ཁམས་སྡེ་དགེ་རུ་བོད་མི་ཞིག་གི་བོད་དོན་སྐད་འབོད།

བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཕྱི་ཟླ་༤ ཚེས་༨ ཉིན་གྱི་བོད་ནང་གི་ཉིན་གུང་ཆུ་ཚོད་༣པ་ཡོལ་ཙམ་ལ་ཁམས་དཀར་མཛེས་ ཁུལ་སྡེ་དགེ་རྫོང་ཡིད་ལྷུང་མ་ཎི་གད་མགོའི་ཡུལ་ཚོར་ཡོད་པའི་རྒྱ་ནག་གི་སྲིད་གཞུང་གི་ལས་ཁུངས་ཡོད་སའི་སྲང་ལམ་དུ་བོད་མི་གཞོན་སྐྱེས་ཞིག་གིས་བོད་དོན་ཡིག་ཆ་མང་པོ་གཏོར་བཞིན་བོད་ལ་རང་དབང་དགོས་པའི་སྐད་འབོད་བྱས་ཡོད་ནའང་། ཞིབ་འཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།

ཁོང་གི་སྐད་འབོད་བྱས་པའི་བརྙན་ཐུང་ཞིག་ཕྱི་ལོགས་སུ་འབྱོར་ནང་། ཁོང་གིས་ཡིག་ཆ་གཏོར་བཞིན། བོད་ལ་རང་དབང་དགོས། རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག་ཅེས་གོམ་བགྲོད་བྱས་པ་མཐོང་ཐུབ་པ་མ་ཟད། སྲང་ལམ་གྱི་བོད་མི་ཚོས་ཕོ་གསོལ་ཞེས་སྐད་འབོད་བྱས་པ་དང་། རྒྱལ་བ་བསྟན་འཛིན་རྒྱ་མཚོ་ཞེས་སྐད་ཆ་བཤད་ཀྱི་ཡོད་པ་ཡང་ཅུང་གོ་ཐུབ་ཀྱི་ཡོད་པ་རེད།

རྒྱ་ནག་གཞུང་གི་ས་གནས་ཉེན་རྟོག་པས་ཁོང་འཛིན་བཟུང་བྱས་ཡོད་ནའང་། ཞིབ་ཕྲ་ཤེས་རྟོགས་ཐུབ་ཀྱི་མེད་པ་དང་། སྐད་འབོད་བྱེད་མཁན་བོད་མི་ཁོང་ཁམས་སྐྱེ་དགུ་ཕྱོགས་ནས་ཡིན་པའི་གནས་ཚུལ་ཡང་འདུག །