༧གོང་ས་མཆོག་ནས་ཐུགས་གསོའི་གསུང་འཕྲིན་དང་ཞལ་འདེབས་བསྩལ་གནང་འདུག
ཉེ་ཆར་རྒྱ་གར་ལྷོ་ཕྱོགས་ཨན་ཌེ་ར་་ (Andhra Pradesh) མངའ་སྡེའི་ས་ཁུལ་ཁག་ཅིག་ལ་ཆར་ཞོད་ཆེན་པོ་བབས་པས་རྐྱེན་གྱིས་མི་རྒྱུ་ཕྱུགས་གསུམ་ལ་གོད་ཆག་བྱུང་སྟེ་མང་ཚོགས་ལ་དཀའ་ངལ་འཕྲད་བཞིན་པའི་གནས་ཚུལ་ཐོན་པར། ༸གོང་ས་མཆོག་གིས་ཕྱི་ལོ་ ༢༠༢༡ ཟླ་ ༡༡ ཚེས་ ༢༡ ཉིན་མངའ་སྡེ་དེའི་སྤྱི་ཁྱབ་བློན་ཆེན་སྐུ་ཞབས་ཇཱ་གན་མོ་ཧན་རེ་ཌེ་(Y S Jagan Mohan Reddy) མཆོག་ལ་ཐུགས་གསོའི་གསུང་འཕྲིན་བསྩལ་བའི་ནང་འཁོད་དོན།
ངོས་ཀྱིས་སྐུ་ཉིད་ཀྱིས་གཙོས་ཆར་ཞོད་ཀྱི་རྐྱེན་ངན་གོད་ཆག་འོག་འདས་གྲོངས་སུ་གྱུར་བ་རྣམས་ཀྱི་ནང་མི་སྤུན་མཆེད་དང་། དགའ་ཉེ་བློ་དཀར། དེ་བཞིན་ཆར་ཞོད་ཀྱི་རྐྱེན་ངན་གོད་ཆག་ཐེབས་མཁན་ཡོངས་ལ་ཐུགས་གསོ་དང་ཐུགས་སྨོན་ཞུ་རྒྱུ་ཡིན། ཨན་ཌེ་ར་མངའ་སྡེ་གཞུང་དང་རྒྱལ་ཡོངས་རྐྱེན་ངན་རོགས་སྐྱོར་ཚན་པ་ཁག་གིས་རྐྱེན་ངན་གོད་ཆགས་ཐེབས་མཁན་རྣམས་ལ་ནུས་ཤུགས་ཡོད་དགུ་རྩལ་སྤྲུགས་ཀྱིས་རོགས་རམ་དང་ཉེན་སྐྱོབ་གང་ཐུབ་ཅི་ཐུབ་གནང་བཞིན་པར་ངོས་ཀྱིས་ཧ་ཅང་རྗེས་སུ་ཡི་རང་ཞུ་གི་ཡོད། ཨན་ཌེ་ར་མངའ་སྡེའི་མི་མང་ལ་གདུང་སེམས་མཉམ་སྐྱེའི་ཆེད་དུ་ཏཱ་ལའི་བླ་མ་དགེ་རྩ་ཚོགས་པའི་ངོས་ནས་ཉེན་སྐྱོབ་ཀྱི་ལས་དོན་སླད་དུ་ཞལ་འདེབས་འབུལ་རྒྱུ་ཡིན། ཞེས་འཁོད་ཡོད།
གཞན་ཡང་ཐུགས་གསོའི་གསུང་འཕྲིན་ནང་༧གོང་ས་མཆོག་གིས་་དེ་སྔ་མངའ་སྡེ་དེའི་ནང་ཐེངས་འགའ་ཆིབས་སྒྱུར་བསྐྱངས་མྱོང་ཡོད་པའི་སྐོར་དང་། ཕྱི་ལོ་ ༢༠༠༦ ལོར་རྒྱ་གར་ལྷོ་ཕྱོགས་ཨམ་ར་ཝ་ཏི་ལ་ནས་དུས་འཁོར་དབང་ཆེན་བསྩལ་སྐབས་གནས་མཇལ་བ་སྟོང་ཕྲག་མང་པོ་དུས་ཁོར་དབང་ཆེན་དང་ལྷོ་ཕྱོགས་དཔལ་གྱི་རི་སོགས་ལ་གནས་མཇལ་ཆེད་དུ་ཕེབས་ཡོད་པ་དང་། སྐབས་དེར་ཨན་ཌེ་ར་མངའ་སྡེ་གཞུང་གིས་གཏོང་ཕོད་ཆེན་པོའི་སྒོ་ནས་གནས་མཇལ་བ་སྟོང་ཕྲག་མང་པོར་མཐུན་འགྱུར་རོགས་རམ་གནང་ཡོད་པའི་སྐོར་དང་། ཆར་ཞོད་ཀྱི་རྐྱེན་ངན་གོད་ཆག་ཐེབས་མཁན་ཡོངས་ལ་ཐུགས་སྨོན་མཛད་གནང་ཡོད་སྐོར་འཁོད་འདུག །
གསར་འགོད་པ་སྐལ་བཟང་དོན་གྲུབ།
