ཀོང་གྷོའི་ནང་ནད་ཡམས་རྐྱེན་པས་མི་གྲངས་༡༠༠༠ ལས་མང་བ་ཤི་འདུག

ཨ་ཧྥི་རི་ཀའི་རྒྱལ་ཁབ་ཀོང་གྷོ་མང་གཙོ་སྤྱི་མཐུན་རྒྱལ་ཁབ་ནང་དུ། ཡུལ་མི་ཚོའི་མྱུར་སྐྱོབ་རུ་ཁག་དང་གཞུང་སོགས་ལ་ཡིད་ཆེས་ཀྱི་ཚད་གཞི་དམའ་བོ་ཡོད་ཁར། ཁུལ་དེའི་གྱེན་ལངས་ཤོག་ཁག་གི་དྲག་རྒོལ་ལ་བརྟེན་ནས།  ཨཱི་བྷོ་ལ་ནད་ཡམས་ཁྱབ་གདལ་བཀག་འགོག་བྱེད་རྒྱུར་འགལ་རྐྱེན་ཆེན་པོ་ཆགས་ཡོད་འདུག

ཟླ་༥ པའི་ཚེས་༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཀོང་གྷོ་མང་གཙོ་སྤྱི་མཐུན་རྒྱལ་ཁབ་ཀྱི་འཕྲོད་བསྟེན་ལྷན་ཁང་གིས། རྒྱལ་ཁབ་དེའི་ནང་ད་བར་ཨི་བྷོ་ལ་(Ebola) ནད་ཡམས་ཁྱབ་གདལ་སོང་ནས་མི་གྲངས་༡༠༠༠ ལས་མང་བའི་ཚེ་སྲོག་ཤོར་ཡོད་པའི་གསལ་བསྒྲགས་བྱས་འདུག དེ་ཡང་ཚེས་༣ ཉིན་འཕྲོད་བསྟེན་ལས་ཁང་གིས་མི་གྲངས་གསར་པ་༡༤ ཡི་ཚེ་སྲོག་ཤོར་ཡོད་སྐོར་བརྗོད་འདུག་པས། ལོ་སྔོན་མའི་ཟླ་བ་༨ པའི་ནང་རྒྱལ་ཁབ་ཀྱི་ཤར་ཕྱོགས་ཁུལ་གྱི་མངའ་སྡེ་ཞིག་ནས་ཨཱི་བྷོ་ལ་ནད་ཡམས་ཐོན་རྗེས། ཉེ་འགྲམ་གྱི་མངའ་སྡེའི་ནང་ཁྱབ་གདལ་སོང་ནས། ད་བར་ནད་ཡམས་དེ་ལས་ཚེ་སྲོག་ཤོར་མཁན་མི་གྲངས་ཁྱོན་བསྡོམས་༡༠༠༨ བྱུང་འདུག་པ་དང་། ན་ཚ་དེ་འཕོག་མཁན་གྲངས་ཐོ་བཀོད་པ་མི་གྲངས་༡༤༥༠ བྱུང་ཡོད་འདུག

འཛམ་གླིང་འཕྲོད་བསྟེན་ལས་ཁང་གི་མགྲིན་ཚབ་པས། བདུན་ཕྲག་གཅིག་ནང་ན་ཚ་དེ་འཕོག་མཁན་ཐོ་འགོད་བྱུང་བ་མི་གྲངས་༡༢༦ བྱུང་ཡོད་པས། མ་འོངས་པར་ནད་ཡམས་དེ་ཁྱབ་གདལ་ཤུགས་ཆེ་བ་དང་མུ་མཐུད་འགྲོ་རྒྱུར་ཚོད་དཔག་བྱེད་བཞིན་ཡོད་འདུག

དེ་ཡང་འཕྲོད་བསྟེན་ལས་བྱེད་དང་ལྟེ་གནས་ཁང་དུ་དྲག་རྒོལ་གྱི་གནས་ཚུལ་མང་དུ་འགྲོ་བཞིན་པར་བརྟེན། ནད་ཡམས་དེ་ཁྱབ་གདལ་བཀག་འགོག་གི་ལས་དོན་ལ་འགལ་རྐྱེན་ཆེན་པོ་ཆགས་ཡོད་པས། ནད་ཡམས་ཁྱབ་གདལ་ཤུགས་ཆེ་རུ་སོང་བ་ཡིན་སྐོར་རྒྱལ་ཁབ་དེའི་འཕྲོད་བསྟེན་ལས་ཁང་གི་མགྲིན་ཚབ་པས་བརྗོད་འདུག

