ཁ་སག་སི་ཐན་ལ་ཨ་རིའི་ཕྱི་སྲིད་དྲུང་ཆེས་རྒྱ་ནག་ལ་དོགས་ཟོན་དགོས་པའི་ཉེན་བརྡ་བཏང་ཡོད་འདུག
ཨ་རིའི་ཕྱི་སྲིད་དྲུང་ཆེ་མ་ཁི-ཕོམ་ཕོའོ་(Mike Pompeo)ཡིས་ཁ་སག་སི་ཐན་ལ་རྒྱ་ནག་གི་མ་འཇོག་དང་ཤུགས་རྐྱེན་ལ་དོགས་ཟོན་བྱེད་དགོས་པའི་ཉེན་བརྡ་དང་། ཨེ་ཤི་ཡའི་དཀྱིལ་མའི་རྒྱལ་ཁབ་དེ་དང་གཞན་རྣམས་མཉམ་རུབ་ཀྱིས་རྒྱ་ནག་ལ་གྲངས་ཉུང་མི་རིགས་ཚོར་དྲག་གནོན་བྱེད་མཚམས་འཇོག་པའི་དགོས་འདུན་འདོན་པའི་སྐུལ་མ་བཏང་ཡོད་འདུག
ཨ་རིའི་ཕྱི་སྲིད་དྲུང་ཆེ་མ་ཁི-ཕོམ་ཕོའོ་(Mike Pompeo)ཡིས་ཁ་སག་སི་ཐན་ལ་རྒྱ་ནག་གི་མ་འཇོག་དང་ཤུགས་རྐྱེན་ལ་དོགས་ཟོན་བྱེད་དགོས་པའི་ཉེན་བརྡ་དང་། ཨེ་ཤི་ཡའི་དཀྱིལ་མའི་རྒྱལ་ཁབ་དེ་དང་གཞན་རྣམས་མཉམ་རུབ་ཀྱིས་རྒྱ་ནག་ལ་གྲངས་ཉུང་མི་རིགས་ཚོར་དྲག་གནོན་བྱེད་མཚམས་འཇོག་པའི་དགོས་འདུན་འདོན་པའི་སྐུལ་མ་བཏང་ཡོད་འདུག
དེ་ཡང་ཁ་སང་རེས་གཟའ་ཉི་མའིི་ཉིན་ཨ་རིའི་ཕྱི་སྲིད་དྲུང་ཆེ་མ་ཁི-ཕོམ་ཕོའོ་ཨེ་ཤི་ཡའི་དཀྱིལ་མར་ཆགས་པའི་ཁ་སག་སི་ཐན་དུ་ཕེབས་སྐབས། ཁོང་གིས་རྒྱུན་དུ་རྒྱལ་ཁབ་གཞན་རྣམས་ལ་ཉེན་བརྡ་གཏོང་བཞིན་པ་ལྟར། རྒྱལ་ཁབ་དེ་གའི་འགོ་ཁྲིད་རྣམས་ལ་རྒྱ་ནག་གི་ཡིད་དབང་འཕྲོག་པའི་ཚོང་ལས་མ་འཇོག་དེས་རྒྱལ་ཁབ་ཀྱི་བདག་དབང་ལ་གནོད་སྐྱེལ་ངེས་པ་དང་། དེས་རྒྱལ་ཁབ་ཀྱི་ཕུགས་རྒྱང་རིང་པོའི་འཕེལ་རྒྱས་ལ་ཕན་ཐོགས་རྒྱུའི་ཚབ་ཏུ་གནོད་སྲིད་སྐོར་བརྗོད་ཡོད་འདུག
ཁོང་གིས་“ང་ཚོས་ཁ་སག་སི་ཐིན་གྱིས་རྒྱལ་ཁབ་སུ་དང་ལྷན་དུ་ཚོང་ལས་གཉེར་དང་མ་གཉེར་གྱི་རང་དབང་ལ་མཐའ་གཅིག་ཏུ་རྒྱབ་སྐྱོར་བྱེད་ཀྱི་ཡོད། ཡིན་ན་ཡང་། ང་ལ་ཨ་རིའི་བཟོ་ཚོང་ཁང་དང་མཉམ་ལས་བྱེད་མཁན་གྱི་རྒྱལ་ཁབ་རྣམས་ལ་གྲུབ་འབྲས་ལེགས་ཤོས་འཐོབ་ཀྱི་ཡོད་པའི་གདེང་ཚོད་ཡོད། རྒྱལ་ཁབ་དེ་དག་ལ་དྲང་བདེན་གྱི་ཚོང་ལས་དང་། ཕྱི་གསལ་ནང་གསལ་གྱི་གན་རྒྱ་འཐོབ་པ་མ་ཟད། ལས་ཀ་གསར་སྐྲུན་དང་། ཁོར་ཡུག་ལ་དོ་ཁུར་ལྡན་པའི་བཟོ་ཚོང་ཁང་། དེ་བཞིན་ལས་ཀའི་སྤུས་ཚད་ལེགས་ཤོས་བཅས་འཐོབ་ངེས་རེད་”ཅེས་གསུངས་ཡོད་འདུག
