ཁྲིམས་གཏུག་ནི་ཞི་བའི་ལས་འགུལ་ནང་ནས་ཚད་མཐོ་ཤོས་དེ་ཡིན།

ཟླ་འདིའི་ཚེས་༡༤ ཉིན་དྷ་ས་མེག་གྷན་ཉིན་མོའི་སློབ་གྲྭའི་ནང་བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་འབྲེལ་མཐུད་ཁང་གཉིས་ཀྱི་གོ་སྒྲིག་འོག སི་པན་རྒྱལ་ཡོངས་ཁྲིམས་ཁང་དུ་རྒྱ་ནག་གི་དཔོན་རིགས་ཟུར་པ་བཞི་ཁྲིམས་གཏུག་བྱེད་མཁན་ཨེ་ལན་དང་ཧོ་སེ་གཉིས་ཀྱིས་མི་མང་ལ་ཁྲིམས་གཏུག་གི་བརྒྱུད་རིམ་སྐོར་ལ་གཏམ་བཤད་གནང་ཡོད་པ་རེད།

སྐུ་ཞབས་ཨེ་ལན་ནི་སྔོན་ནས་བོད་དོན་རྒྱབ་སྐྱོར་བ་ཞིག་ཡིན་པ་དང་། ཁོང་དང་ཁྲིམས་རྩོད་པ་ཧོ་སེ་གཉིས་ཀྱིས་བོད་ཀྱི་ཆབ་སྲིད་བཙོན་ཟུར་དཔལ་ལྡན་རྒྱ་མཚོ་དང་། གཞོན་ནུ་ལྷན་ཚོགས་སོགས་མཉམ་དུ་རྒྱ་ནག་གི་དཔོན་རིགས་ཟུར་པ་བཞི་༢༠༠༥ ལོ་ནས་རིམ་པས་སི་པན་རྒྱལ་ཡོངས་ཁྲིམས་ཁང་དུ་ཁྲིམས་གཏུག་བྱས་ཡོད་པ་རེད།

རྒྱ་ནག་གི་དཔོན་རིགས་ཅང་ཙི་མིན་སོགས་ཀྱིས་བོད་ནང་མི་མང་སྡེབས་གསོད་བྱས་པའི་འགྱོད་གཞིའི་འོག་ཁྲིམས་གཏུག་བྱས་པ་དང་། ༢༠༡༤ ལོའི་ཕྱི་ཟླ་༡༠ ནང་ཁྲིམས་ཁང་ནས་ཁོང་ཚོར་ནག་ཉེས་ཡོད་པའི་ཁྲིམས་ཐག་བཅད་ནའང་། རྒྱ་ནག་གཞུང་གིས་སི་པན་གཞུང་ལ་གནོན་ཤུགས་སྤྲད་དེ། ཁྲིམས་ཆད་དེ་ནུས་མེད་ཆགས་ཡོད་པ་རད།

ཁྲིམས་ཁང་དེའི་སི་པན་གྱི་མི་སེར་མ་ཡིན་པ་ཚོས་ཁྲིམས་གཏུག་བྱེད་རྒྱུ་ཐོབ་ཐང་མེད་སྐོར་བརྗོད་པར་བརྟེན། སི་པན་གྱི་མི་སེར་ཡིན་པ་སྤྱི་འཐུས་ཐུབ་བསྟན་དབང་གྱིས་སོགས་ཀྱིས་བསྐྱར་དུ་ཁྲིམས་གཏུག་དེ་བྱེད་ཀྱི་ཡོད་པ་རེད།

སྐུ་ཞབས་ཨེ་ལན་ངོ་སྤྲོད་གནང་བ་ལྟར་ན། ཁྲིམས་གཏུག་བྱེད་རྒྱུ་དེ་ཞི་བའི་ལས་འགུལ་ནང་ནས་ཚད་མཐོ་ཤོས་དེ་ཡིན་པ་དང་། ཁྲིམས་གཏུག་གི་གོ་རིམ་ཁྲོད་ཞེད་སྣང་བྱུང་ས་དེ་རྒྱ་ནག་གིས་དཔལ་འབྱོར་གྱི་གནོན་ཤུགས་སྤྲོད་པ་དང་། མི་མང་གིས་ཁྲིམས་མ་ཤེས་པ་རེད་ལ། མི་ཚང་མས་ཚོང་བཤད་ནས་ཆབ་སྲིད་ཀྱི་སྐོར་གླེང་སློང་བྱེད་ཐུབ་ཀྱི་མེད་པ་རེད། ཡིན་ཡང་ཆབ་སྲིད་མ་བཤད་ན་ཚོང་ཡང་ཡོང་གི་མ་རེད་ལ། རྒྱ་ནག་མཉམ་དུ་ཚོང་བརྒྱབ་ནས་སིན་པན་རྒྱལ་ཁབ་ནང་རྒྱ་ནག་གིས་བཟོ་གྲྭ་མང་པོ་བརྒྱབ་ནས་མི་མང་པོ་ལས་མེད་ཆགས་ཀྱི་ཡོད་པ་རེད། ཆབ་སྲིད་པས་ཚོང་དེ་ཚོང་གི་ངོ་བོར་གནས་དགོས་ཞེས་ཆབ་སྲིད་ཀྱི་སྐོར་མ་བཤད་པ་དང་། བོད་དོན་མ་བཤད་ན་རྗེས་སུ་རྒྱ་ནག་སྟོབས་ཆེན་ཆགས་ནས་རྒྱལ་སྤྱིའི་ནང་རྒྱ་ནག་གིས་ག་རེ་བྱས་བྱས་ཆགས་སྲིད་པ་རེད། རྒྱ་ནག་ལ་མགོ་སྒུར་མཁན་རྒྱལ་ཁབ་མང་པོ་ཡོད་པའི་ནང་ནས་གཅིག་སི་པན་རེད། དེར་བརྟེན་ང་ཚོས་བོད་དོན་ཁྲིམས་གཏུག་དེ་ཡང་ད་ལྟ་འགག་བསྡད་ཡོད་པ་རེད། སི་པན་གྱི་རྒྱལ་སྤྱིའི་ཁྲིམས་ཁང་ལ་ཁྲིམས་གཏུག་བྱས་པ་བཞིན། མ་འོངས་པར་རྒྱལ་ཁབ་མང་པོའི་ནང་དེ་ལྟར་ཁྲིམས་གཏུག་བྱེད་ཐུབ་ན་ཕན་ཐོགས་ཡོང་གི་རེད་ལ། བོད་དོན་དེ་རང་ཐག་རང་བཅོད་ཀྱི་ཐོག་ནུས་ཤུགས་འདོན་དགོས་པ་དང་། ད་ལྟ་བོད་མི་ཚོ་རང་བཙན་དང་དབུ་མའི་ལམ་གཉིས་ཀྱི་བར་རྩོད་པ་རྒྱག་པ་དེས་རྩ་དོན་ལ་གནོད་སྲིད་པ་རེད་ཅེས་སོགས་གསུངས་ཡོད་པ་རེད།
དེ་བཞིན་སྐབས་དེར་ཁྲིམས་རྩོད་པ་ཧོ་སེ་དང་། ཆབ་སྲིད་བཙོན་ཟུར་དཔལ་ལྡན་རྒྱ་མཚོ་གཉིས་ཀྱིས་ཁྲིམ་གཏུག་གི་བརྒྱུད་རིམ་དང་གནས་སྟངས་སྐོར་ལ་གནམ་བཤད་གནང་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།