དེ་ཡང་རྒྱལ་ཁབ་དེའི་ཤར་ཕྱོགས་ཁུལ་དུ་གྱེན་ལངས་ཤོག་ཁག་གི་དྲག་རྒོལ་གྱི་གནས་ཚུལ་མང་པོ་ལྷག་བཞིན་ཡོད་ཁར། ཁུལ་དེའི་མི་མང་གིས་ནད་ཡམས་ཁྱབ་གདལ་འགྲོ་བཞིན་པའི་གནས་ཚུལ་དེ་ནི། གཞུང་གིས་ཁུལ་དེར་བརྟན་ལྷིང་མེད་པ་བཟོ་ཆེད་དུ་ནད་ཡམས་ཀྱི་གནས་ཚུལ་རྫུན་བཟོ་བྱས་པར་དོགས་པ་བྱེད་བཞིན་འདུག དབུས་གཞུང་གིས་ནད་ཡམས་དེ་ལ་ཁ་གཡར་ནས་ཁུལ་དེར་སྲིད་འཛིན་དང་མངའ་སྡེའི་གྲོས་ཚོགས་འོས་བསྡུའི་ལས་རིམ་ཕྱིར་འགྱངས་བྱས་ཡོད་འདུག མི་མང་གིས་ད་ལྟའི་ནད་ཡམས་དེ་ལ་མྱུར་སྐྱོབ་རུ་ཁག་གིས་བཀོལ་སྤྱོད་བྱེད་བཞིན་པའི་ཐབས་བྱུས་ལ་ཡང་ཡིད་ཆེས་བྱེད་ཀྱི་མེད་པ་རེད་འདུག

རྒྱལ་ཁབ་དེའི་ནང་ཨཱི་བྷོལ་ནད་ཡམས་དེ་ཁྱབ་གདལ་སོང་རྗེས། འཕྲོད་བསྟེན་ལས་བྱེད་ཚོས་མི་མང་༡༠༩,༠༠༠ ལ་སྔོན་འགོག་གི་སྨན་ཁབ་བརྒྱབ་ཡོད་འདུག་ཀྱང་། སྨན་ཁབ་དེ་ནི་ཚོད་ལྟའི་ཆེད་ཡིན་པ་དང་། ནད་གཞི་དེ་སྔོན་འགོག་ཐུབ་པའི་ཚོད་དཔག་བརྒྱ་ཆ་༩༧.༥ ཡིན་འདུག འདི་ལོའི་ཟླ་༡ པོ་ནས་ད་བར་ནད་ཡམས་དེའི་ཐོག་མྱུར་སྐྱོབ་ལས་མི་དང་འཕྲོད་བསྟེན་ལྟེ་གནས་ཁང་ཁག་ལ། དྲག་རྒོལ་བྱས་པའི་གནས་ཚུལ་གྲངས་༡༡༩ བྱུང་ཡོད་འདུག་པས། རྒྱལ་སྤྱིའི་ཚོགས་པ་ཁག་ཅིག་ཕྱིར་འཐེན་བྱེད་དགོས་འཁེལ་ཡོད་འདུག་པས། ནད་ཡམས་དེ་བཀག་འགོག་བྱེད་པར་དཀའ་ལས་ཁག་པོ་ཡོད་འདུག

ཉེ་བའི་ཆར་བསམ་ཤོག་བསྡུ་ལེན་ཞིག་བྱས་པའི་གྲུབ་དོན་དུ། ལན་འདེབས་པའི་ཁྲོད་མི་མང་བརྒྱ་ཆ་༣༢ ཀྱིས་ནད་ཡམས་དེ་འདྲ་ཞིག་ཁྱབ་གདལ་འགྲོ་བཞིན་པ་ཡིད་ཆེས་བྱེད་ཀྱི་མེད་ཁར། དེ་ནི་དཔལ་འབྱོར་གྱི་ཁེ་ཕན་ཆེད་དུ་རྫུན་བཟོ་བྱས་པར་ཡིད་ཆེས་བྱེད་ཀྱི་ཡོད་ཁར། མི་མང་བརྒྱ་ཆ་༣༦ གིས་ནད་ཡམས་ཀྱི་གནས་ཚུལ་ནི་ཁུལ་དེར་བརྟན་ལྷིང་མེད་པ་བཟོ་ཆེད་དུ་རྫུན་བཟོ་བྱས་པར་གོ་བ་ལེན་བཞིན་ཡོད་འདུག

དེ་ཡང་ཕྱི་ལོ་༢༠༡༣ ནས་༢༠༡༦ ལོ་བར་ནུབ་ཨ་ཧྥི་རི་ཀའི་རྒྱལ་ཁབ་གྷེ་ནི་དང་སཱེ་ར་ལི་འོན། ལཱི་བྷི་རི་ཡ་བཅས་སུ་ཨཱི་བྷོ་ལ་ནད་ཡམས་ཁྱབ་གདལ་སོང་ནས་མི་གྲངས་༡༡,༣༠༠ ལྷག་གི་ཚེ་སྲོག་ཤོར་ཡོད་པ་དང་། ད་ལྟའི་ཆར་ན་ཚ་དེ་བཅོས་ཐུབ་པའི་སྨན་ཞིག་བཟོ་ཐུབ་མེད་འདུག །

གསར་འགོད་པ་སྐལ་བཟང་དོན་གྲུབ།