ཁེ་ན་ཌའི་སྲིད་བློན་ལ་འོས་བསྡུའི་རྒྱལ་ཁ་ཐོབ་པར་༧གོང་ས་མཆོག་གིས་འཚམས་འདྲི་གནང་འདུག 

ཁེ་ན་ཌའི་རྒྱལ་ཡོངས་གྲོས་ཚོགས་འོས་བསྡུའི་ནང་། གཞུང་འཛིན་གུ་ཡངས་ཚོགས་པ་(the Liberal Party) ལ་རྒྱལ་ཁ་ཐོབ་རྗེས། ༧གོང་ས་མཆོག་གིས་སྲིད་བློན་ཊེ་རུ་ཌོ་(Trudeau) ལ་འཚམས་འདྲི་གནང་བ་དང་། ཁེ་ན་ཌས་བོད་མི་སྐྱབས་བཅོལ་བ་རྣམས་དགའ་བས་བསུས་པར་བཀའ་དྲིན་ཆེ་ཞུས་འདུག 

ཁ་སང་རེས་གཟའ་ལྷག་པའི་ཉིན་བཏང་བའི་འཚམས་འདྲིའི་གསུང་འཕྲིན་ནང་། ༧རིན་པོ་ཆེ་མཆོག་གིས་སྲིད་བློན་ཊེ་རུ་ཌོ་ལ་“འཛམ་གླིང་ཡོངས་ཀྱི་མི་མང་གྲངས་མེད་ལ་གནོད་འཚེ་གཏོང་མཁན་གྱི་ཏོག་དབྱིབས་ནད་ཡམས་ལྟ་བུའི་དཀའ་ཉེན་དག་གི་གདོང་དུ་ཁྱེད་ཀྱིས་དབུ་ཁྲིད་ལེགས་པོ་གནང་བར་ངོས་ཀྱིས་རྗེས་སུ་ཡི་རང་ཞུ་ཡི་ཡོད།  དེ་བཞིན་དཀའ་རྙོག་ཆེ་བའི་འཛམ་གླིང་གི་ཡུལ་གྲུ་ཁག་ནས་མི་མང་སྐྱོ་བོ་རྣམས་བྱམས་བརྩེས་སྐྱབས་བཅོལ་དུ་ལེན་པའི་ཁེ་ན་ཌའི་སྲིད་བྱུས་ལ་ངོས་ཀྱིས་ཡུན་རིང་བསྔགས་བརྗོད་བྱེད་ཀྱི་ཡོད། ངོས་རང་ཁེ་ན་ཌའི་ཆེ་མཐོང་གི་མི་སེར་ཞིག་ཡིན་པའི་ཆ་ནས། འདི་ལྟ་བུའི་གཏོང་ཕོད་དང་བྱམས་བརྩེའི་བྱ་སྤྱོད་ལ་དགའ་སྤོབས་སྐྱེས་ནས་ཡོད་”ཅེས་བྲིས་གནང་འདུག

དེ་མིན་ད་དུང་། དགུང་གྲངས་༨༦ ལ་ཕེབས་པའི་༧གོང་ས་མཆོག་གིས་འདས་པའི་ལོ་ངོ་དག་གི་ནང་དུ་ཁོང་ཁེ་ན་ཌར་ཐེངས་མང་ཕེབས་ཐུབ་པ་བྱུང་བར་ཐུགས་དགྱེས་ཡོད་པ་དང་། ཁེ་ན་ཌའི་སྤུན་ཟླ་ཕོ་མོ་ཚོས་ཁོང་ལ་སྤྲད་པའི་མཛའ་བརྩེས་ཁོང་ལ་སེམས་འགུལ་གཏིང་ཟབ་ཐེབས་བྱུང་ཚུལ་གསུངས་པ་མ་ཟད། “ངོས་ཀྱིས་གོ་སྐབས་འདི་དང་བསྟུན་ནས་ཁྱེད་ཀྱི་ཡབ་འདས་པོ་སྲིད་བློན་ཡིན་པའི་སྐབས་ནས་བཟུང་སྟེ་ཁེ་ན་ཌས་བོད་མི་སྐྱབས་བཅོལ་བ་རྣམས་དགའ་བས་བསུས་པར་བཀའ་དྲིན་ཆེ་”ཞེས་ཀྱང་གསུངས་འདུག ། 

གསར་འགོད་པ་དཀོན་མཆོག་རབ་བརྟན།