ཀ་མ་ལ་ཧ་རི་སི་ལ་ཨ་རིའི་མང་གཙོ་ཚོགས་པའི་འོས་མི་གཏན་འཁེལ་བྱེད་པར་འདང་ངེས་ཀྱི་རྒྱབ་སྐྱོར་ཐོབ་པར་བརྗོད།

ཕྱི་ཟླ་༧ ཚེས་༢༣ ཉིན་བྷི་བྷི་སིའི་གསར་ཁང་གིས་གནས་ཚུལ་སྤེལ་གསལ། བདུན་ཕྲག་འདིའི་རེས་གཟའ་ཟླ་བའི་དགོང་མོར་དབྱིན་ཇིའི་(AP)ཨེ་པི་གསར་ཁང་”(Associated Press) ་གིས་བསམ་ཚུལ་བསྡུ་ལེན་བྱས་པའི་གྲུབ་འབྲས་ལྟར་ན། ཀ་མ་ལ་ཧ་རི་སི་ལ་འོས་འདེམས་ཐེངས་དང་པོའི་རྒྱལ་ཁ་འཐོབ་པར་མཁོ་བའི་སྐུ་ཚབ་འཐུས་མི་༡,༩༧༦ ལས་བརྒལ་བའི་རྒྱབ་སྐྱོར་ཐོབ་ཡོད་པར་བསྟན་འདུག་པ་དང། དེའི་དོན་ནི་ཀ་མ་ལ་ཧ་རི་སི་ལ་ཨ་རིའི་མང་གཙོ་ཚོགས་པའི་འོས་མི་གཏན་འཁེལ་བྱེད་པར་འདང་ངེས་ཀྱི་རྒྱབ་སྐྱོར་ཐོབ་ཡོད་པ་དང་། ཕྱི་ཟླ་ ༡༡ པའི་སྲིད་འཛིན་འོས་བསྡུའི་སྐབས་སྤྱི་མཐུན་ཚོགས་པའི་སྲིད་འཛིན་འོས་མི་ཊམ་ཕུ་དང་འགྲན་བསྡུར་བྱ་རྒྱུའི་ལམ་ཁ་གསལ་པོར་ཆགས་ཡོད་པར་བརྗོད། ཟླ་བ་རྗེས་མར་ཅི་ཁ་གྷོ་(Chicago) ་གྲོང་ཁྱེར་དུ་མང་གཙོ་ཚོགས་པའི་རྒྱལ་ཡོངས་ཚོགས་ཆེན་(DNC) ་གྱི་སྔོན་དུ་འཚོག་རྒྱུའི་སྐུ་ཚབ་འཐུས་མི་རྣམས་ཀྱིས་མིང་འབོད་འོས་བསྡུ་བྱ་སྐབས་གཏན་འཁེལ་བྱ་རྒྱུ་རེད་འདུག སྐུ་ཚབ་འཐུས་མི་ནི་རང་རང་གི་འོས་བསྡུའི་ས་ཁུལ་གྱི་སྐུ་ཚབ་བྱ་རྒྱུར་བདམས་པའི་མི་སྣ་ཡིན་ཞིང་། ཁོང་ཚོས་རྒྱབ་སྐྱོར་བྱ་རྒྱུའི་ཁས་ལེན་དེ་དག་འོས་བསྡུ་མ་བྱས་བར་དུ་འགྱུར་བ་གཏོང་ཆོག་ཀྱང་། འགྱུར་བ་འགྲོ་རྒྱུའི་གོ་སྐབས་ཉུང་ཉུང་ཡིན་འདུག།

སྲིད་འཛིན་བྷ་ཌན་གྱིས་སྲིད་འཛིན་འོས་མི་ནས་ཕྱིར་འཐེན་བྱས་པ་ནས་བཟུང་། སུས་ཀྱང་ལྕམ་ཧ་རི་སི་ལ་མངོན་གསལ་དོད་པོའི་ཐོག་ནས་འགྲན་བསྡུར་བྱ་རྒྱུའི་སྐད་ཆ་བཤད་མེད་པ་ཡིན་འདུག སྲིད་འཛིན་བྷ་ཌན་དང་ཊོམ་ཕུ་མཉམ་དུ་བགྲོ་གླེང་བྱེད་སྐབས་བྷ་ཌན་འཐོམས་བསྡད་པའི་རྣམ་པ་དེས་རྐྱེན་བྱས་ཏེ། ཁོང་གི་ཚོགས་པའི་གལ་ཆེའི་འགོ་ཁྲིད་ཚོས་ཁོང་འོས་མི་ནས་དགོངས་ཞུ་བྱེད་དགོས་པའི་གནོན་ཤུགས་སྤྲད་པར་བརྗོད།

