༧དཔལ་ས་སྐྱའི་སྨོན་ལམ་ཆེན་མོ་དབུ་འཛུགས་གནང་སོང་།
ཟླ་འདིའི་ཚེས་༢༥ ཉིན་ནས་ཉིན་གྲངས་བཅུའི་རིང་། གནས་མཆོག་རྡོ་རྗེ་ལྡན་དུ་༧དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ཐེངས་༣༡ པ་དེ་ཉིད་དབུ་འཛུགས་གནང་འདུག
༧དཔལ་ས་སྐྱའི་སྨོན་ལམ་ཆེན་མོ་དབུ་འཛུགས་མ་བྱས་གོང་དུ་༧དཔལ་ས་སྐྱའི་ཁྲི་འཛིན་རྣམ་གཉིས་དང་སྦྱིན་བདག་སོགས་ཀྱིས་སྟོན་པ་རིན་པོ་ཆེ་ལ་ཞལ་ཟས་དང་ན་བཟའ་སོགས་ཕུལ་ཡོད་འདུག་ལ།
ཐེངས་འདིའི་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོའི་ཐོག་ཏུ་༧དཔལ་ས་སྐྱའི་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། སྐྱབས་མགོན་གོང་མ་ཁྲི་འཛིན་རྣམ་གཉིས་གཙོས་པའི་གདུང་སྲས་བཞི་པོ་དང་། རྗེ་བཙུན་མ་རྣམ་པ་གཉིས། རྒྱ་བལ་འབྲུག་གསུམ་ནང་ཡོད་པའི་ས་སྐྱའི་གདན་ས་ཁག་ནས་ཕེབས་པའི་དགེ་འདུན་པ་དང་བཙུན་མ། ལྷག་པར་དུ་རྡོ་རྗེ་གདན་ལ་གསུང་ཆོས་སུ་ཕེབས་མཁན་རིས་མེད་ཆོས་བརྒྱུད་ཁག་གི་དགེ་འདུན་པ་དང་སེར་སྐྱ་མི་དམངས་སྟོང་ཕྲག་མང་པོ་མཉམ་ཞུགས་བྱས་ཡོད་འདུག
ས་སྐྱའི་སྨོན་ལམ་གོ་སྒྲིག་ཚོགས་ཆུང་གི་དྲུང་ཆེ་བླ་མ་བསོད་ནམས་རིན་ཆེན་གྱིས་ལ་དྭགས་དང་སྤྱི་་ཏི། ཧི་མ་ཅལ་དང་ལྡེ་ར་ལྡུན་སོགས་ནས་ས་སྐྱ་རང་གི་དགེ་འདུན་པ་༢༣༠༠ ཕེབས་ཡོད་པ་དང་། དེ་མིན་༧གོང་ས་མཆོག་གི་གསུང་ཆོས་སུ་ཕེབས་མཁན་མང་པོ་ཡོད་པར་བརྟེན། དགེ་འདུན་པ་ཁྱོན་བསྡོམས་༦༧༠༠ ལ་སྐུ་འགྱེད་འབུལ་རྒྱུའི་གྲ་སྒྲིག་བྱས་ཡོད་རབས་ཨེ་ཤི་ཡ་རང་དབང་རླུང་འཕྲིན་ཁང་ལ་བརྗོད་འདུག
༧དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ནི་ཕྱི་ལོ་༡༩༩༣ ལོ་སྟོན་པ་ཤཱཀྱ་ཐུབ་པ་སྐུ་བལྟམས་་ཡུལ་ལུམྦྷི་ནིར་ཐོག་མ་འགོ་བཙུགས་ཀྱིས་ལོ་ལྟར་འཚོགས་སྲོལ་ཡོད་འདུག་ལ། ཉེ་བའི་ལོ་ཁ་ཤས་སྔོན་ནས་སྟོན་པ་སངས་རྒྱས་པའི་གནས་མཆོག་རྡོ་རྗེ་གདན་དུ་ཚོགས་ཀྱི་ཡོད་འདུག།
གསར་འགོད་པ། བློ་བཟང་རྒྱ་མཚོ།
