ཁྲིམས་ལུགས་གོ་རྟོགས་ལ་དོ་སྣང་དགོས།

ཁྲིམས་ལུགས་རིག་པ་བ། བློ་བཟང་གྲགས་པ།

བོད་ཀྱི་ཁྲིམས་རྒྱུད་གནའ་བཙན་པོའི་སྐབས་སུ་དབུ་བརྙེས་པ་ནས་ད་བར་ཁྲིམས་ནི་དྲང་བདེན་སྐྱོང་བྱེད་ཀྱི་ཡོ་བྱད་གཙོ་བོ་ཞིག་ཡིན་པར་ངོས་འཛིན་ཐོབ་ཡོད་པ་རེད། རྒྱལ་ཁབ་ཅིག་དང་སྤྱི་ཚོགས་ཤིག་གི་ནང་། ཁྲིམས་ལུགས་ཀྱིས་སྟངས་འཛིན་མེད་སོང་ན། རྒྱལ་ཁབ་ལ་ཡར་རྒྱས་དང་གོང་འཕེལ་མེད་ལ། སྤྱི་ཚོགས་ལ་བདེ་འཇགས་དང་འཆམ་མཐུན་ཞིག་དེ་བས་ཀྱང་མེད་པ་རེད། བོད་ཀྱི་རྩ་དོན་འཐབ་བརྩོད་ཀྱི་རྒྱུད་རིམ་ཁྲོད། ཁྲིམས་ལུགས་ཀྱི་གོ་རྟོགས་ཞན་པའི་རྒྱུ་རྐྱེན་གྱིས་གྱོང་གོད་ཀྱང་མང་པོ་རག་ཡོད་པའི་ལོ་རྒྱུས་མང་པོ་ཡོད་ལ། བྱ་བ་དང་གནད་དོན་མང་པོ་ཞིག་ནས་འཐུས་ཤོར་སོང་ཡོད་པའི་གནས་སྟངས་ཀྱང་ཧ་ཅང་མང་པོ་ཡོད་པ་རེད། དེར་བརྟེན། ང་ཚོས་ངེས་པར་ཏུ་འདས་དུས་ཀྱི་ཉམས་མྱོངས་ནས་ནོར་འཁྲུལ་དང་འཐུས་ཤོར་སོགས་ལ་ཡོ་བསྲང་བྱེད་གང་ཐུབ་བྱེད་དགོས་པ་ནི་གལ་ཆེན་ནང་གི་འགངས་ཆེན་ཞིག་ཏུ་འགྱུར་ཡོད་པ་རེད།