བྷ་ཌན་གྱིས་ཕྱིར་འཐེན་གསལ་བསྒྲགས་བྱས་པ་ནས་བཟུང་། ཀ་མ་ལ་ཧ་རི་སི་ལ་འོས་བསྡུའི་ཆེད་དུ་ཨ་སྒོར་ས་ཡ་མང་པོའི་ཞལ་འདེབས་བྱུང་ཚར་བ་དང་།  མང་གཙོ་ཚོགས་པའི་དབུ་ཁྲིད་གཙོ་བོ་རྣམས་ཀྱིས་ཁོང་མོར་མང་གཙོ་ཚོགས་པའི་འོས་མིར་འདེམས་ཐོན་ཡོང་བའི་འབད་བརྩོན་ལ་རྒྱབ་སྐྱོར་བྱེད་བཞིན་ཡོད་འདུག
ཁ་སང་གཟའ་ཟླ་བའི་དགོང་མོར་ཌེ་ལ་ཝེར་(Delaware) ་མངའ་སྡེའི་ཝིལ་མིང་ཊོན་(Wilmington) ་གྲོང་ཁྱེར་དུ་ཡོད་པའི་ཁོང་མོའི་འོས་བསྡུའི་ལས་འགུལ་གྱི་ལས་ཁུངས་སུ་ལས་བྱེད་ཚོར་ཁོང་མོས་གཏམ་བཤད་གནང་སྐབས། ལྕམ་ཧ་རི་སི་ཡིས་ཊམ་ཕུ་ལ་དམིགས་འབེན་བཟུང་སྟེ།
ཁོང་མོ་ཁ་ལི་ཧྥོར་ནི་ཡ་(California) ་མངའ་སྡེའི་ཁྲིམས་དཔོན་གསར་པ་ཞིག་གི་ངོ་བོར་གནས་སྐབས་གཞན་ལ་གནོད་འཚེ་གཏོང་མཁན་དང་བསླུ་བྲིད་བྱེད་མཁན་ཚོར་ཁ་གཏད་བཅག་པའི་སྐོར་དང་། ཁོང་མོའི་དེ་སྔའི་ལས་ཀའི་སྐོར་ཞོར་འཕྲོས་སུ་ཤོད་བཞིན། ངས་ཊམ་ཕུའི་གྲས་ཀྱི་མི་དེ་འདྲ་ཤེས་ཀྱི་ཡོད་ཅེས་ཁ་སྣོན་བྱས་ཡོད་འདུག ཁོང་མོས་མོ་རང་དང་ཊམ་ཕུའི་མ་འོངས་པའི་འཆར་སྣང་གཉིས་ཀྱི་སྐོར་གསལ་བཤད་བྱེད་སྐབས།

གཅིག་གིས་མ་འོངས་པར་དམིགས་འབེན་བཟུང་ཡོད། གཞན་དེས་འདས་པར་དམིགས་འབེན་བཟུང་ཡོད། ཅེས་དང་།  ཊམ་ཕུས་ང་ཚོའི་རྒྱལ་ཁབ་རྒྱབ་ཏུ་ཁྲིད་འདོད་ཡོད། ང་ཚོས་ཨ་རིའི་མི་མང་ཚང་མར་གོ་སྐབས་སྤྲོད་པའི་འདུན་པ་ཡོད་སྐོར་དང་། དེ་བཞིན་ཁོང་མོས་བྷ་ཌན་གྱི་གྲུབ་འབྲས་ལ་བསྔགས་བརྗོད་བྱེད་ཞོར།  སྲིད་འཛིན་གཞོན་པའི་ཚུལ་གྱིས་ཁོང་མོས་ཕྱག་རོགས་ཞབས་ཞུ་སྒྲུབ་པའི་དུས་ཡུན་དེ་ནི་ངའི་མི་ཚེའི་ནང་གི་གཟི་བརྗིད་ཆེ་ཤོས་ཤིག་ཡིན་ཞེས་བརྗོད་འདུག  

བྷ་ཌན་གྱིས་སྲིད་འཛིན་འོས་མི་ནས་ཕྱིར་འཐེན་བྱས་རྗེས། ལས་རོགས་ཚོར་ཐུགས་རྗེ་ཆེ་ཞུས་པ་དང་། ལྕམ་ཧ་རི་སི་ལ་ལྷག་བསམ་རྣམ་དག་གིས་རྒྱབ་སྐྱོར་བྱེད་དགོས་པའི་སྐུལ་མ་དང་སྦྲགས། ཁོང་མོ་ནི་འོས་མི་མཆོག་ཏུ་གྱུར་པ་ཞིག་ཡིན་ཚུལ་བཤད། ཊམ་ཕུས་ཉེ་ཆར་བདམས་པའི་སྲིད་འཛིན་གཞོན་པ་གྲོས་ཚོགས་འཐུས་མི་(JD) ་ཝཱན་སི་ཡིས་ཝར་ཇི་ནི་ཡ་མངའ་སྡེར་འོས་བསྡུའི་ལས་འགུལ་སྤེལ་སྐབས། ཀ་མ་ལ་ཧ་རི་སི་དང་བྷ་ཌན་གཉིས་ལ་སྐྱོན་བརྗོད་ཤུགས་ཆེན་བྱས་ཡོད་པ་དང་།

ཁོང་གིས་ལོ་རྒྱུས་ཀྱིས་དོན་དངོས་བཞིན་བྷ་ཌན་ནི་བྲོས་བྱོལ་བ་ཙམ་མིན་པར། ཨ་རིའི་ལོ་རྒྱུས་ནང་གི་སྲིད་འཛིན་སྡུག་ཤོས་ཀྱི་གྲས་སུ་དྲན་གསོ་བྱ་ངེས་ཡིན། ཀ་མ་ལ་ཧ་རི་སི་ནི་དེ་ལས་ལྡབ་སྟོང་ཕྲག་གིས་སྡུག་ཡོད་པ་མི་ཚང་མས་ཤེས་ཀྱི་ཡོད། མོས་ཇོ་བྷ་ཌན་གྱི་ནོར་འཁྲུལ་ཚང་མར་མོས་མཐུན་བྱས་ཡོད་པ་མ་ཟད། ཁོང་ལ་སྲིད་འཛིན་གྱི་ལས་འགན་འཁུར་བའི་སེམས་ནུས་ཡོད་སྐོར་རྫུན་གཏམ་བཤད་མྱོང་ཡོད་ཅེས་བརྗོད་འདུག

གསར་འགོད་པ། བློ་བཟང་རྒྱ་མཚོ།