༧གོང་ས་མཆོག་དང་བོད་མིའི་མཛད་གཙོ་རྣམ་པས་ཧྥ་རན་སིའི་སྲིད་འཛིན་ལ་མཚམས་འདྲི་ཞུས་འདུག 

ཉེ་ཆར་ཧྥ་རན་སིའི་སྲིད་འཛིན་འོས་བསྡུའི་གྲུབ་དོན་དུ་ལས་ཁུར་སྲིད་འཛིན་ཨེལ་མོན་མེར་ཁོན་ལ་བསྐྱར་དུ་རྒྱལ་ཁ་ཐོབ་ནས་རྒྱལ་སྤྱིའི་ནང་ཁོང་ལ་མཚམས་འདྲི་ཞུ་མཁན་མང་པོ་བྱུང་ཡོད་པ་ལྟར། ༧གོང་ས་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་དང་། དེ་བཞིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་བཅས་ནས་ཁོང་ལ་མཚམས་འདྲི་ཞུས་འདུག 

དེ་ཡང་ཟླ་འདིའི་ཚེས་༢༥ ཉིན་༸གོང་ས་མཆོག་གིས་གསུང་དོན། ད་བར་ང་ཚོས་སོ་སོའི་གནའ་བོ་ནང་པའི་རིག་གཞུང་སྲུང་སྐྱོབ་ཆེད་དུ་འཐབ་རྩོད་བྱེད་བཞིན་པར་ཧྥ་རན་སིའི་དབུ་ཁྲིད་རིམ་བྱོན་དང་མི་མང་གིས་གྲོགས་པོའི་འདུ་ཤེས་བཟུང་སྟེ། སྐུལ་མ་དང་རྒྱབ་སྐྱོར་གནང་དང་གནང་བཞིན་པ་ནི་བོད་མི་རྣམས་ལ་མཚོན་ན་བསོད་བདེ་ཆེན་པོ་རེད། ང་ཚོའི་ནང་པའི་རིག་གཞུང་ནི་ཞི་བདེའི་རིག་གཞུང་སྟེ་འཚེ་བ་མེད་པ་དང་བྱམས་སྙིང་རྗེ་ལྡན་པའི་རིག་གཞུང་ཡིན་ཞིང་། རིག་གཞུང་དེས་འགྲོ་བ་མིའི་རིགས་ཡོངས་ལ་ཁེ་ཕན་སྒྲུབ་ཐུབ་པའི་རིག་གཞུང་ཞིག་ཆགས་ཡོད། གོ་སྐབས་འདི་བརྒྱུད་ངོས་ཀྱིས་བོད་མི་ཡོངས་ཀྱི་ཚབ་ཞུས་ཏེ་ཧྥ་རན་སིའི་དབུ་ཁྲིད་རྣམ་པ་དང་མི་མང་བཅས་ལ་ཐུགས་རྗེ་ཆེ་ཞུ་རྒྱུ་ཡིན། ངོས་ཀྱིས་སྐུ་ཉིད་ཀྱིས་ཧྥ་རན་སིའི་མི་མང་གི་རེ་བ་དང་མངོན་འདོད་བསྒྲུབ་པར་མདུན་དུ་ལྷགས་པའི་དཀའ་ངལ་ཁག་ལ་གདོང་ལེན་གནང་རྒྱུའི་མཚོན་པའི་འབྱུང་འགྱུར་གྱི་བྱེད་སྒོ་མཐའ་དག་ལམ་ལྷོངས་ཡོང་བ་དང་། དེ་བཞིན་འཛམ་གླིང་ཞི་བདེ་དང་འཆམ་མཐུན་ཡོང་བར་ཞབས་འདེགས་བསྒྲུབ་ཐུབ་པའི་སྨོན་འདུན་ཞུ་རྒྱུ་ཡིན་ཞེས་གསུངས་འདུག 

