༧གོང་ས་མཆོག་ནས་རྒྱ་ནག་ཏུ་གནས་གཟིགས་ཕེབས་འདོད་ཡོད་སྐོར་གསུངས།

༡༡ ཚེས་༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་ཕྱི་རྒྱལ་བའི་གསར་འགོད་ལྷན་ཚོགས་ཞེས་པའི་ཚོགས་པ་དང་ཉི་ཧོང་བོད་ཀྱི་སྐུ་ཚབ་དོན་གཅོད་ཁང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར། སེམས་བཟང་གི་བློ་སྦྱོང་ཚུལ་སྐོར་ལ་བཀའ་སློབ་དང་། དྲི་བར་བཀའ་ལན་བསྩལ་གནང་སོང་། 

དེ་ཡང་གསར་འགོད་པ་ཞིག་གིས་ད་ལྟ་བར་དུ་འགྱོད་པ་ཆེ་ཤོས་ག་རེ་བྱུང་ཡོད་མེད་བཀའ་འདྲི་ཞུས་པར་༧གོང་ས་མཆོག་གིས། “ངོས་རང་སྒེར་ལ་དམིགས་བསལ་གྱིས་མི་ཚེའི་ནང་འགྱོད་པ་འདི་བྱུང་སོང་དང་འགྲིག་མ་སོང་བསམ་པའི་འགྱོད་པ་མེད། མི་ཚེའི་ནང་དཀའ་ངལ་གང་འདྲ་ཞིག་འཕྲད་རུང་སོ་སོའི་སེམས་ཀྱི་བདེ་བ་མ་བརླགས་པའི་ཐོག འགྲོ་བ་མི་སྤྱིའི་བདེ་སྡུག་ལ་བསམ་བློ་བཏང་དང་གཏོང་བཞིན་ཡོད་པ་དང་འགྲོ་བ་མི་ཐེར་འབུམ་བདུན་ལྷག་ཡོད་པ་ཚང་མར་གཉེན་བཤེས་ཀྱི་འདུ་ཤེས་འཛིན་གྱི་ཡོད་པར་བརྟེན། ག་དུས་ཡིན་རུང་སོ་སོ་ཁེར་རྐྱང་གིས་ལྷག་སོང་བསམ་པའི་བསམ་བློ་རྩ་བ་ཉིད་ནས་སྐྱེ་ཡི་མེད། ང་ཚོ་ཚང་མ་གཉེན་བཤེས་རྐྱང་རྐྱང་རེད། དེར་བརྟེན་མི་ཚེའི་ནང་དམིགས་བསལ་གྱིས་འགྱོད་པ་མེད་” ཅེས་བཀའ་ལན་གནང་སོང་།

དེ་བཞིན་ད་ལྟའི་རྒྱ་ནག་གི་སྲིད་འཛིན་ཞི་ཅིན་ཕིང་གི་ཐོག་ལ་དགོངས་ཚུལ་གང་ཡོད་པ་དང་ཁོ་པར་མཇལ་འཕྲད་ཀྱི་ཐུགས་འདོད་ཡོད་མེད་བཀའ་འདྲི་ཞུས་སྐབས། ༧གོང་ས་མཆོག་ནས་བཀའ་ལན་དུ། དེ་སྔ་རྒྱ་ནག་གི་འགོ་ཁྲིད་མའོ་ཙེ་ཏུང་དང་ལྷན་དུ་མཇལ་འཕྲད་མཛད་མྱོང་ཡོད་པ་དང་། ཁོ་པའི་སྤྱི་ཚོགས་རིང་ལུགས་ཀྱི་ལྟ་བར་༧གོང་ས་མཆོག་ནས་ཐུགས་མཉེས་པོ་མཛད་ཀྱི་ཡོད་ཀྱང་སྐབས་རེར་མང་ཚོགས་ཐོག་ཆེས་དམ་དྲག་གི་སྲིད་བྱུས་ལག་བསྟར་བྱེད་ཀྱི་ཡོད་པ་བཅས་ལུང་འདྲེན་མཛད་དེ་ད་ལྟའི་རྒྱ་ནག་གི་མི་རབས་གསར་པའི་སྣེ་ཁྲིད་འོག་རྒྱ་ནག་ནང་འགྱུར་བ་ཞིག་ཐེབས་རྒྱུར་ཐུགས་རེ་མཛད་བཞིན་ཡོད་པ་དང་། ད་ལྟའི་ཆར་༧གོང་ས་མཆོག་ནས་སྲིད་འཛིན་ཞི་ཅིན་ཕིང་དང་མཇལ་འཕྲད་ཀྱི་དམིགས་བསལ་མཛད་འཆར་གང་ཡང་མེད་ཀྱང་། ལོ་ཤས་ནང་རྒྱ་ནག་གི་རི་བོ་རྩེ་ལྔའམ་འཇམ་དཔལ་དབྱངས་ཀྱི་གནས་རིར་གནས་གཟིགས་མཛད་ཐུབ་རྒྱུར་ཐུགས་རེ་ཆེན་པོ་མཛད་བཞིན་པ་དང་དེར་གོ་སྐབས་འབྱུང་ཚེ་སྲིད་འཛིན་ཞི་ཅིན་ཕིང་གཙོས་རྒྱ་ནག་གི་འགོ་ཁྲིད་དང་མཇལ་འཕྲད་འབྱུང་སྲིད་པ་དང་། དེ་བཞིན་རྒྱ་རིགས་གྲོགས་པོ་རྙིང་གྲས་ཁག་ཅིག་དང་མཇལ་འཕྲད་མཛད་རྒྱུར་ཐུགས་རེ་ཡོད་སྐོར་གསུངས་གནང་སོང་།

