༧གོང་ས་མཆོག་ལ་ཆེ་བསྟོད་ཀྱི་གཟེངས་རྟགས་ཤིག་ཕུལ་འདུག
ཨ་རིའི་གཙུག་ལག་སློབ་གཉེར་ཁང་ཞིག་གིས་༧གོང་ས་མཆོག་ལ་སྤྱི་ཚོགས་ཀྱི་དྲང་བདེན་དང་། ཕྱི་འབྲེལ་ལས་དོན། བཟོད་སྲན་བཅས་ཀྱི་ལས་དོན་ཐོག་ཏུ་ཆེ་བསྟོད་ཀྱི་གཟེངས་རྟགས་ཕུལ་འདུག
ཟླ་༩ པའི་ཚེས་༢༠ ཉིན་ཨ་རིའི་ཁེ་ལི་ཧྥོ་ནི་ཡའི་གཙུག་ལག་སློབ་ཁང་གི་ཡན་ལག་མེར་ཌ་མཐོ་སློབ་ཁང་གི་དྲ་ཐོག་ཏུ་གནས་ཚུལ་སྤེལ་བར་གཞིགས་ན། མཐོ་སློབ་ཁང་དེའི་སྤྱི་ཚོགས་ཀྱི་དྲང་བདེན་དང་ཕྱི་འབྲེལ་ལས་དོན། བཟོད་སྲན་བཅས་ཀྱི་ཐོག་ཏུ་ཆེ་བསྟོད་གཟེངས་རྟགས་(Alice and Clifford Spendlove Prize)ཐེངས་༡༥ པ་དེ་ཟླ་༩ པའི་ཚེས་༡༨ ཉིན་དྲ་ཐོག་མཛད་སྒོ་ཞིག་གི་ཐོག་ཏུ། ༧གོང་ས་མཆོག་ལ་ཕུལ་ཡོད་པ་དང་། ཟླ་༩ པའི་ཚེས་༢༦ ཉིན་མཛད་སྒོ་དེའི་བརྙན་རྒྱང་སྲིང་ཞུ་རྒྱུ་ཡིན་འདུག
དེ་ཡང་ཆེ་བསྟོད་ཀྱི་གཟེངས་རྟགས་དེ་ནི་ཕྱི་ལོ་༢༠༠༥ ལོར་(Sherrie Spendlove)ཞེས་པ་དེས་རང་ཉིད་ཀྱི་ཕ་མ་གཉིས་ཀྱི་དྲན་རྟེན་དང་ཆེ་བསྟོད་བྱེད་ཆེད་དུ་འགོ་བཙུགས་ཡོད་འདུག་པ་དང་། ལོ་ལྟར་མཐོ་སློབ་ཁང་དེའི་སློབ་མ་དང་ལས་བྱེད། ཉེ་འཁོར་གྱི་སྤྱི་ཚོགས་བཅས་ལ་མིག་དཔེ་བཟང་པོ་སྟོན་ཐུབ་མཁན་དང་སེམས་འགུལ་གཏོང་ཐུབ་མཁན་གྱི་མི་སྣ་ཞིག་ལ་ཆེ་བསྟོད་ཀྱི་གཟེངས་རྟགས་དེ་དང་མཉམ་དུ་ཨ་སྒོར་༡༥༠༠༠ ཞིག་ཕུལ་གྱི་ཡོད་པ་རེད་འདུག
ཆེ་བསྟོད་གཟེངས་རྟགས་དེ་འགོ་བཙུགས་མཁན་ཁོང་གིས་གསུང་དོན་ལ། དེང་གི་ཆར་སྲིད་དོན་གྱི་འགལ་ཟླ་དང་གདོང་ཐུག་ཤུགས་ཆེ་རུ་འགྲོ་བཞིན་པའི་འཛམ་གླིང་འདིའི་ནང་དུ། ༧གོང་ས་མཆོག་གི་བྱམས་བརྩེ་དང་ཞི་བདེ། སྙིང་རྗེ། བཟོད་བཞེས་བཅས་ཀྱི་བཀའ་སློབ་རྣམས་ནི། འཚེ་མེད་ཞི་བའི་ཐབས་ལམ་ཐོག་ནས་སྤྱི་ཚོགས་ཀྱི་དྲང་བདེན་རྒྱུན་གནས་གོང་འཕེལ་བྱེད་པར་ཕན་ཐོགས་ཀྱི་ཡོད་པ་མ་ཟད། མི་ཕན་ཚུན་བར་གྱི་འབྲེལ་ལམ་བཟང་དུ་གཏོང་བ་དང་མི་ཚེ་དོན་དང་ལྡན་པ་སྐྱེལ་བར་ཡང་ཕན་ཐོགས་ཀྱི་ཡོད་སྐོར་གསུངས་འདུག
མཐོ་སློབ་ཁང་དེའི་རྩོམ་རིག་དང་སྐད་ཡིག རིག་གཞུང་བཅས་ཀྱི་ལྷན་ཁང་གི་སློབ་དཔོན་ནཱི་གྷེལ་ཧ་ཊོན་གྱིས། མཐོ་སློབ་ཁང་གིས་གཟེངས་རྟགས་དེ་༧གོང་ས་མཆོག་ལ་ཕུལ་བ་དེས་མི་རིགས་འདྲ་མིན་བར་གདུང་སེམས་མཉམ་བསྐྱེད་དང་མཛའ་མཐུན། བྱམས་བརྩེ། བདེ་སྐྱིད། རང་ཚུགས་བཅས་ཀྱི་གལ་གནད་སྐོར་བཀའ་སློབ་ལམ་སྟོན་དང་ལས་དོན་སྤེལ་མཁན་འཛམ་གླིང་གི་ཆོས་ལུགས་དབུ་ཁྲིད་གཅིག་ལ་ཆེ་མཐོང་གནང་བ་ཡིན་སྐོར་གསུངས་འདུག །
གསར་འགོད་པ་སྐལ་བཟང་དོན་གྲུབ།
