ཁམས་སོག་རྫོང་ཙན་དན་དགོན་པར་དམ་དྲག

སོག་ཙན་དན་དགོན་ལ་དེ་སྔོན་ལས་དོན་རུ་ཁག་ཡོད་པའི་ཐོག དམིགས་བསལ་གྱི་ཁ་སྣོན་དུ་ཁུལ་རིམ་པའི་ལས་བྱེད་མི་སྣ་ལྔ་བཅུ་ལྷག་ཙམ་སླེབས་ནས། ཛ་དྲག་གི་ཏང་སྲིད་སློབ་སྦྱོང་ཀྱི་ལས་དོན་སྤེལ་བཞིན་འདུག

དེ་ཡང་ཟླ་༥ པའི་ཚེས་༡༩ ཉིན་སོག་ཙན་དན་དགོན་དུ་རྒྱ་གཞུང་གིས་དམིགས་བསལ་ཛ་དྲག་གི་ཚོགས་འདུ་ཞིག་འཚོགས་ནས། སྤྱིར་དེ་སྔོན་རྒྱལ་གཅེས་ཀྱི་སློབ་གསོ་དང་ཏང་སྲིད་སློབ་སྦྱོང་བྱེད་ཀྱི་ཡོད་མུས་ཐོག དེང་སྐབས་དམིགས་བསལ་ཛ་དྲག་གི་དྲིལ་བསྒྲགས་དང་ལས་དོན་སྤེལ་བཞིན་འདུག

འདི་ལོར་དགོན་པའི་གྲྭ་པ་བཅུ་ཙམ་དང་མི་སྐྱ་གང་མང་འཛིན་བཟུང་བྱས་པ་དང་དེ་མཚུངས་ཀྱིས་གནས་ཚུལ་མང་པོ་ཡོད་རབ་དང་། རྫོང་འདིའི་ཁུངས་གཏོགས་ཀྱི་སྐྱ་སེར་སུ་ཡིན་རུང་ལྗོངས་ཞིང་ཆེན་ལས་རྒལ་བའི་ས་ཁུལ་གཞན་དང་། གྲོང་ཁྱེར་གཞན་གྱི་སློབ་གྲྭར་འགྲོ་མི་ཆོག་པའི་བསྒྲགས་གཏམ་སྤེལ་ཡོད་པ་རེད། དེ་སྔོན་ཁ་བྲལ་ལ་ངོ་རྒོལ་བྱེད་པ་ནི་ཁ་ནས་བཤད་པ་ཙམ་མ་གཏོག་ལག་ལེན་བྱས་མེད་པ་དང་། ད་ནས་བཟུང་ཁ་སེམས་དབྱེར་མེད་ཀྱི་དགག་པ་ནན་མོ་བྱེད་དགོས་རབ་སོགས་བཙན་གནོན་གྱི་སྐད་ཆ་མང་པོ་བཤད་འདུག

གལ་ཏེ་གྲྭ་པ་གཅིག་ཉིན་གཉིས་ཚོགས་འདུ་ལ་ཆད་ན་གནས་དབྱུང་བྱེད་རྒྱུ་ཡིན་རབ་བཤད་པ་དང་། ཚོགས་འདུ་འཚོག་ཐེངས་རེ་ལ་དུས་ཡུན་ཆུ་ཚོད་གསུམ་ཙམ་འཚོགས་ཀྱི་འདུག་ལ། ཙན་དན་དགོན་དུ་ཉེན་རྟོག་རུ་ཁག་གཏན་སྡོད་ཀྱི་ཁང་ཆེན་གསར་སྐྲུན་བྱས་སོང་།

དེ་མཚུངས་ཀྱི་དབྲོག་རྟ་ཡུལ་ཚོས་གཙོས་པའི་གྲོང་སྡེ་ཁག་ལ་གལ་ཏེ་རྫོང་རིམ་པའི་དགོངས་པ་དང་འགལ་བའི་ཆབ་སྲིད་ལ་འགལ་ན་དབྱར་རྩ་དགུན་འབུ་རྐོ་མི་ཆོག་ཅེས་བཀག་རྒྱ་དང་ལག་ལྟར་ཡང་བྱས་འདུག དེ་སྔོན་འབྲི་རུ་ལ་ལག་ལྟར་བྱས་པའི་བྱ་འགུལ་དེ་སོག་རྫོང་ལ་ངེས་པར་དུ་ལག་ལྟར་བྱེད་དགོས་རབ་བསྒྲགས་འདུག     གཞུང་གི་སློབ་གྲྭ་མ་ཡིན་པའི་སྒེར་གཙུག་སློབ་གྲྭ་ལ་སོང་ན་ལྗོངས་ཞིང་ཆེན་གྱི་དབྱེ་འབྱེད་གསལ་པོ་བྱས་ཏེ། ལྗོངས་ཞིང་ཆེན་གཞན་ལ་སློབ་གྲྭར་སོང་ན་རང་ཉིད་དང་ཁྱིམ་མི་དབྱར་རྩ་དགུན་འབུ་བརྐོ་མི་ཆོག་པའི་བཀའ་རྒྱ་བཀྲམ་འདུག དཔེར་ན་མགོ་ལོག་ར་རྒྱ་སློབ་གླིང་དང་གསེར་རྟ་ནང་བསྟན་སློབ་གླིང་སོགས་པའི་ཁུལ་དང་ཞིང་ཆེན་གྱི་སློབ་གླིང་ཆེ་འབྲིང་ཆུང་གསུམ་གང་དུ་ཡང་འགྲོ་མི་ཆོག་པའི་བཀག་རྒྱ་དང་། གལ་ཏེ་སོང་ན་དབྱར་རྩ་བརྐོ་མི་ཆོག་པ་ལ་སོགས་པའི་ཆད་པ་ལག་ལྟར་བྱེད་དགོས་ཚུལ་དང་། ཐ་ན་ཁྱིམ་མི་ཡང་དབྱར་རྩ་བརྐོ་མི་ཆོག་པའི་བསྒྲགས་གཏམ་སྤེལ་ཡོད་པ་རེད།   སོག་རྫོང་དུ་སྐད་འཕྲིན་བརྒྱུད་ལམ་ཡོངས་ལ་བཀག་སྡོམ་དང་ཞིབ་བཤེར་བྱས་རྐྱེན་མི་སྐྱ་མང་པོ་ཞིག་འཛིན་བཟུང་དང་བཀག་ཉར་བྱས་ཡོད་ཀྱང་ཞིབ་ཕྲའི་གནས་ཚུལ་བརྒྱུད་ལམ་ལ་སྟངས་འཛིན་ནན་མོ་བྱས་རྐྱེན་ཤེས་རྟོགས་མ་བྱུང་ཅེས་བོད་ནས་འབྲེལ་ཡོད་ཀྱི་འགྲེལ་བརྗོད་གནང་སོང་།།  གསར་འགོད་པ་ངག་དབང་ཐར་པ།