམ་ངང་སྐུའི་འཁྲུངས་སྐར་སྲུང་བརྩི་ཞུ་བའི་ལམ་ནས་མགོན་པོ་གང་ཉིད་ཀྱི་ཡོངས་གྲགས་ཐུགས་བསྐྱེད་མཛད་འགན་བཞི་དང་། དུས་རྟག་ཏུ་འཛམ་གླིང་ཀུན་ཁྱབ་མཛད་འཕྲིན་རྣམས་ཀྱི་བཀའ་དྲིན་རྗེས་སུ་དྲན་ཞིང་། ཡ་རབས་བཟང་སྤྱོད་དང་བྱམས་བརྩེ་ལྡན་པའི་བོད་མི་ཞིག་ཡོང་ཐབས་ཆེད་ཉམས་ལེན་ཞུ་རྒྱུའི་དམ་བཅའ་བསྐྱར་ནན་ཞུ་རྒྱུ་ནི་༧སྐུའི་འཁྲུངས་སྐར་སྲུང་བརྩི་ཞུ་རྒྱུའི་དགོས་དོན་སྙིང་པོ་དེ་ཆགས་ཡོད་པས་བོད་མི་ཡོངས་ཀྱི་ཉིན་རེའི་འཚོ་བའི་ནང་ལག་བསྟར་ཉམས་ལེན་དགོས་པའི་འབོད་སྐུལ་ནན་པོ་ཞུ་རྒྱུ་ཡིན་སྐོར་གསུངས་སོང་།

ཐེངས་འདི་མཛད་སྒོའི་ཐོག་ཏུ་ཧི་མ་ཅལ་མངའ་སྡེའི་ཤིང་ནགས་བློན་ཆེན་གྱིས་༧གོང་ས་མཆོག་ལ་བརྟེན་ནས་ཧི་མ་ཅལ་ནི་འཛམ་གླིང་ཐོག་ཡུལ་སྐོར་སྤྲོ་འཆམ་འགྲོ་སའི་ས་ཁྲིའི་ཐོག་ཏུ་བཀོད་ཡོད་པས་ཧི་མ་ཅལ་མངའ་སྡེ་དང་མི་མང་ལ་མཚོན་ན་དེ་རིང་གི་ཉིན་མོ་དེ་ནི་གལ་འགངས་ཆེ་བའི་ཉིན་ཞིག་ཡིན་པ་དང། གོང་ས་མཆོག་ལ་ནོར་བྷེ་ཞི་བའི་གཟེངས་རྟགས་ཐོབ་ཡོད་པ་དེ་ཡང་འཛམ་གླིང་ཞི་བདེ་དང་ཆིག་སྒྲིག་ལ་དགའ་མཁན་ཀུན་གྱི་རྒྱལ་ཁ་ཞིག་ཡིན་པའི་སྐོར་དང། ང་ཚོ་ནམ་ཡང་ཁྱེད་ཚོའི་རང་བཙན་འཐབ་རྩོད་ཀྱི་བརྒྱབ་ཏུ་ཡོད་ཅིང་མ་འོངས་པ་ཡང་དེ་བཞིན་བརྒྱབ་སྐྱོར་ཡོད་སྐོར་གྱི་གསུང་བཤད་གནང་སོང་།

དེ་བཞིན་དམིགས་བསལ་སྐུ་མགོན་རི་ཆ་ཊི་གྷེར་གྱིས་ཀྱང་༧གོང་ས་མཆོག་ནི་བོད་མི་ཞིག་ཡིན་པ་དང་ཁོང་ཉིད་དུས་སྐབས་དེ་འདྲ་ཞིག་ལ་ཕེབས་ཡོད་པ་དེར་བོད་མི་ཚོས་སྤོབས་པ་བྱེད་འོས་པ་ཞིག་ཡིན་པའི་སྐོར་དང་། བོད་མི་ཚོས་ཡོད་ཚད་༧གོང་ས་མཆོག་ལ་སྐྱབས་མི་བཅོལ་པར་ཚང་མས་འཐབ་རྩོད་ཀྱི་འགན་ཁུར་དགོས་པ་དང་བོད་ལ་ཕུལ་བྱུང་གི་ལོ་རྒྱུས་ལྡན་པ་དང་ཕུལ་བྱུང་གི་རིག་གཞུང་ཡོད་པ་སོགས་ཀྱི་གསུང་བཤད་གནང་སོང་།

གཞན་ཡང་དེ་རིང་༧གོང་ས་མཆོག་གི་འཁྲུངས་སྐར་སྲུང་བརྩེའི་མཛད་སྒོ་ཐོག་སེར་སྐྱ་མི་མང་ཧ་ཅང་མང་པོ་ཕེབས་ཡོད་པ་མ་ཟད།ཚོགས་པ་ཁག་༢༠ ཡིས་གཞས་སྣ་འཁྲབ་སྟོན་གཟིགས་འབུལ་ཞུས་སོང་།།

གསར་འགོད་པ་བློ་བཟང་རྒྱ་མཚོ།