ཁྲིམས་ལུགས་དབང་འཛིན་དང་ཁྲིམས་ཡིག་རྩ་འཛིན་བྱེད་པ་ནི་ཧ་ཅང་གི་གལ་ཆེན་ཡིན་པར། གནའ་བཙན་པོ་སྲུང་བཙན་སྒམ་པོའི་དུས་སུ་ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག། ཁྲིམས་ཡིག་ཆེན་མོ་དྲུག་སོགས་གཞིར་གྱུར་ནས་ཁོད་སོ་དྲུག་གཏན་འབེབས་བྱུང་བ་ནས་བཟུང་། རྒྱལ་པོ་དང་རྒྱལ་རབས་རིམ་བྱུང་གིས་རང་གི་དུས་རབས་དང་དོན་དངོས་ལ་མཐུན་པའི་ཁྲིམས་ལུགས་ལེགས་པར་ཕབ་ཡོད། ཆོས་རྒྱལ་སྲོང་བཙན་སྒམ་པོས་བློན་པོ་མགར་སོགས་ལ་བཀའ་ཕབ་ནས་ཕྱི་ལོ་༦༤༡ ཙམ་ལ་བཟོས་པའི་ཁོད་སོ་དྲུག་དང་། ཕྱི་ལོ་༡༣༥༤ལ་ས་སྐྱ་པས་བོད་ཡོངས་ལ་དབང་བསྒྱུར་བྱེད་པའི་སྲིད་དབང་འཐོར་ནས་སྡེ་སྲིད་ཕག་གྲུ་བས་བོད་ལ་དབང་བསྒྱུར་བྱེད་པའི་སྲིད་དབང་དངོས་སུ་འཚུགས་པ་དང་། ཏཱ་སི་ཏུ་བྱང་ཆུབ་རྒྱལ་མཚན་གྱིས་གཏན་འབེབས་གནང་བའི་བོད་ཀྱི་བཅའ་ཁྲིམས་གཡུ་འབྲུག་སྒྲོག་པའི་ཞལ་ལྕེ་བཅོ་ལྔ་ཞེས་པ་དང་།ཕྱི་ལོ་༡༦༡༨ལ་གཙང་པ་རྒྱལ་པོས་སྲིད་དབང་སྐྱོང་བ་དང་དུས་མཚུངས་སུ་ཁྲིམས་ཡིག་ཞལ་ལྕེ་བཅུ་དྲུག་གཏན་འབེབས་གནང་ཡོད་པ་དང་། ཕྱི་ལོ་༡༦༤༢ ཏཱ་ལའི་བླ་མ་སྐུ་ཕྲེང་ལྔ་པ་བློ་བཟང་རྒྱ་མཚོས་བོད་ཡོངས་ལ་ཆོས་སྲིད་ཀྱི་དབང་མཛད་ནས། དགའ་ལྡན་ཕོ་བྲང་གི་འགོ་བཟུང་བའི་སྐབས་སུ་ཁྲིམས་ཡིག་ཞལ་ལྕེ་བཅུ་གསུམ་གཏན་འབེབས་གནང་ཡོད་པ་དང་། ཕྱི་ལོ་༡༦༨༡ ལ་གནས་དུས་ཀྱི་དགོས་མཁོ་དང་བསྟུན་ནས། སྡེ་སྲིད་སངས་རྒྱས་རྒྱ་མཚོས་བླངས་དོར་གསལ་བར་སྟོན་པའི་དྲང་ཐིག་དྭངས་ཤེལ་མེ་ལོང་ཞེས་པའི་ཁྲིམས་ཡིག་དོན་ཚན་ཉེར་གཅིག་པ་ཅན་ཞིག་མཛད་ཡོད་པ་བཅས་ནི་བོད་ཀྱི་བཙན་པོའི་རྒྱལ་རབས་ནང་བོད་དེ་ཡར་རྒྱས་དང་བདེ་འཇགས་ཡོང་པར་གཏན་འབེབས་གནང་བའི་ཁྲིམས་ཡིག་དང་ཁྲིམས་སྲོལ་རེད། ཇི་སྐད་དུ་༧གོང་ས་མཆོག་གིས་གསུངས་པ་བཞིན། ཁྲིམས་ལུགས་དབང་འཛིན་ནི་མིའི་རིགས་ཀྱི་སྤྱི་ཚོགས་ལ་ཞི་བདེ་དང་བདེ་འཇགས་བསྐྲུན་བྱེད་ཀྱི་མ་ལག་གཙོ་བོ་དེ་ཡིན་པ་དང་། ཁྲིམས་ལུགས་ཀྱི་དབང་དུ་བསྒྱུར་བའི་རྒྱལ་ཁབ་བམ་སྤྱི་ཚོགས་གང་ཞིག་ཡིན་ཡང་བདེ་བ་དང་སྤྲོ་བས་ཁེངས་པས། ང་ཚོས་ཅིས་ཀྱང་ཁྲིམས་ལུགས་ཀྱི་ལྟ་གྲུབ་དང་། ཁྲིམས་ལུགས་ཀྱི་ཡང་དག་ལྟ་གྲུབ་ལས་བྱུང་བའི་ཁྲིམས་ལུགས་ཀྱི་སྒྲིག་སྲོལ་སོགས་ལ་གལ་ཆེན་བརྩི་དགོས་གལ་ཆེ་ལ། ཁྲིམས་ལུགས་ཀྱིས་ཕོང་བའི་བོད་ཀྱི་གཞིས་བྱེས་སྤྱི་ཚོགས་སུ་ཁྲིམས་ལུགས་ཀྱི་གོ་རྟོགས་གོང་སྤེལ་གཏོང་བ་དང་། ཁྲིམས་ལུགས་ལ་ཡིད་ཆེས་དང་ཁྲིམས་ལུགས་ཀྱི་སྒྲིག་སྲོལ་ལག་བསྟར་སོགས་ལ་ཁྲིམས་ལུགས་ཀྱི་འདུ་ཤེས་བསྐྲུན་དགོས་གལ་ཆེ།

བཙན་བྱོལ་བོད་ཀྱི་སྤྱི་ཚོགས་སུ་ཁྲིམས་ལུགས་ཀྱི་གོ་རྟོགས་ཇེ་མཁོ་རུ་འགྲོ་ཡི་ཡོད་པ་དང་། བོད་ཀྱི་རྩ་དོན་འཐབ་རྩོད་ཀྱི་སྲིད་བྱུས་དང་ལམ་ཕྱོགས་དེ་ལའང་ཁྲིམས་ལུགས་ཀྱི་གོ་རྟོགས་ཇེ་མཁོ་རུ་འགྲོ་ཡི་ཡོད་པར། ང་ཚོ་གཞུང་མང་སུ་ཡིན་ནའང་ཁྲིམས་ལུགས་དོ་སྣང་གནང་དགོས་པ་དང་། བོད་ཀྱི་ཁྲིམས་ལུགས་ཆེད་ལས་མི་སྣ་གང་མང་གསོ་སྐྱོང་བྱེད་པ་དང་། བོད་མིའི་ཁྲིམས་ལུགས་ཀྱི་ཆེད་ལས་རུ་ཁག་ལ་རྒྱབ་སྐྱོར་དང་། ཁྲིམས་ལུགས་གོ་རྟོགས་སྤེལ་བའི་ལས་འཆར་སོགས་གང་མང་དགོས་པ་ནི་ཧ་ཅང་གལ་འགངས་ཆེ།