གངས་ལྗོངས་དཔལ་འབྱོར་ཞབས་ཞུ་ཁང་ཕྱི་ལོ་༢༠༢༦ བར་སྒོ་རྒྱག་ཐབས་མེད་འདུག 

གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་རྟོག་ཞིབ་བྱེད་པོའི་ཞིབ་འཇུག་ཚོགས་ཆུང་གི་སྙན་ཐོའི་ནང་དུ། ཞབས་ཞུ་ཁང་དེ་ཉིད་ཕྱི་ལོ་༢༠༢༦ བར་དུ་རང་བཞིན་གྱིས་སྒོ་རྒྱག་ཐབས་མེད་པས། དེའི་བར་འབད་བརྩོན་བྱས་ནས་བསྐྱོད་ན་གྲུབ་འབྲས་ག་འདྲ་ཡོད་མེད་ད་ལྟ་ལས་གསལ་དུ་འགྲོ་ངེས་པས། དེའི་བར་འཛིན་སྐྱོང་གི་ངོས་ནས་དཀའ་ངལ་གང་ཡོད་ལ་གདོང་ལེན་གྱིས་ཡར་རྒྱས་གཏོང་ཆེད་འབད་བརྩོན་གནང་དགོས་པ་ཧ་ཅང་གལ་ཆེན་པོར་གྱུར་ཡོད་པ་དང་། གལ་ཏེ་ད་མུས་བཞིན་བསྐྱོད་པར་འཛིན་སྐྱོང་བྱེད་སྟངས་ཀྱི་ཐོག་ནས་དཀའ་ངལ་ཡོད་ན། གཞུང་སྒེར་མཉམ་འབྲེལ་(PPP-Public Private Partnership)གྱི་རང་སྐྱོང་ཚོང་ལས་སྡེ་ཚན་ཞིག་ཏུ་བསྒྱུར་ཐུབ་ན་དགེ་མཚན་ཆེ་སྐོར་གསུངས་འདུག 

དེ་ཡང་ཞིབ་འཇུག་ཚོགས་ཆུང་གི་སྙན་ཐོའི་ནང་མཐའ་བསྡོམས་རྒྱབ་གཉེར་དུ། 

༡) གངས་ལྗོངས་དཔལ་འབྱོར་ཞབས་ཞུ་ཁང་གི་དམིགས་ཡུལ་དང་འཆར་གཞི་གཞིར་བཟུང་དུས་ཐུང་ནང་ཁྲིམས་ཐོག་ནས་ཆོག་མཆན་རག་ཐུབ་པ་དང༌། དཔལ་འབྱོར་གྱི་ཐོག་ནས་བོད་མིའི་སྒྲིག་འཛུགས་ཀྱི་གནས་སྟངས་ལ་དཔག་པའི་མ་རྩ་བསྡུ་རུབ་གང་འཚམ་བྱུང་འདུག ད་དུང་ཡར་རྒྱས་གཏོང་དགོས་པ་དང༌། མ་འདང་པའི་ཆ་མང་པོ་ཡོད་ནའང༌། ཁྲིམས་མཐུན་གྱི་ཐོག་ནས་བུན་གཏོང་ལས་གཞི་དངོས་སུ་སྤེལ་ཐུབ་པ་ཞིག་ཏུ་གྱུར་ཡོད་པ་ནི་བསྔགས་འོས་སུ་མཐོང་།

༢) གངས་ལྗོངས་དཔལ་འབྱོར་ཞབས་ཞུ་ཁང་ལ་བུན་གཏོང་ཆོག་པའི་ཆོག་མཆན་(NBFC)ལག་ཁྱེར་རག་ནས་ལོ་གཅིག་ཙམ་ལས་ཡར་རྒྱས་དང་རྒྱ་བསྐྱེད་གཏོང་རྒྱུའི་གོ་སྐབས་བྱུང་མེད་པ་དང༌། ཕྱི་ལོ་༢༠༢༦ བར་དུ་རང་བཞིན་གྱིས་སྒོ་རྒྱག་ཐབས་མེད་པས། དེའི་བར་འབད་བརྩོན་བྱས་ནས་བསྐྱོད་ན་གྲུབ་འབྲས་ག་འདྲ་ཡོད་མེད་ད་ལྟ་ལས་གསལ་དུ་འགྲོ་ངེས་པས། དེའི་བར་འཛིན་སྐྱོང་གི་ངོས་ནས་དཀའ་ངལ་གང་ཡོད་ལ་གདོང་ལེན་གྱིས་ཡར་རྒྱས་གཏོང་ཆེད་འབད་བརྩོན་གནང་དགོས་པ་ཧ་ཅང་གལ་ཆེན་པོར་གྱུར་འདུག