ཟླ་འདིའི་ཚེས་༢༥ ཉིན་བོད་མི་མང་སྤྱི་འཐུས་ཚོགས་གཙོས་གསུང་དོན། སྐུ་ཉིད་སླར་ཡང་ཧྥ་རན་སི་རྒྱལ་ཁབ་ཀྱི་སྲིད་འཛིན་དུ་བདམས་ཐོན་བྱུང་བ་དེས། སྐུ་ཉིད་ཀྱི་དབུ་འཁྲིད་དང་། ཕྱག་ལས་གནང་ཕྱོགས་ཐད་ཧྥ་རན་སིའི་མི་མང་ནས་ཡིད་ཆེས་ཆེན་པོ་ཡོད་པ་མཚོན་ཐུབ། སྐུ་ཉིད་ནས་མུ་མཐུད་རྒྱལ་སྤྱིའི་ནང་མང་གཙོ་སྲ་བརྟན་དང་། འགྲོ་བ་མིའི་ཐོབ་ཐང་གོང་མཐོར་གཏོང་རྒྱུའི་རེ་བ་ཞུ་བཞིན་ཡོད། བོད་ལྟ་བུར་ཆ་མཚོན་ན། རྒྱ་ནག་དམར་གཞུང་གི་བཙན་འོག་ཏུ་མུ་མཐུད་གནས་ཡོད་པ་མ་ཟད། བོད་ནང་ཆོས་དད་རང་དབང་དང་། སྨྲ་བརྗོད་རང་དབང་། དེ་བཞིན་རང་མི་རིགས་ཀྱི་སྐད་ཡིག་སྦྱོང་སྤྱོད་ཀྱི་རང་དབང་སོགས་གཞི་རྩའི་འགྲོ་བ་མིའི་ཐོབ་ཐང་ཡོངས་རྫོགས་རྒྱ་དམར་གཞུང་གིས་རྡོག་རོལ་བཏང་དང་གཏོང་བཞིན་ཡོད། ཕྱི་ལོ་༢༠༡༦ ལོར་སྐུ་ཉིད་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མཇལ་འཕྲད་གནང་བར་བརྟེན། སྐུ་ཉིད་ནས་བོད་ནང་གི་གནས་སྟངས་མཁྱེན་རྟོགས་ཡོད་ངེས་རེད། དེ་བཞིན་ཁྱེད་ཀྱི་དབུ་ཁྲིད་འོག་ཧྥ་རན་སི་རྒྱལ་ཁབ་ནང་གནས་པའི་བོད་རིགས་རྣམས་ལ་ད་བར་མཐུན་འགྱུར་རྒྱབ་སྐྱོར་གནང་བར་གོ་སྐབས་འདི་བརྒྱུད་ནས་ཐུགས་རྗེ་ཆེ་ཞུ་རྒྱུ་དང་། འབྱུང་འགྱུར་མུ་མཐུད་བོད་ཀྱི་བདེན་པའི་འཐབ་རྩོད་ཐོག་རྒྱབ་སྐྱོར་གནང་སྐྱོང་ཡོང་བའི་རེ་བ་ཞུ་རྒྱུ་ཡིན་ཞེས་གསུངས་འདུག 

