༧གོང་ས་མཆོག་ལ་ནོ་སྦེལ་ཞི་བདེའི་གཟེངས་འབུལ་བཞེས་མཛད་ནས་ལོ་ ༣༠ འཁོར་བའི་དུས་ཆེན་མཛད་སྒོ། 

༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ཧྲིལ་པོ་༣༠ འཁོར་བའི་དུས་དྲན་མཛད་སྒོའི་ཐོག སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་རྒྱལ་པི་དབང་རྒྱལ་གྱིས་“༧གོང་ས་མཆོག་གི་མཚན་དང་འཚེ་མེད་ཞི་བ་གཉིས་དོན་གཅིག་མིང་གི་རྣམ་གྲངས་ཡིན་པ་དང་། ཁོང་གི་སྐུ་གསུང་ཐུགས་ཀྱི་མཛད་སྤྱོད་ནི་སྐྱེ་འགྲོ་སེམས་ཅན་ཡོངས་ཀྱི་བདེ་སྐྱིད་ཀྱི་འབྱུང་ཁུངས་ཡིན་”སྐོར་གསུངས་སོང་། 

དེ་རིང་སྟེ་ཕྱི་ཟླ་༡༢ པའི་ཚེས་༡༠ ཉིན་༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ཧྲིལ་པོ་༣༠ འཁོར་བའི་ཉིན་མོ་ཡིན་སྟབས། དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱིས་དུས་ཆེན་སྲུང་བརྩི་ཞུ་བའི་གཞུང་འབྲེལ་མཛད་སྒོ་ཞིག་འཚོགས་སོང་། 

ཐེངས་འདིའི་དམིགས་བསལ་མཛད་སྒོའི་སྐུ་མགྲོན་གཙོ་བོ་ལ། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་རྒྱལ་པི་དབང་རྒྱལ་དང་ལས་གྲོགས་རྣམ་པ། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིངྒ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་གཙོས་མཛད་གཙོ་རྣམ་པ་དང་། སྤྱི་འཐུས་ཚོགས་གཙོ་པདྨ་འབྱུང་གནས་གཙོས་སྤྱི་འཐུས་རྣམ་པ། གཞན་ཡང་དྷ་སའི་སེར་སྐྱ་མི་མང་དང་སློབ་མ་བཅས་མཉམ་ཞུགས་གནང་སོང་།

སྤྱི་འཐུས་ཚོགས་གཙོ་པདྨ་འབྱུང་གནས་ཀྱིས་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་བའི་ནང་། ༧གོང་ས་མཆོག་གི་བླ་ན་མེད་པའི་མཛད་རྗེས་སྐོར་ལ་“མཉམ་མེད་ཐུབ་པའི་དབང་པོའི་ལྟ་སྤྱོད་དྲི་མ་མེད་པའི་ཀློང་ནས་འཁྲུངས་པའི་རླབས་ཆེན་གྱི་ཐུགས་བསྐྱེད་བཟང་པོས་འགྲོ་བ་ཀུན་ལ་རང་ཆས་སུ་ཡོད་པ་བདེ་བ་འདོད་ཅིང་སྡུག་བསྔལ་མི་འདོད་པའི་མངོན་འདོད་ཀྱི་རྒྱུ་བྱམས་བརྩེའི་ནུས་སྟོབས་གཞི་རྩར་བཟུང་ནས། འགྲོ་བ་མིའི་ལྷན་སྐྱེས་བཟང་སྤྱོད་ཀྱི་ནུས་པ་གོང་སྤེལ་མཛད་ཐོག་ཁོར་ཡུག་སྲུང་སྐྱོབ་དང། ཆོས་ལུགས་མཐུན་སྒྲིལ། དམག་འཐབ་དང་འཁྲུག་རྩོད་ཞི་ཐབས་སོགས་འཛམ་གླིང་ཞི་བདེ་ལ་སྨན་པའི་ཀུན་ཁྱབ་འགན་འཁུར་གྱི་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་ཙམ་དུ་མ་ཟད། དུས་ཟིང་ཧ་ཅང་ཆེ་བའི་ཆེས་སྙིགས་དུས་ཀྱི་འཛམ་གླིང་ས་ཆེན་འདིར་བོད་ཆོས་ལྡན་ཞིང་གི་རིག་གཞུང་བཟང་པོ་རྣམས་མི་ཉམས་རྒྱུན་འཛིན་གྱིས་འཛམ་གླིང་ཡང་རྩེའི་བོད་གངས་ཅན་ལྗོངས་འདི་ཉིད་མ་འོངས་ཞི་བདེའི་བསྟི་གནས་ཤིག་ཏུ་བསྐྲུན་རྒྱུའི་བླ་ན་མེད་པའི་དགོངས་གཞི་ཟབ་མོས་བོད་འབངས་རྣམས་འཚེ་མེད་ཞི་བའི་ལམ་དུ་བཀྲི་བར་མཛད་གནང་།