༣) གངས་ལྗོངས་དཔལ་འབྱོར་ཞབས་ཞུ་ཁང་ད་མུས་བཞིན་བསྐྱོད་པར་འཛིན་སྐྱོང་བྱེད་སྟངས་ཀྱི་ཐོག་ནས་དཀའ་ངལ་ཡོད་ན། གཞུང་སྒེར་མཉམ་འབྲེལ་(PPP-Public Private Partnership)གྱི་རང་སྐྱོང་ཚོང་ལས་སྡེ་ཚན་ཞིག་ཏུ་བསྒྱུར་ཏེ་འགན་འཛིན་ལྷན་ཚོགས་ནང་དཔལ་འབྱོར་བཀའ་བློན་དང༌། དྲུང་ཆེ་སོགས་བོད་མིའི་སྒྲིག་འཛུགས་ཀྱི་གནད་ཡོད་ལས་སྣེ་ཡོད་པའི་ཐོག། རྩ་བས་ལས་དོན་འགན་ཁུར་དང་རྩིས་རྒྱག་བོད་མིའི་སྒྲིག་འཛུགས་ལ་ཞུ་དགོས་ཀྱང༌། ལས་བྱེད་བསྐོ་གཞག་དང་། ལས་བྱེད་པའི་མཐུན་རྐྱེན། ཉིན་རེ་བཞིན་ལས་ཀ་བྱེད་པའི་དུས་ཡུན། ཕོགས་དང་ཐོབ་ཐང་སོགས་མཐུན་རྐྱེན་རྣམས་བོད་མིའི་སྒྲིག་འཛུགས་ཀྱི་ད་ཡོད་འགྲོ་ལུགས་ཁག་དང་ཡོངས་སུ་བསྟུན་མི་དགོས་པར་རང་སྐྱོང་ལྡན་པའི་ཁེ་གཉེར་ཁང་ཞིག་ཏུ་བསྒྱུར་ཐུབ་ན་དགེ་མཚན་ཆེ། 

༤) ཕྱི་ལོ་༢༠༢༦ ལོའི་རྗེས་སུ་གངས་ལྗོངས་དཔལ་འབྱོར་ཞབས་ཞུ་ཁང་མུ་མཐུད་གནས་རྒྱུའི་གོ་སྐབས་བྱུང་ན། མ་ཤས་ཀྱི་བརྒྱ་ཆ་༥༡ ལས་མི་ཉུང་བ་ཞིག་བོད་མིའི་སྒྲིག་འཛུགས་ཀྱི་ངོས་ནས་འཛུགས་ཐབས་གནང་དགོས་པ་ནི། ཡུལ་ཁྲིམས་ཐོག་ནས་བོད་མིའི་སྒྲིག་འཛུགས་ཀྱི་སྟངས་འཛིན་འོག་གནས་ཐུབ་པར་གལ་ཆེན་པོར་གྱུར་ཡོད་འདུག

༥) གངས་ལྗོངས་དཔར་འབྱོར་ཞབས་ཞུ་ཁང་ལ་ཨ་རིའི་གཞུང་ནས་གནང་བའི་ཧིན་སྒོར་བྱེ་བ་༣༣ ལ་ཉེ་བ་དཔལ་འབྱོར་སྤྱི་ཚོགས་ཡར་རྒྱས་ཐེབས་རྩའི་ནང་ཡོད་པ་དེ། གདན་ཞུས་ཆེད་ལས་མཁས་པའི་ལམ་སྟོན་གནང་བ་བཞིན་རྒྱ་གར་དབུས་གཞུང་འབྲེལ་ཡོད་ལས་ཁུངས་ལ་དངོས་སུ་ཆོག་མཆན་ཞུས་ནས་གངས་ལྗོངས་དཔལ་འབྱོར་ཞབས་ཞུ་ཁང་དུ་གཏོང་རྒྱུར་ཐབས་ཤེས་གང་ཡོད་ཀྱིས་འབད་བརྩོན་ངེས་པར་དུ་གནང་དགོས།

