༧པན་ཆེན་རིན་པོ་ཆེ་གློད་གྲོལ་གཏོང་དགོས་པའི་ལས་འགུལ་སྤེལ་སོང་།

༧པན་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་དགུང་ལོ་དྲུག་ཐོག་ཁོང་དང་ཁོང་གི་སྐུ་འཁོར་རྒྱ་ནག་གཞུང་གིས་བཙན་ཁྲིད་བྱས་ཏེ་མི་ལོ་༢༧ འཁོར་བའི་ཉིན་མོར། ཁོང་དང་སྐུ་འཁོར་རྣམ་པ་གློད་གྲོལ་དགོས་པའི་ལས་འགུལ་དབུས་བོད་ཀྱི་བུད་མེད་ལྷན་ཚོགས་དང་རྡ་ས་ས་གནས་བུད་མེད་ལྷན་ཚོགས་ནས་སྤེལ་བ་དང་། དེ་བཞིན་ས་གནས་ཁག་༥༨ ཆ་ཚང་ནས་ཀྱང་ལས་འགུལ་སྤེལ་གྱི་ཡོད་འདུག 

ཟླ་༥ པའི་ཚེས་༡༧ ཉིན་དྷ་ས་མེག་གྷན་གྱི་ཁྲོམ་གཞུང་དུ། དབུས་བོད་ཀྱི་བུད་མེད་ལྷན་ཚོགས་དང་ས་གནས་བུད་མེད་ལྷན་ཚོགས་གཉིས་ཀྱི་གོ་སྒྲིག་འོག ༧པན་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་དང་ཁོང་གི་སྐུ་འཁོར་རྒྱ་ནག་གཞུང་གིས་བཙན་ཁྲིད་བྱས་ཏེ་མི་ལོ་༢༧ འཁོར་བའི་ཉིན་མོར། ཁོང་རྣམ་པ་གློད་གྲོལ་དགོས་པའི་དགོས་འདུན་བཏོན་པ་དང་མཉམ་དུ། སྔ་དྲོ་ཆུ་ཚོད་༡༠ པ་ནས་ཕྱི་དྲོ་ཆུ་ཚོད་༥ པ་བར་ཟས་བཅད་ངོ་རྒོལ་གྱི་ལས་འགུལ་སྤེལ་སོང་།

ཉིན་མོ་འདིར་བོད་ཀྱི་བུད་མེད་ལྷན་ཚོགས་ནས་རྒྱལ་སྤྱིའི་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་ཚན་པ། བྱིས་པའི་ཐོབ་ཐང་ཚོགས་ཆུང་། བཙན་དབང་འོག་གར་སོང་ཆ་མེད་དུ་གྱུར་པའི་ལས་དོན་རྟོག་ཞིབ་ཚོགས་ཆུང་། མནར་གཅོད་ཁ་གཏད་ཚོགས་ཆུང་སོགས་རྒྱལ་ཚོགས་ཀྱི་ལས་དོན་ཚོགས་ཆུང་ཁག་དང་། གྲོས་ཚོགས་འཐུས་མི་རྣམ་པ། རྒྱལ་སྤྱིའི་དབུ་འཁྲིད་རྣམ་པ། རྒྱལ་སྤྱིའི་ནང་ཡོད་པའི་བོད་དོན་རྒྱབ་སྐྱོར་ཚོགས་པ་བཅས་ལ་དགོས་འདུན་ཁག་གསུམ་ལ་རྒྱབ་སྐྱོར་ཡོང་བའི་རེ་སྐུལ་ཞུས་སོང་བ་དང་། དེ་དག་ནས། ༡༽ བོད་རྒྱའི་དཀའ་རྙོགས་སེལ་ཐབས་གཉིས་སྨན་དབུ་མའི་ལམ་གྱི་དགོས་འདུན་བསྒྲུབ་སླད། རྒྱ་ནག་དམར་གཞུང་གིས་འགོ་འཁྲིད་ཞི་ཅི་ཕིན་གཙོས་འགོ་འཁྲིད་རྣམས་ཀྱིས་བཟང་སྤྱོད་དང་ལྷག་བསམ་རྣམ་དག་གིས་གོམ་པ་མདུན་སྤོས་དགོས་པར། རྒྱལ་སྤྱིའི་ཐོག་ནས་ཁ་ཡོད་ལག་ཡོད་ཀྱིས་དུས་འགྱངས་མེད་པར་ྋསྤྱི་ནོར་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་ཚབ་དང་ལྷན་དུ་བོད་རྒྱ་གྲོས་མོལ་འགོ་བཙུགས་ཐབས་ཐོག་ཛ་དྲག་གི་འབོད་སྐུལ།