“ལྷག་པར་གཉིས་སྨན་དབུ་མའི་ལམ་གྱི་མཛད་བྱུས་བཟང་པོས་བོད་རྒྱའི་དཀའ་རྙོག་སེལ་ཐབས་མཛད་པའི་རླབས་ཆེན་གྱི་མཛད་བཟང་ལ་བློ་ལྡན་ཀུན་གྱིས་མངོན་པར་བསྟོད་དེ་ནོ་སྦེལ་ཞི་བདེའི་གཟེངས་རྟགས་དེ་བཞིན་འབུལ་ལམ་ཞུས་པ་བཞིན་སྐྱེ་འགྲོའི་ཕན་བདེའི་སླད་དུ་དགྱེས་བཞེས་མཛད་པ་སོགས་གསང་གསུམ་ཕན་བདེའི་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་པར་བཀའ་དྲིན་བླ་མེད་དུ་ཆེ་ཆེ་ཆེ་ཞེས་ལན་བརྒྱར་ཞུ་རྒྱུ་ཡིན་”ཞེས་འཁོད་ཡོད་འདུག 

དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡང་ཡིན་སྟབས། དེ་དང་འབྲེལ་བའི་ཐད་ལ་གསུང་འཕྲིན་ནང་འཁོད་དོན། “དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་སྲུང་བརྩི་ཞུ་བའི་དུས་ཚིགས་གལ་ཆེ་ཞིག་ཀྱང་ཆགས་ཡོད་སྟབས་དེ་དང་འབྲེལ་ནས་ཞུ་རྒྱུར། འདི་ལོའི་ཟླ་༡༠ པའི་ཚེས་༡ ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་བཙུགས་ནས་མི་ལོ་༧༠ འཁོར་བའི་དུས་ཚིགས་ཡིན་སྟབས། དེའི་སྔ་རོལ་ཟླ་བ་༩ པའི་ནང་རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་ཟེར་བས་ལོ་ངོ་༧༠ རིང་རྒྱ་ནག་དམར་གཞུང་གིས་འགྲོ་བ་མིའི་ཐོབ་ཐང་གོང་སྤེལ་བཏང་ཚུལ་གྱི་རྒྱབ་ཤ་དཀར་པོ་ཟེར་བ་བཏོན་ཡོད། དེའི་ནང་དབང་ཆ་གཅིག་བསྡུས་རྒྱ་ནག་དམར་གཞུང་གི་འགོ་གཙོ་རིམ་པའི་དུས་སུ་འགྲོ་བ་མིའི་ཐོབ་ཐང་གོང་སྤེལ་བཏང་ཚུལ་བརྗོད་ཡོད་ཀྱང་ད་བར་རྒྱལ་སྤྱིའི་ཐོག་རྒྱ་ནག་དམར་གཞུང་ནི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་མཁན་རྒྱལ་ཁབ་སྡུག་ཤོས་ཀྱི་མདུན་གྲལ་དུ་ལོ་ལྟར་སླེབས་བཞིན་ཡོད་པ་དེས་ཁོང་ཚོའི་སྐད་ཆ་དེ་རྫུན་གཏམ་ཡིན་པ་གསལ་པོ་ཡིན།”

