༧གོང་ས་མཆོག་ནས་སྲིད་བློན་མོ་དྷིའི་འཁྲུངས་སྐར་ལ་འཚམས་འདྲིའི་གསུང་འཕྲིན་བསྩལ་འདུག

ཕྱི་ཚེས་༡༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་མོ་དྷིའི་འཁྲུངས་སྐར་ལ་འཚམས་འདྲི་དང་སྐུའི་འཕྲོད་བཞེས་བཟང་པོ་ཡོང་བའི་སྨོན་འདུན་གནང་བའི་གསུང་འཕྲིན་ཞིག་གནང་འདུག

ཁོང་གིས་རྒྱ་གར་གྱིས་འཚེ་མེད་ཞི་བ་དང་སྙིང་རྗེ་ཡི་སྲོལ་རྒྱུན་རྒྱུད་འཛིན་བྱས་ཏེ་འཛམ་གླིང་ལ་མིག་དཔེ་བཟང་པོ་ཞིག་བསྟན་ཡོད་ཅིང་། དེའི་ཐོག་མང་གཙོའི་རྒྱལ་ཁབ་ཤུགས་ཆེན་ཞིག་ཡིན་པའི་ཆ་ནས། རྒྱ་གར་གྱི་རྒྱལ་སྤྱིའི་ཤུགས་རྐྱེན་ཇེ་ཆེར་འགྲོ་བཞིན་པ་དེས། ང་ཚོའི་འབྲེལ་ལམ་ཇེ་ཟབ་ཏུ་འགྲོ་བཞིན་པའི་འཛམ་གླིང་ནང་ཞི་བདེ་དང་གྲོས་མོལ་ལ་རྒྱ་གར་གྱིས་མཉམ་ཞུགས་གལ་ཆེན་བྱེད་ཐུབ་པ་མཚོན་གྱི་ཡོད། སྔར་བཞིན་ངས་གོ་སྐབས་འདི་བརྒྱུད་རྒྱ་གར་གཞུང་མང་གཉིས་ནས་ང་དང་བཙན་བྱོལ་བོད་མི་རྣམས་ལ་ལོ་ངོ་ ༦༥ ལྷག་གི་རིང་གཏོང་ཕོད་ཆེ་བའི་རོགས་རམ་དང་མགྲོན་པོ་བརྩིས་གནང་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན་ཞེས་གསུངས་གནང་འདུག

ད་དུང་༸གོང་ས་མཆོག་གིས་མཐའ་དོན་དུ། ངས་སྐུ་ཉིད་ལ་སྐུ་གཟུགས་བདེ་ཐང་དང་། རྒྱ་གར་རྒྱལ་ཁབ་ཀྱི་མི་མང་གི་རེ་བ་དང་མངོན་འདོད་རྣམས་མངོན་འགྱུར་ཡོང་བ་དང་། དེ་བཞིན་སྙིང་རྗེ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུར་ཞབས་འདེགས་ཞུ་ཐུབ་པའི་སྨོན་འདུན་ཞུས་གནང་ཡོད་འདུག 

གསར་འགོད་པ། བསོད་ནམས་ཕུན་ཚོགས།