ཁེ་ན་ཌའི་གྲོས་ཚོགས་སུ་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་།
ཟླ་འདིའི་ཚེས་༡༠ ཉིན་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཁེ་ན་ཌའི་གྲོས་ཚོགས་སུ་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱི་གྲོས་འཆར་ཞིག་གཏན་འབེབས་གནང་ཡོད་འདུག
གྲོས་འཆར་ནང་རྒྱ་ནག་གཞུང་གིས་གོ་རིམ་ལྡན་པའི་སྒོ་ནས་བོད་ཀྱི་ཆོས་དང་རིག་གཞུང་བཙན་སྒྱུར་བྱེད་བཞིན་པ་ཁེ་ན་ཌའི་གཞུང་གིས་ངོས་འཛིན་དང་། བོད་མི་རྣམས་ནི་མི་རིགས་ཤིག་དང་རྒྱལ་ཁབ་ཅིག་ཡིན་པའི་ཆ་ནས་རང་ཐག་རང་གཅོད་ཀྱི་ཐོབ་ཐང་རྩོད་ལེན་བྱེད་ཆོག་པ་ངོས་འཛིན། དེ་བཞིན་བོད་མི་རྣམས་ལ་༧གོང་ས་མཆོག་གི་ཡང་སྲིད་ངོས་འཛིན་ཐེ་བའི་ཆོས་ལུགས་དང་། དཔལ་འབྱོར། སྤྱི་ཚོགས། རིག་གཞུང་དང་འབྲེལ་བའི་སྲིད་བྱུས་ལ་ཕྱིའི་རྒྱལ་ཁབ་ཀྱི་ཐེ་ཇུས་མེད་པར་རང་དབང་གིས་གདམ་རྒྱུའི་ཐོབ་ཐང་ཡོད་པ་ངོས་འཛིན་དང་། ཐོབ་ཐང་དེས་རྒྱ་གཞུང་གིས་མ་འོངས་པ་༧གོང་ས་མཆོག་གི་སྐུའི་ཡང་སྲིད་ཐོག་ཐེ་ཇུས་བྱེད་མི་ཆོག་པ་བཟོས་ཡོད་འདུག ཁྲིམས་འཆར་དེ་ནི་ཁེ་ན་ཊའི་སྲིད་དོན་ཚོགས་པ་(Bloc Quebecois) ་ཞེས་པའི་གྲོས་ཚོགས་འཐུས་མི་སྐུ་ཞབས་ཨེ་ལེག་སི་བུ་རུ་ནེ་ལི་དུ་སེབ་བི་(Alexis Brunnelle-Duceppe) ་ཡིས་ངོ་སྤྲོད་གནང་ཡོད་པ་དང་། རེས་གཟའ་ཟླ་བའི་ཉིན་གྲོས་ཚོགས་སུ་ཡོད་པའི་འཐུས་མི་ཚང་མས་རྒྱབ་སྐྱོར་བྱས་འདུག་ཀྱང་། སྐབས་དེར་སྲིད་འཛིན་གྲོས་ཚོགས་སུ་མེད་པ་རེད་འདུག
གྲོས་འཆར་དེ་གཏན་འབེབས་བྱས་རྗེས། གྲོས་ཚོགས་འཐུས་མི་Julie Vignola ཡིས་ཨེག་སི་དྲྭ་ཚིགས་སུ་དེ་རིང་གཏན་འབེབས་བྱུང་བའི་གྲོས་འཆར་དེ་ཡིས་ལོ་གཅིག་ལྷག་གི་བགྲོ་གླིང་དང་གྲོས་མོལ་མཚོན་གྱི་ཡོད་ཅེས་སྤེལ་འདུག
གཞན་ཡང་། ཁེ་ན་ཊའི་གྲོས་ཚོགས་འོག་མའི་ནང་གྲོས་འཆར་གཏན་འབེབས་གནང་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་གིས་ཨེག་སི་ (X) སྤྱི་ཚོགས་དྲྭ་རྒྱ་བརྒྱུད། ཁེ་ན་ཌའི་གྲོས་ཚོགས་འོག་མའི་ནང་བོད་མིའི་རང་ཐག་རང་གཅོད་ཀྱི་ཐོབ་ཐང་སྐོར་གྲོས་འཆར་གཏན་འབེབས་གནང་བ་དེས་བོད་ནང་གི་བོད་མི་ཚོའི་བློས་གཏོང་འཐབ་རྩོད་དེ་བརྗེད་མེད་པའི་བརྡ་ལན་ཤུགས་ཆེན་པོ་སྤྲད་ཡོད། གྲོས་ཚོགས་འཐུས་མི་ཨེ་ལེག་སི་བུ་རུ་ནེ་ལི་དུ་སེབ་བི་ (Alexis Brunnelle-Duceppe) ལགས་དང་། གྲོས་འཆར་ལ་རྒྱབ་སྐྱོར་གནང་མཁན་ཆབ་སྲིད་ཚོགས་པ་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། གྲོས་འཆར་འདི་ཡིས་རྒྱལ་སྤྱིའི་སྤྱི་ཚོགས་ཁྲོད་བོད་དོན་ལ་རྒྱབ་སྐྱོར་ཇེ་ཆེར་འགྲོ་བཞིན་པ་གསལ་པོར་བསྟན་པ་ཙམ་མ་ཡིན་པར། རྒྱ་ནག་གིས་བོད་ནང་གོ་རིམ་ལྡན་པའི་སྒོ་ནས་བོད་ཀྱི་རིག་གཞུང་བཙན་སྒྱུར་གཏོང་བཞིན་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པ་བཅས་ལ་གདོང་ལེན་བྱེད་ངེས་རེད། ཅེས་གསུངས་པ་བོད་མིའི་སྒྲིག་འཛུགས་ཀྱི་དྲྭ་རྒྱའི་ཐོག་བཀོད་འདུག།
གསར་འགོད་པ། བློ་བཟང་རྒྱ་མཚོ།
