ཁལ་ཁ་རྗེ་བཙུན་དམ་པའི་མཛད་རྣམ་དབུ་འབྱེད།

ཟླ་འདིའི་ཚེས་༥ ཉིན་གྱི་སྔ་དྲོ་དྷ་ས་ཀརྟི་དགེ་རྩ་ཚོགས་པའི་ཚོགས་ཁང་ནང་ཁལ་ཁ་རྗེ་བཙུན་དམ་པ་སྐུ་ཕྲེང་དགུ་པའི་མཛད་རྣམ་<<ཆོག་ཤེས་དང་བག་ཡོད་ཀྱི་མི་ཚེ་>>ཞེས་པའི་དཔེ་དེབ་དབུ་འབྱེད་ཀྱི་མཛད་སྒོ་འཚོགས་ཡོད་པ་རེད།

མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་དང་། ཇོ་ནང་པའི་རྒྱལ་ཚབ་རིན་པོ་ཆེ་གཉིས་ཕེབས་ཏེ། དཔེ་དེབ་དབུ་འབྱེད་དང་འབྲེལ་བའི་གསུང་བཤད་གནང་ཡོད་པ་རེད། ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོས་དཔེ་དེབ་དབུ་འབྱེད་ཀྱི་ངོ་སྤྲོད་གསུང་བཤད་གནང་བ་དང་། མཛད་རྣམ་རྩོམ་པ་པོ་མཁན་པོ་ངག་དབང་རྗེས་མཛད་རྣམ་དེ་འབྲི་དགོས་པའི་དམིགས་ཡུལ་སྐོར་ངོ་སྤྲོད་བྱེད་སྐབས། ཁོང་ལ་སྔོན་མ་ནས་ཁལ་ཁ་རྗེ་བཙུན་དམ་པས་ཁོང་གི་མཛད་རྣམ་ཞིག་འབྲི་དགོས་པའི་བཀའ་གནང་སྐོར་དང་། དེ་ཡང་ཁོང་གི་རྣམ་ཐར་དེ་ “ཚིག་རྒྱན་གྱིས་མ་སྤྲས་ཤིང་། ཡུལ་སྐད་ཀྱང་མ་འདྲེས་པར་གོ་སླ་བ། སྒྲོ་སྐུར་མེད་པར་སྐྱོན་དང་ཡོན་ཏན་གཉིས་ཀ་དྲང་བོར་བརྗོད་པ། མ་བཅོས་ལྷུག་པའི་དེབ་གཏེར་ཇི་ལྟ་བ་བཞིན་འབྲི་འགན་ཁྱེད་ལ་བབ་” ཅེས་ལམ་སྟོན་གནང་ཡོད་སྐོར་དང་། ལོ་རྒྱུས་དེ་འབྲེལ་ཡོད་ཡིག་ཆ་བདུན་ཅུ་ཙམ་ལ་དཔྱད་ཞིབ་དང་། མི་སྣ་བཅུ་བདུན་ཙམ་ལ་བཅར་འདྲི་བྱས་ཡོད་སྐོར་ངོ་སྤྲོད་གནང་། དེབ་དེར་སྟོད་སྨད་གཉིས་ཀྱི་ངོ་བོར་པར་སྐྲུན་བྱས་ཏེ། ས་བཅད་དང་པོ་སྐྱེས་པའི་རབས་སྔོན་མ་དག་གི་རྣམ་ཐར་མདོ་ཙམ་བརྗོད་པ། ས་བཅད་གཉིས་པ་སྐྱབས་མགོན་རྗེ་བཙུན་དམ་པ་སྐུ་ཕྲེང་དགུ་པའི་རྣམ་ཐར་ཁོང་འཁྲུངས་ནས་མཛད་འཕྲིན་ག་འདྲ་བསྐྱངས་བསྐོར་ཞིབ་པར་བྲིས་ཡོད་པ་རེད།

ཁལ་ཁ་རྗེ་བཙུན་དམ་པ་ནི་ ༡༩༣༢ ལོར་བོད་དབུས་སུ་སྐུ་འཁྲུངས། འབྲས་སྒོ་མང་གྲྭ་ཚང་དུ་ཆོས་ཞུགས་མཛད་དེ་མདོ་ཕྱོགས་ཀྱི་གཞུང་ཆེན་ཁག་ལ་སློབ་གཉེར་མཛད། ༡༩༩༧ ལོར་༸གོང་ས་མཆོག་གིས་དཔལ་རྒྱལ་བ་ཇོ་ནང་བའི་བསྟན་པའི་བདག་པོར་མངའ་གསོལ་མཛད། སོག་ཡུལ་དུ་ཕེབས་ནས་གསེར་ཁྲིར་མངའ་གསོལ་མཛད་དེ་མཛད་འཕྲིན་རྒྱ་ཆེར་བསྐྱངས། ༢༠༡༢ ལོར་སོག་ཡུལ་དུ་སྐུ་ཞི་བར་གཤེགས།།
གསར་འགོད་པ་ཆོས་ཉིད་འོད་ཟེར།