གཞན་ཡང་གསུང་འཕྲིན་ནང་”རྒྱ་ནག་གཞུང་གིས་འདས་ལོ་ ༦༠ རིང་བོད་ནང་འགྲོ་བ་མིའི་གཞི་རྩའི་ཐོབ་ཐང་རྣམས་རྡོག་རོལ་དང་། བོད་ཀྱི་ཆོས་དང་རིག་གཞུང་སྐད་ཡིག་སོགས་རྩ་གཏོར། བོད་མི་རྣམས་ལ་གདུག་རྩུབ་དྲག་པོས་མནར་གཅོད་ཚད་མེད་བཏང་བ་སོགས་ད་དུང་རྒྱུན་ཆད་མེད་པར་བྱུང་དང་འབྱུང་བཞིན་པར་བརྟེན། འགན་ཡོད་འཛམ་གླིང་མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ལ་སོགས་པའི་རྒྱལ་སྤྱིའི་ཚོགས་སྡེ་ཁག་གི་ངོས་ནས་བོད་ནང་གི་གནས་སྟངས་རྟོག་ཞིབ་ནན་པོ་གནང་སྟེ་རྒྱ་ནག་དམར་གཞུང་གི་བྱ་སྤྱོད་ངན་པ་དག་རྒྱ་ཡན་དུ་མ་བཏང་བར། རྒྱ་ནག་གི་རྒྱལ་ཁབ་དེ་བཞིན་འགྲོ་བ་མིའི་ཐོབ་ཐང་ལ་ཧ་ཅང་བརྩི་མཐོང་ཆེ་བའི་ཡར་ཐོན་ཅན་གྱི་རྒྱལ་ཁབ་གཞན་དང་མཚུངས་པ་ཞིག་ཡོང་ཕྱིར་མཉམ་ཁྲིད་གནང་དགོས་པའི་འབོད་སྐུལ་ཞུ་རྒྱུ་ཡིན”ཞེས་འཁོད་ཡོད་འདུག 

མཛད་སྒོའི་ཐོག་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིངྒ་ཡིས་གསུང་བཤད་གནང་སོང་བ་དང་། ཁོང་གིས་[ང་ཚོས]༧གོང་ས་མཆོག་ལ་འབུལ་རྒྱུའི་ལེགས་སྐྱེས་ཡག་ཤོས་དེ་ནི་ཁོང་གི་བཀའ་གསུང་སྒྲུབ་རྒྱུ་དེ་ཡིན་པ་དང་། ༧གོང་ས་མཆོག་གི་བཀའ་གསུང་སྒྲུབ་པ་ཡིན་ན། སྐུ་ཚེ་འདིའི་རིང་བོད་དོན་བདེན་མཐའ་གསལ་ཐུབ་པའི་རེ་བ་ཡོད་སྐོར་གསུངས་སོང་། 

