༸གོང་ས་མཆོག་གིས་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པར་མཇལ་ཁ་གནང་།

ཟླ་འདིའི་ཚེས་༡༩ ཉིན་གྱི་སྔ་དྲོ་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་ཨ་ཛི་རཱ་ཛེ་ཡས་(Uzra Zeya ) སྣེ་ཁྲིད་འོག་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཁང་གི་གཞུང་ཚབ་གཞོན་པ་ལྕམ་པེ་ཊི་རི་སི་ཡ་(Ms. Patricia Lacina) སོགས་ལས་རོགས་ཁག་ཅིག་ལས་གྲུབ་པའི་ཨ་རིའི་ཆེས་མཐོའི་སྐུ་ཚབ་ཚོགས་ཆུང་ལ་དྷ་སའི་ཕོ་བྲང་ནང་མཇལ་ཁ་གནང་ཡོད་པ་རེད།

སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་སོགས་མཉམ་བཅར་ཞུས་ཡོད་པ་རེད།

སྐབས་དེའི་བཀའ་མོལ་གནང་བའི་བརྙན་ཐུང་དུམ་ཚན་ཞིག་བོད་མིའི་སྒྲིག་འཛུགས་ནས་ཁྱབ་སྤེལ་བྱས་པའི་ནང་། ༧གོང་ས་མཆོག་གིས། “ངོས་རང་རྣམ་པ་ཚོ་དང་མཇལ་འཕྲད་ཞུ་རྒྱུ་བྱུང་བས་ཧ་ཅང་དགའ་པོ་བྱུང་། རྩ་བའི་ཆ་ནས་ང་ཚོ་འགྲོ་བ་མི་མཆེད་གྲོགས་ཕོ་མོ་ཡིན་པའི་ཆ་ནས་ང་ཚོ་ཚང་མར་མིག་གཉིས་དང་སྣ་གཅིག་ཡོད་པ་གཅིག་མཚུངས་ཡིན། ངོས་ཀྱི་ལས་འགན་གཅིག་ནི་ཆོས་ལུགས་ནང་ཁུལ་མཐུན་སྒྲིལ་གོང་མཐོར་གཏོང་རྒྱུ་དེ་ཡིན། ཆོས་ལུགས་ཚང་མས་བྱམས་སྙིང་རྗེ་དང་བཟོད་བསྲན་སྐོར་གཅིག་མཚུངས་སུ་བསླབ་བྱ་རྒྱག་གི་ཡོད། དེ་དག་ནི་ང་ཚོར་དངོས་གནས་དྲང་གནས་དགོས་མཁོ་ཅན་ཆགས་ཡོད་”ཅེས་གསུངས་རྗེས། ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པས་ཁོང་ངོ་སྤྲོད་དང་འབྲེལ་ནས་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུ་རྒྱུའི་ཧ་ཅང་སྐལ་བ་བཟང་པོ་བྱུང་། ང་ཨ་ཛི་རཱ་ཛེ་ཡ་ཡིན། ཨ་རིའི་སྲིད་འཛིན་རྗོ་བྷ་ཌན་གྱི་བོད་དོན་དམིགས་བསལ་འབྲེལ་མཐུད་པ་ཡིན། ངས་ཨ་རིའི་སྲིད་འཛིན་དང་། ཨ་རིའི་མི་མང་གི་ཚབ་ཞུས་ཏེ་སྙིང་ཐག་པ་ནས་༸གོང་ས་མཆོག་གི་སྐུ་གཟུགས་འཕྲོད་བཞེས་བཟང་པོ་ཡོང་བའི་སྨོན་འདུན་དང་འཚམས་འདྲི་ཞུ་རྒྱུ་ཡིན། ང་ཚོའི་ངོས་ནས་༸གོང་ས་མཆོག་གིས་འཛམ་གླིང་ཞི་བདེ་ཡོང་སླད་བཀའ་སློབ་ལམ་སྟོན་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན་” ཞེས་གསུངས།

༸གོང་ས་མཆོག་གིས་བཀའ་སློབ་སྩལ་དོན། “ཨ་རི་ནི་མང་གཙོ་དང་སྟོབས་ཆེན་རྒྱབ་ཁབ་ཅིག་རེད་ལ། རང་དབང་ཆ་ཚང་ཡོད་པའི་རྒྱལ་ཁབ་ཅིག་རེད། དེ་བཞིན་རྒྱ་གར་ནི་མང་གཙོའི་རྒྱལ་ཁབ་ཅིག་ཡིན་པ་མ་ཟད། འདིར་རྒྱ་གར་ནང་ཆོས་ལུགས་ཚང་མ་འཆམ་མཐུན་ངང་གནས་ཡོད། དེ་ནི་ཐུན་མོང་མ་ཡིན་པ་ཞིག་རེད། རྒྱ་ནག་གཞུང་གིས་བོད་མིའི་བསམ་བློ་བསྒྱུར་བཅོས་གཏོང་ཐུབ་མེད། ད་ལྟ་རྒྱ་ནག་ངོས་ནས་ཀྱང་རྒྱ་ནག་ནང་གང་མགྱོགས་བསྒྱུར་བཅོས་གཏོང་རྒྱུར་བསམ་བློ་གཏོང་གི་ཡོད། ད་ལྟ་རྒྱ་ནག་ནང་སྤྱི་ཚོགས་རིང་ལུགས་དང་མ་ཁེ་སིའི་རིང་ལུགས་ཡལ་ཚར་བ་རེད་”ཅེས་གསུངས་འདུག །

གསར་འགོད་པ་ཆོས་ཉིད་འོད་ཟེར།