ཁམས་སོག་རྫོང་གི་བོད་མི་གཉིས་འཇུ་བཟུང།

ཟླ་༣ ཚེས་༣༠ ཉིན་ཁམས་སོག་རྫོང་ཁྲི་རྡོ་ཡུལ་ཚོའི་གྲོང་ཚོ་བཞི་པ་ནས་ཡིན་པའི་ཚེ་རྐོ་ཟེར་བ་ཞིག་དང་ད་དུང་མིང་མ་ཤེས་པ་གཅིག་བཅས་རྒྱ་གཞུང་གི་འཇུ་བཟུང་བྱས་ཡོད་པའི་གནས་ཚུལ་གསར་དུ་ཤེས་རྟོགས་བྱུང་ཡོད་པ་རེད།

ཁོང་གཉིས་འཇུ་བཟུང་བྱེད་དོན་ཡང་ཁ་པར་བརྒྱུད་བོད་དོན་དང་འབྲེལ་བའི་པར་དང་ཡིག་གེ་ཕར་ཚུར་བཏང་ཡོད་བའི་རྐྱེན་གྱིས་ཡིན་པ་དང་། སོག་རྫོང་ལ་ཁྲིད་རྗེས་གང་དུ་བཀག་ཉར་བྱས་མིན་གྱི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།

ས་གནས་སུ་མི་མང་པོ་དོན་མེད་འཇུ་བཟུང་བཙོན་འཇུག་དང་། ཉེས་མེད་དྲག་རྡུང་བྱས་པ་སོགས་མི་སྤྱོད་ལས་འདས་པའི་དྲག་གནོན་བྱེད་བཞིན་ཡོད་འདུག་ཀྱང། མི་སུ་འཇུ་བཟུང་བྱས་མིན་སོགས་ས་གནས་སུ་དམ་དྲག་དང་བརྒྱུད་ལམ་ཡོངས་རྫོགས་བཀག་འགོག་བྱས་རྐྱེན་ཤེས་རྟོགས་ཐུབ་ཀྱི་མེད་པ་རེད།

དེ་བཞིན་ཟླ་༣ ཚེས་༢༩  ཉིན་སོག་རྫོང་ཁྲི་རྡོ་ཡུལ་ཚོའི་ཆུང་བདག་དང། དགེ་འདུན་བསྟན་རྒྱས་གཉིས་ཁྲི་རྡོ་ཡུལ་ཚོའི་སྲིད་གཞུང་གི་ནང་འབོད་འགུག་གིས་ཉེས་རྡུང་ཚད་ལས་བརྒལ་བ་བཏང་ནས་གློད་ཡོད་འདུག་ཀྱང། དགེ་འདུན་བསྟན་རྒྱས་ལ་ཉིན་༣ རིང་ཉེས་རྡུང་ཚད་ལ་འདས་པ་བཏང་བ་མ་ཟད་སོག་པ་བཅག་པའི་དཀའ་ངལ་བྱུང་ཡོད་འདུག

ཁོང་གཉིས་ཁྲི་རུ་ལྕགས་ཟམ་གྱི་ཉེ་འཁོར་ཁམས་ཇ་ཁ་ཟེར་བར་སྡོད་ཀྱི་ཡོད་སྟབས། ཁྲི་རུའི་ལྕགས་ཟམ་ཁར་རང་བཙན་ཡི་གེ་འབྲི་མཁན་གྱི་ཉེས་མིང་འོག་འཇུ་བཟུང་དང་ཉེས་རྡུང་གཏོང་གི་ཡོད་འདུག །