དེ་ནས་སྲིད་སྐྱོང་བློ་བཟང་སེང་གེས་བཀའ་ཤག་གི་གསུང་བཤད་སྒྲོགས་སྦྱང་གནང་སོང་བ་དང་། གསུང་བཤད་ནང་ ༸གོང་ས་མཆོག་གིས་འཛམ་གླིང་ཞི་བདེ་དང་སྐྱེ་འགྲོ་ཀུན་ལ་བདེ་སྐྱིད་བསྐྲུན་ཆེད། བྱམས་པ་དང་། སྙིང་རྗེ། བཟོད་བསྲན། གཞན་ཕན་སོགས་རྒྱུད་ལ་འཇགས་ཐབས་ཀྱི་འགྲོ་བ་མིའི་བཟང་སྤྱོད་གོང་སྤེལ་མཛད་བཞིན་པ་དང་། ཆོས་ལུགས་ནང་ཕན་ཚུན་མཐུན་སྒྲིལ་དག་སྣང་སྦྱོང་ཐབས་སུ་ཁ་ཞེ་གཉིས་མེད་ཀྱི་གུས་བརྩི་དང་ཡི་རང་བསྔགས་བརྗོད་ཞུ་དགོས་པའི་ལམ་སྟོན་སྣེ་ཁྲིད། འཛམ་གླིང་ཞི་བདེ་དང་འགྲོ་བ་ཡོངས་ལ་བདེ་སྐྱིད་བསྐྲུན་རྒྱུར་ཆོས་ལུགས་ཁག་གིས་ཞབས་འདེགས་ཞུ་ཐུབ་པའི་ཐུགས་རེ་དང་ཡིད་ཆེས་གནང་གི་ཡོད་པའི་ཐོག རྒྱལ་སྤྱིའི་ནང་འགྲོ་བ་མིའི་ཐོབ་ཐང་དང་། ཁོར་ཡུག་གི་གནད་དོན་སོགས་རྩོད་རྙོག་ཇི་ཡོད་རྣམས་གྲོས་མོལ་གྱི་ལམ་ནས་སེལ་དགོས་པ། རྡུལ་ཕྲན་མཚོན་ཆ་དང་དམག་འཁྲུག་མེད་པའི་འཛམ་གླིང་ཞི་བདེ་སྒྱུར་བ།  ལྷག་པར་དུ་རྒྱ་གཞུང་གིས་བོད་ལ་བཙན་འཛུལ་བྱས་པ་ནས་བཟུང་གནས་སྟངས་ཛ་དྲག་ཆེ་ཆུང་ཇི་ཡིན་ལ་མ་ལྟོས་པར་དུས་རྟག་ཏུ་ཕན་ཚུན་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་ནས་འགྲིག་འཇགས་ཡོང་ཐབས་མཛད་པ་སོགས་ཀྱི་མཛད་རྗེས་རྣམས་འཁོད་འདུག 

བོད་ནང་གི་གནས་སྟངས་སྐོར་ལ་བཀའ་ཤག་གི་གསུང་འཕྲིན་ནང་འཁོད་དོན། “བོད་གངས་ཅན་གྱིས་གཙོས་པའི་འཛམ་གླིང་ཡུལ་གྲུ་མང་པོའི་ནང་དབང་འཛིན་པ་ཚོས་འགྲོ་བ་མིའི་ཐོབ་ཐང་བརྡལ་བཤིག་ཚབས་ཆེན་བཏང་དང་གཏོང་བཞིན་པའི་ཡ་ང་བའི་གནས་སྟངས་འོག་གནས་མུས་ཡིན། བོད་ནང་བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་གཉིས་ཀྱི་འབྲུ་དོན་བཞིན་བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་བཅས་ཉམས་པ་སླར་གསོ་མི་ཉམས་གོང་སྤེལ་གྱི་མངོན་འདོད་བཏོན་པ་ཙམ་གྱིས་འཛིན་བཟུང་དང་བཙོན་འཇུག་སོགས་བྱེད་པའི་གནས་སྟངས་ཡོད་ནའང་། བོད་མི་ཚོས་རྒྱ་གཞུང་གི་དྲག་གནོན་གྱི་སྲིད་བྱུས་ལ་རྣམ་པ་དང་གཞི་རྒྱ་ཆེ་ཆུང་འདྲ་མིན་གྱི་ཐོག་ནས་ཞི་བའི་ངོ་རྒོལ་བསྟུད་མར་བྱས་ཡོད། ལྷག་པར་དུ་ཕྱི་ལོ་༢༠༠༩ ནས་བཟུང་ཉེ་ཆར་ཕྱི་ལོ་༢༠༡༩ ཟླ་༡༡ ཚེས་༢༦ ཉིན་མདོ་སྨད་རྔ་པ་རྨེའུ་རུ་མ་ཡུལ་ཚོ་ནས་ཡིན་པའི་རང་ལོ་༢༤ ཙམ་སོན་པའི་བུ་ཡོན་ཏན་ལགས་ཀྱིས་རང་ལུས་མེར་སྲེག་བཏང་གནང་བ་བཅས་ད་བར་བོད་ནང་བོད་མི་༡༥༤ ཡིས་རང་ལུས་མེར་སྲེག་བཏང་གནང་ཡོད་པ་མ་ཟད། ཁོང་རྣམ་པས་རང་ལུས་མེར་སྲེག་གཏོང་གནང་བའི་སྐབས་སུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་། བོད་མི་ལ་རང་དབང་དགོས་ཞེས་བོད་མི་རིགས་ཀྱི་མངོན་འདོད་ཀྱི་འབོད་སྒྲ་བསྒྲགས་ཡོད།”