ཟླ་འདིའི་ཚེས་༢༦ ཉིན་ཕྱི་དྲིལ་བཀའ་བློན་གྱིས་གསུང་དོན། ངས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཚབ་ཞུས་ཏེ་ཧྥ་རན་སིའི་སྲིད་འཛིན་གྱི་འོས་བསྡུ་ཆེན་མོའི་ཁྲོད་སྐུ་ཉིད་སླར་ཡང་སྲིད་འཛིན་དུ་བདམས་ཐོན་བྱུང་བར་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། སྐུ་ཉིད་སླར་ཡང་ཧྥ་རན་སིའི་སྲིད་འཛིན་དུ་བདམས་ཐོན་བྱུང་བ་དེས་ཧྥ་རན་སིའི་མི་མང་གིས་སྐུ་ཉིད་ཀྱི་དབུ་ཁྲིད་ཀྱི་གནས་བབས་ལ་ཡིད་ཆེས་བློ་གཏད་གནང་གི་ཡོད་པ་མཚོན་གྱི་ཡོད། སྐུ་ཉིད་མང་གཙོའི་འོས་འདེམས་ལམ་ནས་ཧྥ་རན་སིའི་སྲིད་འཛིན་གྱི་འོས་བསྡུ་ཁྲོད་རྒྱལ་ཁ་ཐོབ་པ་ནི་ཞི་བདེ་ལ་དགའ་མོས་གནང་མཁན་གྱི་འཛམ་གླིང་མི་མང་ལ་རྒྱལ་ཁ་ཐོབ་པ་ཞིག་ཡིན། ལྷག་པར་འཛམ་གླིང་ནང་རྙོག་གྲ་འབྱུང་བཞིན་པའི་སྐབས་འདིར་སྐུ་ཉིད་ཀྱིས་ཡུ་རོབ་སྟོབས་ཤུགས་ཆེ་རུ་གཏོང་རྒྱུའི་གཙོ་འདོན་དང་། དེ་བཞིན་སྟོབས་ལྡན་རྒྱལ་ཁབ་ཧྥ་རན་སི་ཡིས་ཁོར་ཡུག་སྲུང་སྐྱོབ་ལ་རྒྱབ་སྐྱོར་གནང་རྒྱུའི་གཙོ་འདོན་གནང་བཞིན་པ་ནི་རྗེས་སུ་ཡི་རང་ཞུ་འོས་པ་ཞིག་རེད། འདས་པའི་ལོ་མང་རིང་ཧྥ་རན་སིའི་གྲོས་ཚོགས་གོང་འོག་གཉིས་ནང་ཆབ་སྲིད་ཚོགས་པ་ཁག་གིས་བོད་དོན་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱབ་སྐྱོར་གནང་དང་གནང་བཞིན་ཡོད་པས། ང་ཚོས་ཧྥ་རན་སིའི་ཆབ་སྲིད་ཚོགས་པ་ཁག་ལ་ཐུགས་རྗེ་ཆེ་ཞུ་རྒྱུ་ཡིན། ཧྥ་རན་སིར་བོད་དོན་རྒྱབ་སྐྱོར་ཚོགས་པ་མང་ཤོས་ཡོད་པ་མ་ཟད། ཧྥ་རན་སིའི་གཞུང་འཛིན་རིམ་པ་དང་། མི་མང་བཅས་ནས་བོད་མི་དང་བོད་དོན་ལ་རྒྱབ་སྐྱོར་གནང་དང་གནང་བཞིན་ཡོད་སྟབས། ཧྥ་རན་སིའི་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། གཞན་ཡང་བོད་རྒྱའི་དཀའ་རྙོག་སེལ་ཐབས་སུ་བོད་རྒྱའི་གྲོས་མོལ་བསྐྱར་གསོ་དགོས་པའི་ཛ་དྲག་སྐོར་དང་། ཧྥ་རན་སིའི་སྲིད་འཛིན་ལས་ཐོག་གི་དབུ་ཁྲིད་འོག་ཧྥ་རན་སིའི་གཞུང་གིས་རྒྱབ་སྐྱོར་ལ་བརྟེན་ནས་ད་ཆ་ཧྥ་རན་སི་ཡིས་ཡུ་རོབ་སྤྱི་མཐུན་ལྷན་ཁང་(Council of the European Union) གི་གཙོ་འཛིན་གྱི་ལས་ཁུར་གནང་བཞིན་ཡོད་པ་རེད། ཅེས་གསུངས་འདུག །

གསར་འགོད་པ་སྐལ་བཟང་དོན་གྲུབ།