ཀོ་རི་ཡ་ནང་གི་ཟ་ཁང་ཞིག་རྒྱ་ནག་ཉེན་རྟོག་པའི་གསང་བའི་ས་ཚིགས་ཡིན་སྲིིད་པ་རེད་འདུག

ཟླ་བ་འདིའི་ཚེས་༢༩ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཀོ་རི་ཡ་གསང་བའི་ལས་ཁུངས་ཀྱིས་ཀོ་རི་ཡ་ནང་རྒྱ་མི་ཞིག་གིས་བཙུགས་ཡོད་པའི་ཟ་ཁང་<Dongfang Mingzhu>ཟེར་བ་དེ་ནི་རྒྱ་ནག་ཉེན་རྟོག་པའི་གསང་བའི་ས་ཚིགས་ཡིན་པའི་དོགས་གཞི་བྱས་ཡོད་པར་བརྟེན། ཟ་ཁང་འདིའི་བདག་པོ་ཝང་ཧེ་ཅུན་གྱིས། དོགས་གཞི་དེ་ནི་ཁུངས་ལུང་མེད་པ་རེད་ཅེས་བརྗོད་ཡོད་འདུག

ཀོ་རི་ཡའི་ཉེན་རྟོག་པས། ཝང་ཧེ་ཡི་ཟ་ཁང་དེ་ནི་རྒྱ་ནག་ཉེན་རྟོག་པའི་གསང་བའི་ས་ཚིགས་ཡིན་ཚུལ་གྱི་དོགས་གཞི་བྱས་པའི་སྐོར་ཀོ་རི་ཡ་ནང་ཁྱབ་འཕྲལ། ཟླ་བ་འདིའི་ཚེས་༢༩ ཉིན་གྱི་དགོང་མོར་ཟ་ཁང་གི་བདག་པོ་ཝང་ཧེ་ཡིས་གསར་འགོད་གསལ་བསྒྲགས་ཞིག་སྤེལ་བའི་ནང་། ཀོ་རི་ཡ་གསང་བའི་ལས་ཁུངས་ཀྱིས་ཟ་ཁང་དེ་ནི་རྒྱ་ནག་ཉེན་རྟོག་པའི་གསང་བའི་ས་ཚིགས་ཞིག་ཡིན་པའི་དོགས་པ་མ་བྱས་གོང་། ས་ཁང་དེ་ནི་རྒྱུན་ལྡན་གྱི་ཟ་ཁང་བཞིན་ཚོང་གཉེར་བྱེད་ཀྱི་ཡོད་ཀྱང་། ཟ་ཁང་དེ་གསང་བའི་ས་ཚིགས་ཞིག་རེད་ཅེས་པའི་དོགས་གཞིའི་གནས་ཚུལ་ཁྱབ་འཕྲལ། ཟ་ཁང་དེ་ནི་ས་ཁུལ་གྱི་མི་རྣམས་ཀྱིས་སྐྱོན་བརྗོད་བྱེད་ས་ཞིག་ཏུ་ཆགས་སོང་ཞེས་བརྗོད་འདུག

ཁོ་པས་མུ་མཐུད་བརྗོད་གསལ། ང་ཚོས་གསར་འགོད་གསལ་བསྒྲགས་མ་བྱས་གོང་། གསར་ཁང་ཁག་གིས་ང་དང་ངའི་ནང་མི་རྣམས་ཀྱི་སྒེར་གྱི་གནས་ཚུལ་ཕྱིར་བསྒྲགས་བྱས་པས་གསར་འགོད་པ་རྣམས་ལ་ཁྲིམས་ཀྱི་འགན་གང་ཡོད་པ་རྣམས་མཐའ་སྐྱེལ་བྱེད་ཀྱི་ཡིན་ཞེས་བརྗོད་འདུག

དེ་བཞིན་ཝང་ཧེ་ཡིས་ཟླ་བ་འདིའི་ཚེས་ ༣༡ ཉིན་གསར་འགོད་གསལ་སྒྲགས་གཉིས་པ་ཞིག་སྤེལ་འཆར་ཡོད་པ་དང་། གསར་འགོད་གསལ་བསྒྲགས་དེའི་སྐབས་གསར་འགོད་པ་༡༠༠ ཁོ་ན་མགྲོན་འབོད་བྱས་ཡོད་ཅིང་། གསར་འགོད་པ་རྣམས་ཡོང་སྐབས་གསར་འགོད་པ་རང་ཉིད་ཀྱི་མིང་ངོ་མ་དང་མཉམ་དུ་འཛུལ་བཞུགས་བྱ་རྒྱུའི་སླད་ཀོ་རི་ཡའི་ཡུལ་སྒོར་༣༠༠༠༠སྤྲད་དགོས་ལུགས་བརྗོད་པའི་གནས་ཚུལ་ཐོན་འདུག

ཝན་ཧེ་ནི་ལྷོ་ཀོ་རི་ཡི་ནང་ཡོད་པའི་རྒྱ་ནག་མི་དམངས་ཚོགས་པའི་སྤྱི་ཁྱབ་ཚོགས་གཙོ་དང་ལྷོ་ཀོ་རི་ཡའི་རྒྱལ་ས<Seoul>ཡི་རྒྱ་ནག་རོགས་རམ་ཚོགས་པའི་ལྟེ་གནས་ཁང་གི་ཚོགས་གཙོ་ཡི་ལས་འགན་སོགས་འཁྱེར་བཞིན་ཡོད་འདུག དེ་བཞིན་ཁོས་པས་ཀོ་རི་ཡ་ནང་ཟ་ཁང་དང་ད་དུང་བཟོ་ལས་ཁང་ཁ་ཤས་ཀྱང་བདག་གཉེར་བྱེད་བཞིན་ཡོད་རབས་ཀྱི་གནས་ཚུལ་ཐོན་འདུག །

གསར་འགོད་པ་བདེ་སྒྲོན།