༧གོང་ས་མཆོག་དང་སྲིད་སྐྱོང་ནས་འཇར་མན་གྱི་སྲིད་བློན་གསར་པར་འཚམས་འདྲི་ཞུས་གནང་འདུག 

ཟླ་༡༢ ཚེས་༩ ཉིན་སྐུ་ཞབས་ཨོ་ལ་ཧྥི་ཤོལ་ཛི་(Olaf Scholz) ཇར་མ་ནཱིའི་སྲིད་བློན་དུ་བདམས་ཐོན་བྱུང་བར་༧གོང་ས་མཆོག་གིས་འཚམས་འཕྲིན་ཞིག་བསྩལ་བའི་ནང་འཁོད་དོན། “སྐུ་ཉིད་ཀྱིས་བསམ་ཤེས་དང་། དངོས་ཡོད་གནས་ཚུལ་དང་མཐུན་པའི་སྒོ་ནས་མུ་མཐུད་འཇར་མན་དཔལ་འབྱོར་ཡར་རྒྱས་གཏོང་རྒྱུ་ཡིན་པ་མ་ཟད། འཛམ་གླིང་གི་རང་དབང་དང་། མང་གཙོ། ཁྲིམས་ཀྱི་དབང་བསྒྱུར། འགྲོ་བ་མིའི་ཐོབ་ཐང་བཅས་ལ་རྒྱབ་སྐྱོར་གྱིས་ཐུགས་འགན་གཙོ་བོ་བཞེས་གནང་རྒྱུ་ཡིན་པ་ངོས་རང་ལ་ཡིད་ཆེས་ཡོད། འཇར་མན་གྱིས་ཡུ་རོབ་སྤྱི་མཐུན་ཚོགས་པའི་སྟོབས་ཤུགས་དང་སྲ་བརྟན་སླད་ཞབས་འདེགས་རླབས་ཆེན་བསྒྲུབས་ཡོད་པ་དེས་འཛམ་གླིང་ཡོངས་ལ་སེམས་ཤུགས་དང་རེ་བའི་འོད་སྣང་སྦྱིན་ཡོད། འདས་པའི་ལོ་ངོ་བཅུ་ཕྲག་བཞི་ལྷག་རིང་ངོས་རང་འཇར་མན་ནང་ཐེངས་ཁ་ཤས་བསྐྱོད་མྱོང་ཡོད་ལ། གུ་ཡངས་དང་བྱམས་བརྩེ་ལྡན་པའི་འཇར་མན་རྒྱ་ཆེ་མང་ཚོགས་ཀྱིས་ངོས་ལ་ཧ་ཅང་སེམས་འགུལ་ཐེབས་བཅུག་སོང་། ངོས་ཀྱིས་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་དང་འགྲོ་བ་མི་གཅིག་གྱུར་གྱི་འདུ་ཤེས་གོང་མཐོར་སྤེལ་བཞིན་པར་འཇར་མན་མི་མང་གིས་དོ་སྣང་དང་དགའ་མོས་གནང་སྟབས་ངོས་རང་ལ་སྙིང་སྟོབས་བསྐྱེད་བྱུང་།གོ་སྐབས་འདི་བརྒྱུད་ངོས་ཀྱིས་འཇར་མན་མི་མང་གིས་མཛའ་བརྩེ་ལྡན་པའི་སྒོ་ནས་བོད་ནང་གི་བོད་མིའི་གནས་སྟངས་ལ་ཐུགས་ཁུར་གནང་བཞིན་པར་བཀའ་དྲིན་ཤིན་ཏུ་ཆེ་ཞེས་ཞུ་རྒྱུ་ཡིན། འཇར་མན་གྱི་སྲིད་བློན་ལྕམ་སྐུ་ཨན་གྷི་ལ་མར་ཀེལ་(Angela Merkel) གྱིས་སྒེར་གྱི་ངོས་ནས་ཀྱང་བོད་ནང་གི་བོད་མིའི་གནས་སྟངས་ལ་ཐུགས་ཁུར་གནང་ཡོད་པས་ངོས་ཀྱིས་ཁོང་ལ་རྗེས་སུ་ཡི་རང་ཞུས་ཡོད་”ཅེས་དང་། མཐར་༸གོང་ས་མཆོག་གིས་འཇར་མན་གྱི་སྲིད་བློན་གསར་པ་ཨོ་ལ་ཧྥི་ཤོལ་ཛི་ཡིས་མདུན་དུ་ཡོད་པའི་དཀའ་ངལ་རྣམས་ལ་གདོང་ལེན་གནང་སྟེ་འཇར་མན་མི་མང་གི་མངོན་འདོད་དང་རེ་བ་བསྐང་ཐུབ་པའི་ཐུགས་སྨོན་མཛད་གནང་འདུག 

དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་འཚམས་འདྲི་གནང་དོན། སྐུ་ཉིད་ཀྱིས་འཇར་མན་སྲིད་བློན་གྱི་ཐུགས་འགན་བཞེས་གནང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། བོད་མིའི་དཀའ་སྡུག་དུས་རྟག་ཏུ་འཇར་མན་གྲོས་ཚོགས་ནང་གླེང་སློང་གནང་ཡོད་པ་དང་། ཕྱི་ལོ་༡༩༨༧ ལོའི་འགོ་སྟོད་ལ་སྐབས་དེའི་ནུབ་འཇར་མན་གྲོས་ཚོགས་ནང་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་ཐོག་གྲོས་ཆོད་ཅིག་བཞག་གནང་ཡོད། ལོ་འདིའི་འགོ་སྟོད་ལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སུ་འཇར་མན་གྱིས་རྒྱལ་ཁབ་གཞན་རྣམས་ལྟར་རྒྱ་ནག་གཞུང་གིས་བོད་ནང་དམ་དྲག་ཤུགས་ཆེ་བྱས་དང་བྱེད་བཞིན་པའི་སྐོར་ཐུགས་འཚབ་ཀྱིས་གླེང་སློང་གནང་ཡོད། བོད་མིས་བོད་རྒྱའི་དཀའ་རྙོག་དབུ་མའི་ལམ་གྱི་སྲིད་བྱུས་བརྒྱུད་སེལ་ཐབས་གནང་བཞིན་པར་འཇར་མན་མི་མང་གིས་བོད་དོན་རྒྱབ་སྐྱོར་ཚོགས་པ་ཁག་བརྒྱུད་རྒྱབ་སྐྱོར་ཤུགས་ཆེ་གནང་དང་གནང་མུས་ཡིན། ང་ཚོས་འཇར་མན་གཞུང་དང་མི་མང་བཅས་ལ་བཀའ་དྲིན་ཤིན་ཏུ་ཆེ་ཞེས་ཞུ་ཡི་ཡོད། སྐུ་ཉིད་ལ་ལོ་ངོ་བཅུ་ཕྲག་མང་པོའི་མཁྱེན་རྒྱ་དང་ཁ་ཐོག་ལག་བཞག་གི་དབུ་ཁྲིད་ཀྱི་ནུས་པ་ཡོད་པའི་ཆ་ནས་འཇར་མན་གྱིས་འཛམ་གླིང་ནང་འགན་ཤུགས་ཆེ་ཙམ་འཁུར་ཐུབ་པའི་ཕྲན་རང་ཉིད་ལ་གདེང་ཚོད་ཡོད། འཇར་མན་གྱིས་མང་གཙོའི་རིན་ཐང་དང་འགྲོ་བ་མིའི་ཐོབ་ཐང་ལ་དུས་རྟག་ཏུ་རྒྱབ་སྐྱོར་གནང་བཞིན་ཡོད་པས་སྐུ་ཉིད་ཀྱི་སྲིད་བྱུས་ནང་མང་གཙོའི་རིན་ཐང་དང་འགྲོ་བ་མིའི་ཐོབ་ཐང་གི་ཁྱད་ཆོས་འབུར་དུ་ཐོན་ཐུབ་པའི་རེ་བ་ཡོད་”ཅེས་གསུངས་འདུག །

གསར་འགོད་པ་སྐལ་བཟང་དོན་གྲུབ།