ཁམས་རྟའུའི་བོད་མི་ཞིག་འཛིན་བཟུང་།

རྒྱ་གཞུང་གིས་ཁམས་རྟའུ་ཁུལ་གྱི་བོད་མི་རིན་ཆེན་དར་རྒྱས་ཟེར་བ་ཞིག་རྒྱལ་གཅེས་དཔའ་བོ་ཚེ་དབང་ནོར་བུའི་ཕུང་པོ་བདག་པོ་བརྒྱབ་པ་སོགས་ཀྱི་ཉེས་མིང་འོག གློ་བུར་དུ་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་པ་རེད།

དེ་ཡང་རིན་ཆེན་དར་རྒྱས་ཀྱིས་༢༠༡༡ ལོའི་ཟླ་བ་༨ ཚེས་༡༥ ཉིན་དཀར་མཛེས་ཁུལ་རྟའུ་རྫོང་ཉ་མཚོ་དགོན་པའི་དགེ་འདུན་པ་ཚེ་དབང་ནོར་བུས་བོད་དོན་ཆེད་སྐུ་ལུས་མེར་སྲེག་བཏང་རྗེས། ཁོང་གི་སྐུ་ཕུང་རྒྱ་མིའི་ཉེན་རྟོག་པས་འཕྲོག་སྐབས་འགོག་རྒོལ་གྱིས་སྐུ་ཕུང་ལ་བདག་པོ་བརྒྱབ་པ་སོགས་ཀྱི་ཉེས་མིང་འོག་འཛིན་བཟུང་བྱ་རྩིས་བྱས་ཡོད་ཀྱང༌ད་བར་འཛིན་བཟུང་བྱེད་ཐུབ་མེད་པ་རེད།

འོན་ཀྱང་ཟླ་འདིའི་ཕྱི་ཚེས་༡༠ ཉིན་རྒྱ་ནག་གི་འབྲེལ་ཡོད་སྤྱི་བདེ་ཉེན་རྟོག་ཚན་པས་གསང་བའི་སྒོ་ནས་རིན་ཆེན་དར་རྒྱས་སམ། མིང་གཞན་ལ་གླ་ར་ཞུ་བ་ཁོང་རྟའུ་རྫོང་ཐོག་ཏུ་འགྲོ་བཞིིན་པའི་སྐབས་གློ་བུར་དུ་འཛིན་བཟུང་བྱས་ཡོད་འདུག་པ་དང་། ཁོང་འཛིན་བཟུང་བྱས་རྗེས་འབྲེལ་ཡོད་མི་སྣ་སུས་ཀྱང་ཁོང་གར་ཡོད་རྩད་གཅོད་ཐུབ་ཀྱི་མེད་པ་རེད། རིན་ཆེན་དར་རྒྱས་ད་ལྟ་དགུང་ལོ་༤༡ ཙམ་ཡིན་ཞིང་ཕ་ཡུལ་རྟའུ་ལོ་བ་གྲོང་ཚོ་ནས་རེད་འདུག ཁོང་གིས་ནམ་རྒྱུན་འཚོ་ཐབས་ཚོང་ལས་འདྲ་མིན་ལ་བསྟེན་གྱི་ཡོད་པ་དང༌། ཁོང་ལ་བུ་གཉིས་དང་བུ་མོ་གཅིག་བཅས་ཕྲུ་གུ་གསུམ་ཡོད་པ་རེད་འདུག