༸གོང་ས་མཆོག་བོད་ཀྱི་ཞོ་སྟོན་ཐེངས་༢༠ པའི་ཐོག་ཆིབས་བསྒྱུར།

ཟླ་འདིའི་ཚེས་༢༧ ཉིན་བཙན་བྱོལ་ནང་དུ་བོད་ཀྱི་ཞོ་སྟོན་རྒྱས་པ་ཐེངས་༢༠ པ་དྷ་ས་བོད་ཀྱི་ཟློས་གར་ཁང་དུ་འཚོགས་པ་དང་། སྔ་དྲོའི་ཞོ་སྟོན་དབུ་འབྱེད་མཛད་སྒོའི་ཐོག་༧གོང་ས་མཆོག་ཆིབས་བསྒྱུར་གནང་ཡོད་པ་རེད།

དེ་བཞིན་ཚོགས་ཐོག་དེར་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་དང་བོད་མི་མང་སྤྱིས་འཐུས་ཚོགས་གཙོ། སྲིད་སྐྱོང་སོགས་ཀྱིས་གཙོས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་ལས་ཁུངས་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྣམ་པས་གཙོས་ལྷན་ཁང་ཁག་གི་དྲུང་ཆེ་རྣམ་པ། བོད་ཀྱི་ཟློས་གར་ཚོགས་པའི་འབྲེལ་ཡོད་སྐུ་མགྲོན་རྣམ་པ། གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་སོགས་སྐུ་མགྲོན་དུ་ཆིབས་བསྒྱུར་གནང་ཡོད་པ་རེད།

བོད་ཀྱི་ཟློས་གར་ཚོགས་པའི་འགན་འཛིན་ པི་ཟུར་དབང་འདུས་ཚེ་རིང་གིས་ཞོ་སྟོན་སྐོར་དང་དེ་བཞིན་ཟློས་གར་ཁང་གི་ལས་བསྡོམས་སྙིང་བསྡུས་སྙན་སྒྲོན་ཞུས། དེ་རྗེས་བོད་ཀྱི་ཟློས་གར་ཚོགས་པས་གཙོས་ལྷ་ཚོགས་ཁག་བཅུ་གསུམ་གྱིས་ལྷ་གཞུང་སྙིང་བསྡུས་སྐར་མ་ ༢༠ རེ་འཁྲབ་སྟོན་བྱས་ཡོད་པ་རེད།

ཐེངས་འདིའི་ཉིན་བཅུའི་རིང་གི་ཞོ་སྟོན་དུས་སྟོན་འཚོག་གི་ཡོད་པ་དང་། སྐབས་མ་སུ་རི་བོད་ཁྱིམ་སློབ་གྲྭ་ནས་མཁན་སློབ་ཆོས་གསུམ་དང་། ཀ་སྦུག་བོད་མིའི་ལྷ་མོ་ཚོགས་པས་གཟུགས་ཀྱི་ཉི་མ། མོན་གྷོ་འདོད་རྒུ་གླིང་ལྷ་མོ་ཚོགས་པས་སྣང་ས་འོད་འབུམ། ཨོ་རི་ས་ཕུན་ཚོགས་གླིང་ལྷ་མོ་ཚོགས་པས་ཁྱེའུ་པདྨ་འོད་འབར། སྦན་དྷ་ར་ལྷ་མོ་མཐུན་ཚོགས་ཀྱིས་འགྲོ་བ་བཟང་མོ། སྦེལ་ཀོབ་ལྷ་མོ་ཚོགས་པས་ཇོ་བོ་རྗེ་དཔལ་ལྡན་ཨ་ཏི་ཤ། མན་སྤར་ཕན་བདེ་གླིང་ལྷ་མོ་ཚོགས་པས་རྒྱལ་པོ་འཇིག་ཉེན་དབང་ཕྱུག བལ་ཡུལ་བོད་ཀྱི་ལྷ་མོ་ཚོགས་པས་ལྕགས་ཟམ་པ། བོད་ཀྱི་ཟློས་གར་ཚོགས་པས་སྟོན་པའི་མཛད་རྣམ་བཅས་འཁྲབ་སྟོན་བྱེད་ཀྱི་ཡོད་པ་རེད།

བོད་ཀྱི་ཞོ་སྟོན་དུས་སྟོན་ནི་སྔོན་མ་སེར་འབྲས་སོགས་སུ་དབྱར་གནས་ཚུགས་སྐབས། ཚོགས་གཞུང་དུ་ཞོ་གཏོང་གི་ཡོད་པས་ཞོའི་སྟོན་མོ་ཞེས་འབོད་ཀྱི་ཡོད་པ་རེད། ༧གོང་ས་མཆོག་སྐུ་ཕྲེང་ལྔ་པའི་སྐབས་ཞོ་སྟོན་ཉིན་བཀྲ་ཤིས་ཞོལ་པ་དང་། བྲོ་བ། ཤེལ་རོང་འབྲོང་རྩེད་པ་བཅས་འབྲས་སྤུངས་སུ་ཡོང་ནས་དགའ་ལྡན་ཕོ་བྲང་གི་མདུན་ཟློས་གར་དང་ལྷ་མོའི་འཁྲབ་སྟོན་འཁྲབ་ཀྱི་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།