གསར་འགོད་པ་གཞན་ཞིག་གིས་༧གོང་ས་མཆོག་ནས་རྒྱ་ནག་དང་ཞི་འགྲིག་གནང་སྟེ་བོད་དུ་གནས་བཞུགས་ཀྱི་གོ་སྐབས་ཡོད་མེད་བཀའ་འདྲི་ཞུས་པར། ༧གོང་ས་མཆོག་གིས། “ལོ་མང་སྔོན་ངོས་རང་རྒྱ་གར་སྲིད་བློན་ཟུར་པ་མཱན་མོ་ཧན་སེང་མཆོག་མཇལ་སྐབས། རྒྱ་གར་ནི་ངོས་ཀྱི་ཚེ་གང་གི་གནས་མལ་གྱི་རང་ཁྱིམ་ཆགས་རྒྱུའི་འདུན་པ་ཡོད་པ་དང་། ཐ་ན་ངོས་ཀྱི་ཚེ་མཇུག་རྫོགས་ས་དེ་ཡང་རྒྱ་གར་དུ་བསྐྱལ་རྒྱུའི་འདོད་པ་ཅེས་བཤད་པ་ཡིན། གང་ལྟར་རྒྱ་གར་དུ་རང་དབང་ཆ་ཚང་ཡོད་པ་དང་། ཆོས་ལུགས་འཆམ་མཐུན་གྱི་སྲོལ་རྒྱུན་ཧ་ཅང་བཟང་པོ་ཡོད། འཛམ་གླིང་གི་ཆོས་ལུགས་ཆེ་ཁག་གི་རྗེས་འཇུག་རྣམས་འཆམ་མཐུན་གྱིས་རྒྱ་གར་ནང་གནས་ཡོད་ཅིང་། རྒྱ་གར་ནི་ངོས་ལ་ཧ་ཅང་འཕྲོད་པོ་དང་རྒྱ་གར་ནང་ཕྱོགས་གང་ས་ཅི་ཐད་ནས། ནང་སེམས་ཀྱི་ཞི་བདེ་བརྒྱུད་ཞི་བདེ་གོང་འཕེལ་དང་ཆོས་ལུགས་འཆམ་མཐུན་ལ་ཕན་ཐོགས་སྒྲུབ་ཐུབ་ཁར། བོད་ཀྱི་རིག་གཞུང་སྲུང་སྐྱོབ་ལའང་ཕན་ཐོགས་རྒྱ་ཆེ་སྒྲུབ་ཐུབ་ཀྱི་འདུག་པས། རྒྱ་གར་དུ་ངོས་རང་ཧ་ཅང་སྐྱིད་པོ་དང་སྤྲོ་བོ་ཡོད་”སྐོར་བཀའ་ལན་བསྩལ་གནང་སོང་།

དེ་བཞིན་གོང་ས་མཆོག་མ་འོངས་པར་ཐེ་ཝན་ནང་ཆིབས་བསྒྱུར་མཛད་ཐུབ་པའི་ཐུགས་རེ་ཡོད་དམ་ཞེས་བཀའ་འདྲི་ཞུས་པར་། བཀའ་ལན་དུ་ད་ལྟའི་ཆར་རྒྱ་ནག་སྐམ་ས་ཆེན་མོ་དང་ཐེ་ཝན་དབར་གྱི་ཚོར་བ་རྣོ་བའི་གནས་སྟངས་ཁྲོད་ཐེ་ཝན་ལ་ཆིབས་བསྒྱུར་མ་མཛད་པར་རྒྱ་གར་ལ་བཞུགས་རྒྱུར་དགོངས་པ་ཆེ་བ་ཡོད་པ་དང་དགོས་ངེས་འབྱུང་ཚེ་དེ་རིང་ལྟར་དྲ་ལམ་བརྒྱུད་ཐེ་ཝན་དང་རྒྱ་ནག་མི་མང་ལ་ཕན་པ་བསྒྲུབ་རྒྱུའི་དགོངས་པ་བརྟན་པོ་ཡོད་ཅེས་བཀའ་ལན་བསྩལ་གནང་སོང་།།

གསར་འགོད་པ་སྐལ་བཟང་དོན་གྲུབ།