༢༽ ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་དང་ཁོང་གི་སྐུ་འཁོར་ནང་མི་རྣམས་དང་། གདན་ས་བཀྲིས་ལྷུན་པོའི་དབུ་འཛིན་དང་ཡང་སྲིད་འཚོལ་ཞིབ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེ་མཆོག་དང་བྱང་པ་གཅུང་ལགས་གཙོས་ཉེས་མེད་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་དགོས་པ་རྒྱ་གཞུང་ལ་གནོན་ཤུགས་སྤྲོད་གནང་ཡོང་བའི་འབོད་སྐུལ།

 ༣༽ རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་(Michelle Bachelet) མཆོག་ལ་དམིགས་བསལ་གྱི་འབོད་སྐལ་ཞུ་རྒྱུར། འདི་ལོ་ཟླ་བ་༥ པའི་ནང་རྒྱ་ནག་དང་རྒྱ་ནག་གི་དབང་བསྒྱུར་འོག་གནས་ཡོད་པའི་ས་ཁུལ་ཁག་ལ་མཚམས་གཟིགས་ཕེབས་རྒྱའི་གསལ་བསྒྲགས་གནང་བ་བཞིན་བོད་ནང་ངེས་པར་དུ་ཕེབས་ཐབས་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་གཟིགས་ཞིབ་མཐིལ་ཕྱིན་ཡོང་བའི་འབོད་སྐུལ་བཅས་རེད་འདུག 

ལས་འགུལ་སྐབས་སུ་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨཱ་ཇེ་སིང་ཕེབས་འདུག་པ་དང་། ཁོང་དང་ལྷན་དུ་ཚོགས་མི་དང་རྒྱབ་སྐྱོར་བ་རྒྱ་གར་བ་ཁག་ཅིག་ཀྱང་ཕེབས་འདུག ཨཱ་ཇེ་སིང་གིས་རྒྱ་ནག་གིས་༧པན་ཆེན་རིན་པོ་ཆེ་བཙན་ཁྲིད་བྱས་ནས་མི་ལོ་༢༧ འགྲོ་བཞིན་ཡོད་ཀྱང་། ད་བར་ཁོང་གི་སྐོར་ལ་གང་ཡང་གསལ་བཤད་བྱེད་ཀྱི་མེད་པ་དེ་ནི་སེམས་སྐྱོ་དགོས་པ་དང་ཧང་སངས་དགོས་པ་ཞིག་ཡིན་པ། རྒྱ་ནག་ལ་ནོར་འཁྲུལ་དེའི་མཇུག་འབྲས་མྱངས་དགོས་པ་ཆགས་རྒྱུ་ཡིན་པ། བོད་མི་ཚོས་མུ་མཐུད་ནས་ལས་འགུལ་སྤེལ་དགོས་པ་དང་རང་གི་རིག་གཞུང་སྲུང་སྐྱོབ་བྱེད་དགོས་པ། དེ་བཞིན་རྒྱ་ནག་གི་གསང་མྱུལ་བ་བོད་མི་དང་རྒྱ་གར་བ་སོགས་ཀྱིས་བོད་མིའི་ལས་འགུལ་རྣམས་གྲུབ་འབྲས་མི་ཐོན་ཆེད་དུ་ལས་དོན་སྤེལ་སྲིད་པས། ག་དུས་ཡིན་ནའང་གཟབ་ནན་བྱེད་དགོས་པ། ཧིན་བོད་མཛའ་འབྲེལ་ཚོགས་པས་ག་དུས་ཡིན་ནའང་བོད་དོན་ལ་རྒྱབ་སྐྱོར་ཞུ་རྒྱུ་ཡིན་སྐོར་གསུངས་སོང་།།

གསར་འགོད་པ་སྐལ་བཟང་དོན་གྲུབ།