ཨེ་ཤི་ཡ་དཀྱིལ་མའི་རྒྱལ་ཁབ་ཁག་ལ་ཕེབས་པའི་གཟིགས་སྐོར་ཐུང་ངུ་དེའི་ནང་། ཕོམ་ཕོའོ་ཡིས་ཐོག་མར་རྒྱ་ནག་གི་གྲངས་ཉུང་མི་རིགས་རྣམས་ལ་དྲག་གནོན་བྱེད་པའི་སྲིད་བྱུས་འོག་གར་སོང་ཆ་མེད་དུ་གྱུར་བའམ། འཛིན་བཟུང་བཀག་ཉར་ཐེབས་པའི་ཁ་སག་མི་མང་རྣམས་ཀྱི་ནང་མི་ཉེ་འབྲེལ་དང་མཇལ་འཕྲད་གནང་ཞིང་། ཁ་སག་སི་ཐན་གྱིས་རྒྱ་ནག་གི་བཙན་གནོན་ལས་བྲོས་བྱོལ་དུ་ཡོང་མཁན་རྣམས་སྣེ་ལེན་བྱེད་བཞིན་པར་བཀའ་དྲིན་ཆེ་ཞུས་ཏེ་གསུངས་དོན། “འགྲོ་བ་མིའི་གཞི་རྩའི་ཐོབ་ཐང་སྲུང་སྐྱོབ་བྱེད་པ་དེས་རྒྱལ་ཁབ་ཅིག་གི་རྣམ་ཤེས་མཚོན་གྱི་ཡོད། ཨ་རིས་རྒྱལ་ཁབ་ཚང་མ་ལ་མཉམ་འབྲེལ་ཐོག་ནས་བཙན་གནོན་འདི་འཕྲལ་དུ་མཚམས་འཇོག་དགོས་པའི་རེ་སྐུལ་ཞུ་ཡི་ཡོད། ང་ཚོས་རྒྱལ་ཁབ་རྣམས་ལ་རྒྱ་ནག་ནས་བྲོས་བྱོལ་དུ་ཡོང་མཁན་ཚོར་སྐྱབས་བཅོལ་དུ་ལེན་པའི་འབོད་སྐུལ་ཞུ་ཡི་ཡོད། སོ་སོའི་ཆེ་མཐོང་སྲུང་སྐྱོབ་ཆེད་དུ། ཅིས་ཀྱང་གང་འགྲིག་པ་དེ་གྱིས།”
གཞན་ཡང་ཁོང་གིས་ཁ་སག་སི་ཐན་གྱི་འགོ་ཁྲིད་རྣམས་ལ་མུ་མཐུད་རྒྱལ་ཁབ་དེའི་ནང་ཨ་རིའི་ཚོང་ལས་དང་མ་འཇོག་སྔར་ལས་མང་བ་ཡོང་དུ་འཇུག་དགོས་པའི་སྐུལ་མ་བཏང་བ་དང་། རྒྱལ་ཁབ་གཉིས་ཀྱི་བར་དུ་འགྲུལ་སྐྱེལ་གནམ་གྲུ་ཐད་ཀར་འགྲོ་ཐུབ་པ་ཞིག་བཟོ་བའི་ཐད་ལ་གྲོས་མོལ་བྱེད་བཞིན་པའི་སྒང་ཡིན་སྐོར་བརྗོད་པ་མ་ཟད། ཁ་སག་སི་ཐན་གྱིས་རྒྱ་ནག་ནས་བྱུང་བའི་ནད་ཡམས་གསར་པ་དེར་གདོང་ལེན་བྱེད་པའི་འབད་བརྩོན་ལ་བསྟོད་བསྔགས་ཀྱང་བྱས་ཡོད་འདུག །
གསར་འགོད་པ་དཀོན་མཆོག་རབ་བརྟན།