༦)ད་བར་བོད་མིའི་སྒྲིག་འཛུགས་སྤྱི་ཡོངས་ནས་དཔལ་འབྱོར་གྱི་གནས་བབ་རོགས་ཚོགས་ཁོ་ནར་བརྟེན་ཡོད་པ་དང་། མ་འོངས་པར་རོགས་རམ་མུ་མཐུད་རག་ཐུབ་མིན་གྱི་གནས་སྟངས་ཡོང་བའི་དབང་དུ་བཏང་ན་དཀའ་ངལ་ཆེན་པོ་འཕྲད་གཞི་ཙམ་མ་ཡིན་པར། སྒྲིག་འཛུགས་མུ་མཐུད་ཐུབ་དཀའ་བའི་གནས་སྟངས་ཤིག་ཏུ་འགྱུར་མི་སྲིད་པ་གཏན་ནས་རེད་མི་འདུག། དངུལ་ཁང་ལྟ་བུའི་ཁེ་ལས་རིགས་བཙན་བྱོལ་བོད་མིའི་སྤྱི་ཚོགས་སུ་ཡོད་དགོས་པ་མ་ཟད། བོད་མི་ན་གཞོན་གང་མང་ཞིག་ཚོང་ལས་ལ་དོ་སྣང་སླེབས་བཞིན་པའི་སྐབས་དེར། སྤྱི་ཚོགས་ནང་ལས་གཞི་འདི་ལྟ་བུ་ཞིག་བསྐྲུན་རྒྱུ་དེ་ད་ལྟའི་དུས་སུ་གནས་བབ་དང་ནུས་པ་གང་ཐད་ནས་སྐབས་སུ་བབ་ཡོད་པ་དེ་དམ་འཛིན་གནང་དགོས་པར་མཐོང་།

༧) གངས་ལྗོངས་དཔལ་འབྱོར་ཞབས་ཞུ་ཁང་གི་ཆེད་དུ་ཨ་རིའི་གཞུང་ལ་རོགས་དངུལ་ཞུས་ནས་མ་རྩ་མང་དུ་གཏོང་ཐབས་བྱ་རྒྱུ་དང་། རྒྱ་གར་གཞུང་ནས་རོགས་རམ་གནང་ཐབས་ཡོད་མེད་དང་། དུས་ཡུན་རྒྱས་བཅད་ནང་སྐྱེད་མེད་བུན་གཡར་ཡོང་བའི་སྐྱབས་འཇུག་ཁྲིམས་ལུགས་གཞིར་བཟུང་ཞུས་ནས་གྲུབ་འབྲས་ཡོང་བའི་རེ་བ་ཆེན་པོ་ཡོད་པ་བཅས་ཞེས་འཁོད་འདུག 

དེ་ཡང་བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་གསུམ་པའི་གྲོས་ཆོད་ཨང་ ༢༠༢༢།༡༧།༣།༢༦ དང་། ཡིག་ཆ་ཨང་ ༢༦ པའི་དགོངས་དོན། གངས་ལྗོངས་དཔལ་འབྱོར་ཞབས་ཞུ་ཁང་ནི་བཙན་བྱོལ་བོད་མིའི་དཔལ་འབྱོར་གྱི་གནས་བབ་བཟང་དུ་བཏང་ནས་གཞན་རྟེན་གྱི་བསམ་བློ་དོར་ཏེ་རང་ཁ་རང་གསོ་ཐུབ་སླད་དངུལ་ཁང་ལྟ་བུའི་ཁེ་ཡོད་དཔལ་འབྱོར་སྡེ་ཚན་ནམ་སྒྲིག་འཛུགས་ཤིག་དཔལ་འབྱོར་ལས་ཁུངས་ཀྱིས་འགན་བཞེས་ཆེད་འཛུགས་གནང་ཡོད་ཀྱང་། ད་ཆ་དེའི་ཁེ་ཉེན་གྱི་གནས་སྟངས་ཇི་ཆགས་རྟོག་ཞིབ་བྱེད་པོའི་ཞིབ་འཇུག་ཚོགས་ཆུང་ཞིག་དཔལ་ལྡན་ཚོགས་གཙོ་སྦྲེལ་པོ་མཆོག་གིས་བསྐོ་འཛུགས་གནང་བའི་མི་འགྲོར། སྤྱི་འཐུས་ཟླ་བ་ཕུན་སྐྱིད་དང་གསེར་རྟ་ཚུལ་ཁྲིམས། དཀོན་མཆོག་ཡར་འཕེལ་དང་ཀརྨ་དགེ་ལེགས།  དེ་བཞིན་དཔལ་འབྱོར་རིག་པའི་མཁས་དབང་སྐུ་ཞབས་རཱ་ཧུལ་ཇོ་ཤི་ (Rahul Joshi, Financial Expert)་བཅས་བསྐོ་གཞག་གནང་ཡོད་པ་དང་། ཁོང་རྣམ་པས་ཟླ་༦ པའི་ཚེས་༢ ཉིན་ནས་ལས་དོན་དངོས་སུ་འགོ་བཙུགས་ཀྱིས། ཟླ་༩ པའི་ཚེས་༥ ཉིན་ཞིབ་འཇུག་གི་སྙན་ཐོ་ཚོགས་དྲུང་ལས་ཁུངས་སུ་ཕུལ་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།