༧ཆོས་རྗེ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་དཔལ་བཟང་པོ་མཆོག་གི་བཀའ་དྲིན་རྗེས་དྲན་གྱི་འདས་མཆོད་སྨོན་ལམ་སྐབས་བཅུ་བདུན་པ།

ཆོས་བརྡ་གསལ་བསྒྲགས།

༄༅།། རིས་མེད་བསྟན་པའི་གསལ་བྱེད་མཁན་ཆེན་དམ་པ་༧ཆོས་རྗེ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་དཔལ་བཟང་པོ་མཆོག་གི་བཀའ་དྲིན་རྗེས་དྲན་གྱི་འདས་མཆོད་སྨོན་ལམ་སྐབས་བཅུ་བདུན་པ།

ཕྱི་ལོ་ 2020 ཟླ ༡ པོའི་ཚེས 19 ནས 21 བར་ཏེ་ཉིན་གསུམ་རིང་། གནས་མཆོག་རྡོ་རྗེ་གདན་བྱང་ཆུབ་ཤིང་དྲུང་དུ་བླ་མ་མཆོད་པ་དང་། རྡོར་སེམས་སྒོམ་བཟླས། འཇམ་དཔལ་མཚན་བརྗོད། བཟང་སྤྱོད་སྨོན་ལམ་སོགས་གསོག་བསྒྲུབ་ཀྱི་སྒོ་ནས་འཚོགས་གཏན་ཁེལ་བ་ལ། འདས་མཆོད་སྨོན་ལམ་གོ་སྒྲིག་ཚོགས་པས་སྨོན་ལམ་ཞལ་འདེབས་མ་དངུལ་ནས་འགྲོ་སོང་གི་ཐུགས་འགན་གཙོར་བཞེས་ཐོག འཚོགས་ཉིན་སྔ་གཞུག་བསྡོམ་ཉིན་ལྔའི་རིང་གི་དགེ་འདུན་པའི་བཞུགས་ཤག་དང་བཞེས་ལག་སོགས་རྙིང་མ་དགོན་པར་གྲ་སྒྲིག་ཡོད་པའི་ཁར། གྲྭ་མང་འཚོགས་ཞུགས་ཡོངས་ལ་སྐུ་ཡོན་དང་མང་ཇ་བཞེས་བག་སོགས་ཀྱི་བསྙེན་བཀུར་གང་ནུས་འཆར་ཅན་བཞིན་ཞུ་འཆར་ལགས་ན། རྒྱ་བལ་འབྲུག་གསུམ་སོགས་ནས་ཆེད་དུ་གདན་ཞུ་བྱས་པའི་གྲྭ་ཚང་ཁག་གི་གཙོས། ཕྱོགས་དང་རིས་སུ་མ་ཆད་པའི་མཁན་བླ་སྤྲུལ་དགེ་བའི་བཤེས་གཉེན་རྣམས་ཀྱིས་དབུས་གྲྭ་བཙུན་སྔགས་གསུམ་སོགས་གང་མང་མང་ཕེབས་ཐུབ་རྒྱུར་གསོལ་འདེབས་ཞུ་རྒྱུ་དང་། དམིགས་བསལ་བླ་རུང་ཆོས་སྒར་ཆེན་མོའི་སློབ་མ་སློབ་བརྒྱུད་དང་བཅས་པ་འཚོགས་དུས་ཀྱི་ཉིན་བཅུའི་སྔོན་ནམ་གང་ཐུབ་ཀྱིས་སྔ་ཙམ་ཕེབས་ཏེ་གོ་སྒྲིག་ཚོགས་མི་རྣམས་ལ་མཐུན་འགྱུར་དང་རོགས་ཕན་གང་ ནུས་བསྩལ་གནང་ཡོང་རེ་བཅས་ཀྱི་གསལ་བསྒྲགས་སུ།