གསུང་འཕྲིན་ནང་༢༠༢༠ ལོ་དེ་༧གོས་ས་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་ཡིན་པ་དང་། “ལོ་དེའི་ནང་བོད་མི་ཡོངས་ཀྱིས་༸རྒྱལ་བའི་སྐུ་ཚེ་བསྐལ་བརྒྱར་བརྟན་པ་དང་བོད་མིའི་སྤྱི་མཐུན་བསོད་ནམས་གསོག་ཆེད་དུ་ཆོས་ཕྱོགས་ཀྱི་དགེ་སྒྲུབ་ཀྱི་བྱ་བ་སྔར་ལྷག་བསྒྲུབ་དགོས་པ་མ་ཟད། ༸རྒྱལ་བའི་ཐུགས་ཀྱི་དམ་བཅའ་བཞིས་གཙོས་པའི་མཛད་པ་འཕྲིན་ལས་རྣམས་གོང་འཕེལ་གཏོང་རྒྱུར་རང་འཁྲིའི་ལས་འགན་དང་བཀའ་བཞིན་སྒྲུབ་པའི་མཆོད་པར་བསམས་ཏེ་འབད་བརྩོན་ཞུ་དགོས་པ་མ་ཟད། བོད་ཀྱི་རྩ་དོན་ལ་ཕན་པའི་ཆབ་སྲིད་ལས་དོན་གང་མང་སྤེལ་དགོས་ཅིང་། ཆོལ་གསུམ་བོད་རིགས་ཡོངས་རྫོགས་དམ་ཚིག་གཅིག་སྒྲིལ་དགོས་པའི་བཀའ་དགོངས་བཞིན་བོད་འབངས་ཡོངས་ནས་སྔར་ལྷག་ཞུ་རྒྱུའི་ཁས་ལེན་བརྟན་པོ་འཇོག་རྒྱུ་ཡིན་”ཞེས་འཁོད་འདུག 

སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་རྒྱལ་པི་དབང་རྒྱལ་གྱིས་༧གོང་ས་མཆོག་མཚན་དང་འཚེ་མེད་ཞི་བ་གཉིས་དོན་གཅིག་མིང་གི་རྣམ་གྲངས་ཡིན་པ་དང་། ཁོང་གི་སྐུ་གསུང་ཐུགས་ཀྱི་མཛད་སྤྱོད་ནི་སེམས་ཅན་ཡོངས་ཀྱི་བདེ་སྐྱིད་ཀྱི་འབྱུང་ཁུངས་ཡིན་ཚུལ་གསུངས་རྗེས། ལ་དྭགས་མི་མང་ནས་རྒྱ་ནག་གིས་བོད་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སྐྱོན་བརྗོད་ཡོད་པ་དང་། ལ་དྭགས་རྒྱ་གར་དབུས་གཞུང་གི་ཐད་ཀའི་འཛིན་སྐྱོང་ས་ཁུལ་དུ་གྱུར་ཡོད་སྟབས། ལ་དྭགས་མི་མང་དང་བོད་མིའི་འབྲེལ་ལམ་བཟང་དུ་གཏོང་རྒྱུ་ཁག་ཐེག་བྱེད་རྒྱུ་ཡིན་པ། དེ་བཞིན་སྲིད་སྐྱོང་བློ་བཟང་སེང་གེ་དང་ཁོང་གི་བཀའ་ཤག་ལོ་རྗེས་མར་ལ་དྭགས་ལ་ཡོང་བའི་མགྲོན་བྱས་པ་ལྟར། ཡོང་ཐུབ་པའི་རེ་བ་ཡོད་སྐོར་སོགས་གསུངས་སོང་། ། 

གསར་འགོད་པ་དཀོན་མཆོག་རབ་བརྟན།