༧གོང་ས་མཆོག་ནས་ཐའེ་ཝན་གྱི་རྒྱ་རིགས་དད་ལྡན་བ་གཙོས་པའི་ཆོས་ཞུ་བ་༧༠༠༠ ལྷག་ལ་ལམ་གཙོ་རྣམ་གསུམ་གྱི་ཆོས་འབྲེལ་བསྩལ།

ཟླ་འདིའི་ཚེས་༣༠ ་ཉིན་གྱི་ཞོགས་པ། ༧གོང་ས་སྐྱབས་མགོན་ཆེན་པོ་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཐའེ་ཝན་བ་གཙོས་པའི་དད་ལྡན་ཆོས་ཞུ་བ་བདུན་སྟོང་ལྷག་ལ་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང་བྱང་སྡོམ་འབོག་ཆོག་གི་ཆོས་འབྲེལ་བཀའ་དྲིན་བསྩལ་སོང་།

སྐབས་དེར་༧གོང་ས་མཆོག་གིས་སྐུ་ཉིད་ཀྱི་འཁྲུངས་ས་དང་རྗེ་རིན་པོ་ཆེའི་འཁྲུངས་སའི་བར་ཐག་ཧ་ཅང་ཉེ་བོ་ཡོད་པ་དང་། མགོན་པོ་གང་ཉིད་ཀྱི་དགོངས་པ་བཞེས་སྟངས་སོགས་རྗེ་རིན་པོ་ཆེ་དང་འདྲ་བོ་ཡོད་པ། སྤྱིར་སངས་རྒྱས་པའི་ཆོས་དང་། ལྷག་པར་དུ་བོད་ཀྱི་བསྟན་པའི་དོན་དུ་རྗེ་རིན་པོ་ཆེས་བསམ་བཞིན་དུ་སྲིད་པ་བཟུང་བ་ཧ་ཅང་གསལ་བོ་ཡིན་པ།

གོང་ས་མཆོག་ཉིད་ཀྱང་རྗེ་རིན་པོ་ཆེའི་རྣམ་ཐར་ནང་བཞིན་བྱས་ཏེ་བསམ་བཞིན་དུ་སྲིད་པ་བཟུང་བ་ཞིག་ཕལ་ཆེར་ཡིན་པའི་ཁུལ་ཡིན་པ། མགོན་པོ་གང་ཉིད་ཀྱིས་གཟབ་གཟབ་མ་བྱས་ན་རྗེ་རིན་པོ་ཆེ་ཨ་མདོ་ཡིན་པ་དང་ཨ་མདོའི་ཞབས་འདྲེན་ཞུ་གི་ཡོད་པ།

དེ་བཞིན་ ང་ཚོའི་གནས་སྟངས་བཙན་བྱོལ་བ་ཞིག་ཆགས་ཡོད་ན་ཡང་། སངས་རྒྱས་པའི་ཆོས་ལ་ཡིན་གཅིག་མིན་གཅིག་ལུང་པ་ཞིག་ཡོད་མི་དགོས་པ། ད་ལྟ་སངས་རྒྱས་པའི་ཆོས་འཛམ་གླིང་ཀུན་ལ་ཁྱབ་པ་ཞིག་ཆགས་ཡོད་པའི་སྐོར། མགོན་པོ་གང་ཉིད་ལ་མཚོན་ན། སངས་རྒྱས་པའི་ཆོས་སྤྱི་དང་། ལྷག་པར་དུ་འཇམ་མགོན་བླ་མའི་བསྟན་པ་ག་ཚོད་ཡོང་ཡོང་གིས་ཉམས་ལེན་དང་གཞན་ལ་ཡང་ངོ་སྤྲོད་གནང་བཞིན་ཡོད་པ། མགོན་པོ་མཆོག་བོད་ནས་ཐོན་པའི་རྗེས་རྡ་རམ་ས་ལར་གཞིས་ཆགས་ནས་བཞུགས་ཤིང་། ཁོང་ཉིད་ཀྱི་ཉམས་ལེན་གཙོ་བོ་ནི་རྗེ་རིན་པོ་ཆེའི་གསུང་པོ་ཏི་བཅོ་བརྒྱད་ལ་ཡང་ཡང་གཟིགས་བཞིན་ཡོད་པ། བསམ་བློའི་ནང་དུའང་ཆོས་རྗེ་བློ་བཟང་གྲགས་པ་ཟེར་དུས་གཞན་དང་མི་འདྲ་བའི་ཚོར་བ་ཞིག་ཡོང་གི་ཡོད་པའི་བཀའ་སློབ་དང་།

བསྟན་པ་བྱང་ནས་བྱང་དུ་དར་ཞེས་པ་ལྟར། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རྒྱ་གར་ལ་ཆོས་ཀྱི་འཁོར་ལོ་བསྐོར། དེ་ནས་བོད་སོག་གཉིས་སུ་སངས་རྒྱས་པའི་ཆོས་དར་ཁྱབ་རིམ་པར་ཤུགས་ཆེན་བྱུང་བ་དང། མདོ་སྟོད་སྨད་སོགས་སུ་སངས་རྒྱས་པའི་ཆོས་ད་ལྟའི་བར་དུ་གནས་པ།  གུང་ཁྲན་ཏང་གིས་དམ་དྲག་བཙན་དབང་མང་པོ་བྱུང་ཡང་། བོད་པའི་ཆོས་དད་ལ་འགྱུར་བ་མེད་པར་བསྡད་པ་དང་། རྒྱ་གར་ལ་སླེབས་རྗེས་བོད་པ་སྐྱ་སེར་ཚང་མས་ཆོས་དད་ཤུགས་ཆེན་པོ་བཟུང་ནས་བསྡད་ཡོད་པ།

བོད་ལ་ཡོད་པའི་སངས་རྒྱས་པའི་ཆོས་འདི་ཁ་ཙམ་ཚིག་ཙམ་ཞིག་མ་ཡིན་པར་ཧ་ཅང་གཏིང་ཟབ་པོ་ཞིག་ལ་བསམ་བློ་གཏོང་རྒྱུ་ཡོད་པས་ཚན་རིག་པ་དང་བསམ་བློ་གཏིང་རིང་པོ་གཏོང་མཁན། ཤེས་ཡོན་ཅན་གྱིས་ཀྱང་དོ་སྣང་ཆེན་པོ་བྱེད་ཀྱི་ཡོད་པ་སོགས་ཀྱི་བཀའ་སློབ་གནང་བ་དང་། ལམ་གཙོ་རྣམ་གསུམ་གྱི་བཤད་ལུང་དང་ཆོས་འབྲེལ་གྱི་མཇུག་སྡོམ་ལ་སེམས་བསྐྱེད་ཀྱི་ཆོས་འབྲེལ་བཀའ་དྲིན་བསྩལ་སོང་།

ཐེངས་འདིའི་ཆོས་འབྲེལ་ཐོག་རྒྱ་རིགས་དད་ལྡན་པ་༡༢༦༠ གཙོས་པའི་རྒྱལ་ཁབ་༦༤ ནས་ཕེབས་པའི་ཆོས་ཞུ་བ་ཁྱོན་བསྡོམས་༧༥༠༠ ཕེབས་ཡོད་འདུག།།

གསར་འགོད་པ། བློ་བཟང་རྒྱ་མཚོ།