༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་འབུལ་དགོས་པའི་གྲོས་ཆོད་བཞག་འདུག

རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས། རྒྱ་གར་གཞུང་གིས་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་དེ་འབུལ་དགོས་པའི་གྲོས་ཆོད་བཞག་ཡོད་པ་རེད་འདུག དེ་བཞིན་རྒྱ་གར་གྱི་གྲོས་ཚོགས་ནང་དུ་ཨ་རིའི་གྲོས་ཚོགས་ལྟར་བོད་དོན་ཁྲིམས་འཆར་ཞིག་འདོན་དགོས་པའི་གྲོས་སྡུར་ཡང་བྱས་ཡོད་འདུག 

ཟླ་༨ པའི་ཚེས་༡༨ ཉིན་རྒྱ་གར་གྱི་བརྒྱུད་ལམ་ཁག་ཅིག་ཏུ་གནས་ཚུལ་སྤེལ་གསལ། ཉེ་ཆར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་སྐབས་སུ། རྒྱ་གར་གཞུང་གིས་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་(Bharat Ratna)འབུལ་དགོས་པ་དང་། དེ་བཞིན་གྲོས་ཚོགས་གོང་འོག་གཉིས་མཉམ་འཛོམས་ཐོག་༧གོང་ས་མཆོག་བཀའ་སློབ་གནང་བར་གདན་འདྲེན་ཞུ་དགོས་པའི་གྲོས་ཆོད་བཞག་ཡོད་པ་རེད་འདུག 

གྲོས་ཆོད་དེ་ཟླ་འདིའི་མགོ་སྟོད་དུ་གཏན་འབེབས་བྱས་ཏེ་རྒྱ་གར་གཞུང་ལ་ཕུལ་ཟིན་ཡོད་པ་རེད་འདུག 

རྒྱ་གར་གྲོས་ཚོགས་འཐུས་མའི་བོད་དོན་རྒྱབ་སྐྱོར་ཚོགས་པའི་ནང་དུ་རྒྱ་གར་གྱི་སྲིད་དོན་ཚོགས་པ་འདྲ་མིན་གྱི་འཐུས་མི་ཡོད་འདུག་པ་དང་། རྒྱ་གར་བྱང་ཤར་ཨ་རུ་ན་ཅཱལ་མངའ་སྡེ་ནས་ཡིན་པའི་དབུས་གྲོས་ཚོགས་འོག་མའི་འཐུས་མི་ཏ་པཱིར་གྷའོ་ཡིས་ལྷན་ཚོགས་ཀྱི་ཚོགས་མི་ཚོས་བོད་དོན་དྲིལ་བསྒྲགས་ཆེད་དུ་ལས་འགུལ་ཆེན་མོ་ཞིག་གོ་སྒྲིག་གནང་དགོས་པ་དང་། གྲོས་ཚོགས་ནང་དུ་༧གོང་ས་མཆོག་ཞི་བདེ་དང་བྱམས་བརྩེའི་བརྗོད་གཞི་ཐོག་ཏུ་བཀའ་སློབ་གནང་བར་གདན་འདྲེན་ཞུ་དགོས་པའི་བསམ་འཆར་བཏོན་གནང་འདུག 

ལྷན་ཚོགས་དེའི་ཚོགས་གཙོ་གྲོས་ཚོགས་གོང་མའི་འཐུས་མི་སུ་ཇཱི་ཐ་ཀུ་མར་གྱིས། གྲོས་ཚོགས་འཐུས་མི་ཚོས་གྲོས་ཚོགས་ནང་དང་ཕྱི་ལ་ཡང་བོད་དོན་གླེང་སློང་བྱེད་པའི་སྐུལ་མ་བྱས་འདུག ད་དུང་ཁོང་གིས་གསུང་དོན་ལ་ལྷན་ཚོགས་ཀྱིས་རྒྱ་གར་གཞུང་གིས་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་དེ་འབུལ་དགོས་པའི་སྐུལ་མའི་ལས་འགུལ་ཆེད་དུ་མཚན་རྟགས་བསྡུ་རུབ་ཀྱི་ལས་འགུལ་ཞིག་གོ་སྒྲིག་བྱས་ཡོད་པ་དང་། དེའི་ཐོག་གྲོས་ཚོགས་འཐུས་མི་མང་པོ་ཞིག་གིས་རྒྱབ་སྐྱོར་བྱས་ཡོད་ཁར། ཁག་ཅིག་གིས་བརྙན་ཐུང་བཟོས་ནས་ལས་འགུལ་དེར་རྒྱབ་སྐྱོར་བྱས་ཡོད་པ། ཁོ་ཚོས་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ཚོགས་གཙོ་གཉིས་ལ་ཕྱག་ཡིག་ཕུལ་ནས། གྲོས་ཚོགས་གོང་འོག་གཉིས་མཉམ་འཛོམས་ཐོག་༧གོང་ས་མཆོག་བཀའ་སློབ་གནང་བར་གདན་འདྲེན་ཞུ་དགོས་པའི་སྐུལ་མ་བྱེད་རྒྱུ་ཡིན་སྐོར་གསུངས་འདུག 

དེ་བཞིན་ལྷན་ཚོགས་ཀྱི་ཚོགས་མི་ཚོས་ཉེ་ཆར་ཨ་རིའི་གྲོས་ཚོགས་ནང་བཏོན་པའི་བོད་དོན་རྒྱབ་སྐྱོར་གྱི་ཁྲིམས་འཆར་ཞིག་གི་ཐོག་གྲོས་སྡུར་བྱས་ཏེ། རྒྱ་གར་གྲོས་ཚོགས་ནང་དུ་ཡང་ཁྲིམས་འཆར་དེ་མཚུངས་ཤིག་འདོན་དགོས་པའི་གྲོས་སྡུར་བྱས་ཡོད་འདུག ལྷན་ཚོགས་ཀྱིས་ཕྱི་ལོ་༢༠༡༤ ལོར་གཏན་འབེབས་བྱས་པའི་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ཐོག་གྲོས་སྡུར་བྱས་ཏེ། གྲོས་ཚོགས་འཐུས་མི་ཚོས་བོད་མིའི་གཞིས་ཆགས་ཁག་ཏུ་སྐོར་སྐྱོད་དུ་ཕེབས་པ་དང་། དེ་བཞིན་བོད་མི་རྣམས་ལ་ལམ་ཁ་དང་གློག འཐུང་ཆུ་སོགས་ཀྱི་མཐུན་རྐྱེན་སྦྱོར་སྤྲོད་བྱུང་ཆེད་དུ། རྫོངས་ཁག་གི་འཛིན་སྐྱོང་ལས་ཁུངས་དང་མངའ་སྡེ་ཁག་གི་གཞུང་ལ་འབྲེལ་བ་བྱེད་དགོས་པའི་སྐུལ་མ་བྱས་ཡོད་སྐོར་བརྗོད་འདུག 

ཕྱི་ལོ་༢༠༡༩ ལོར་རྒྱ་གར་གྱི་དཔོན་རིགས་ཁག་ཅིག་གིས་༧གོང་ས་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་དེ་འབུལ་དགོས་པའི་སྙན་ཞུ་གཞུང་ལ་ཕུལ་བ་དང་། གྲོས་ཚོགས་འཐུས་མི་ཉིས་བརྒྱས་རྒྱབ་སྐྱོར་གྱི་མཚན་རྟགས་བརྒྱབ་ཏེ། གསར་ལམ་ཁག་ཏུ་བཀྲམ་འདུག །

གསར་འགོད་པ་སྐལ་བཟང་དོན་གྲུབ།