ཁེ་ན་ཌའི་གྲོས་ཚོགས་ནང་བོད་དོན་རྒྱབ་སྐྱོར་དགོས་པའི་དགོས་འདུན་བཏོན་འདུག

ཟླ་འདིའི་ཚེས་༡༤ ཉིན་ཁེ་ན་ཌའི་གྲོས་ཚོགས་གོང་མའི་ནང་དུ་གྲོས་ཚོགས་འཐུས་མི་སྐུ་ཞབས་ཐན་ཧ་ཡི་ནོ་(Thanh Hai Ngo) ཡིས། རྒྱ་ནག་གི་འོག་ནས་དབུ་མའི་ལམ་གྱི་སྲིད་བྱུས་བརྒྱུད་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་རག་ཐབས་སུ་ཁེ་ན་ཌ་གཞུང་གིས་རྒྱབ་སྐྱོར་དགོས་པའི་གྲོས་འཆར་ཞིག་བཏོན་ཡོད་པ་རེད།

གྲོས་ཚོགས་འཐུས་མི་ཁོང་གིས། “ཕྱི་ལོ་༢༠༡༧ ཟླ་༡༡ ཚེས་༢༣ ནས་བཟུང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་མ་བྱུང་བ་དེར་གུས་པར་སེམས་འཚབ་ཧ་ཅང་འདུག  ཁེ་ན་ཌའི་ཡུལ་འདིར་སྨྲ་བརྗོད་དང་ཆོས་དད་རང་དབང་།  དེ་བཞིན་འགྲོ་སྐྱོད་སོགས་ལ་དམ་དྲག་རྩ་བ་ནས་མེད་པར་རང་དབང་ཆ་ཚང་ཡོད།  ཕྱོགས་མཚུངས་མི་སྒེར་སོ་སོའི་སྲིད་གཞུང་གི་ལངས་ཕྱོགས་དང་མི་མཐུན་པའི་བསམ་ཚུལ་འཛིན་ཆོག་པའི་རང་དབང་ཡང་ཡོད།  དེ་དག་གཞི་རྩའི་འགྲོ་བ་མིའི་ཐོབ་ཐང་ཡིན་སྟབས་ཡུལ་འདིར་སྲུང་སྐྱོབ་གནང་བཞིན་ཡོད།   འོན་ཀྱང་བོད་རང་སྐྱོངས་ལྗོངས་ཟེར་བའི་ས་ཁུལ་དང་། དེ་བཞིན་བོད་རིགས་གནས་སྡོད་ཀྱི་ས་ཁུལ་གཞན་ཁག་ཏུ་རྒྱ་ནག་གཞུང་གིས་དམ་དྲག་ཚབས་ཆེ་བྱེད་བཞིན་འདུག རྒྱ་ནག་དམར་གཞུང་གི་དབང་བསྒྱུར་དང་དམ་དྲག་ཚབས་ཆེ་འོག་བོད་མི་རྣམས་དཀའ་སྡུག་ཚད་མེད་མྱོང་བཞིན་འདུག  བོད་མིའི་དཀའ་སྡུག་ལ་ང་ཚོ་གྲོས་ཚོགས་འཐུས་མི་ཚོ་བཏང་སྙོམས་ངང་སྡོད་ཐབས་མེད།  ད་ཆ་ཁེ་ན་ཌའི་སྲིད་གཞུང་གིས་ལས་འགུལ་ཤུགས་ཆེ་ཙམ་སྤེལ་དགོས་པའི་དུས་ལ་བབ་འདུག དེ་རིང་གུས་པས་ཁེ་ན་ཌའི་སྲིད་གཞུང་ལ་བོད་མིར་མིང་དོན་མཚུངས་པའི་རང་སྐྱོང་གི་གནས་བབ་ཐོབ་ཆེད་རྒྱབ་སྐྱོར་གནང་སྟེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་གཤམ་གསལ་གྲོས་འཆར་ཁག་གི་ཐོག་གནོན་ཤུགས་སྤྲོད་དགོས་པའི་རེ་འདུན་ཞུ་རྒྱུ་ཡིན་”ཞེས་གསུངས་འདུག

གྲོས་འཆར་གྱི་དོན་ཚན། ༡ ༽ ཁེ་ན་ཌའི་སྲིད་གཞུང་གིས་རྒྱ་ནག་གཞུང་ལ་དབུ་མའི་ལམ་གྱི་སྲིད་བྱུས་གཞི་རྩར་བཟུང་ནས་བོད་རྒྱ་འབྲེལ་མོལ་བསྐྱར་གསོ་དགོས་པའི་རེ་འདུན་གདོན་དགོས།

༢ ༽ རྒྱ་ནག་གཞུང་གིས་བོད་མིའི་སྐད་ཡིག་སྲུང་སྐྱོབ་ཀྱི་ཐོབ་ཐང་དང་།  བུད་མེད་ཀྱི་ཐོབ་ཐང་།  བོད་མིའི་ཆོས་དད་རང་དབང་ལ་གུས་བརྩི་དང་། དེ་བཞིན་སྲིད་གཞུང་དང་ལྟ་གྲུབ་ལངས་ཕྱོགས་མི་མཐུན་པ་འཛིན་མཁན་ཚོའི་ཐོབ་ཐང་བཅས་ལ་གུས་བརྩི་ཞུ་དགོས།

༣ ༽ བོད་མིའི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་གཏོང་དགོས་པ་མ་ཟད།  དམ་བསྒྲགས་བཀག་བསྐྱིལ་འོག་གནས་བཞིན་པའི་བོད་མི་དེ་དག་འཕྲལ་མར་གློད་བཀྲོལ་གཏོང་དགོས།

༤ ༽ རྒྱ་ནག་གཞུང་ནས་ཁེ་ན་ཌའི་མི་སེར་ལ་བོད་ནང་དམ་བསྒྲགས་རྩ་བ་ནས་མེད་པར་འགྲོ་འོང་གི་རང་དབང་སྤྲོད་དགོས།  དེའི་ཁར་ཁེ་ན་ཌའི་སྲིད་གཞུང་གིས་༸གོང་ས་ཏཱ་ལའི་བླ་མ་མཆོག་གིས་ངོས་འཛིན་མཛད་པའི་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་༸པཎ་ཆེན་ཡང་སྲིད་འཁྲུལ་བྲལ་ཡིན་པར་གཞུང་འབྲེལ་ངོས་འཛིན་ཞུ་དགོས། བོད་ཀྱི་གནད་དོན་གསལ་དགོས་ན་ཁེ་ན་ཌའི་སྲིད་གཞུང་གིས་གོང་གི་དོན་གནད་དེ་དག་ཐོག་ཁ་ཞེ་གཉིས་མེད་ཀྱི་རྒྱབ་སྐྱོར་ཤུགས་ཆེ་གནང་དགོས།། བརྙན།https://youtu.be/t98UI6JvC_I

གསར་འགོད་པ་ཆོས་ཉིད་འོད་ཟེར།