གཏེར་ཁ་སྔོག་འདོན་ལ་ངོ་རྒོལ་འདི་བོད་མི་ཚོས་ས་ཆ་སྲུང་སྐྱོབ་བྱེད་བཞིན་པའི་དཔེ་མཚོན་དུ་གྱུར་ཡོད།

ཟླ་འདིའི་ཚེས་༨ དགོང་མོ་དྷ་ས་མེག་གྷན་དུ་བོད་མདོ་སྨད་ཨ་མཆོག་ཏུ་གཏེར་ཁ་སྔོག་འདོན་ལ་བོད་མིས་ཞི་རྒོལ་བྱས་པར་རྒྱ་ནག་གཞུང་གིས་དེ་ལ་དྲག་གནོན་བྱས་པར་བརྟེན། སྐྱིད་སྡུག་མཉམ་མྱོང་མཚོན་ཆེད་དུ་མི་མང་གིས་ངོ་རྒོལ་ཁྲོམ་སྐོར་གྱི་ལས་འགུལ་ཞིག་སྤེལ་ཡོད་པ་རེད།

ཉིན་དེའི་མི་མང་གི་ངོ་རྒོལ་ཁྲོམ་སྐོར་གྱི་ལས་འགུལ་དེ་བོད་ཀྱི་བུད་མེད་ལྷན་ཚོགས་དང་། བོད་ཀྱི་དགུ་བཅུ་གསུམ་ཚོགས་པ། བོད་རང་བཙན་སློབ་ཕྲུག་ཚོགས་པ། དྷ་ས་ས་གནས་གཞོན་ལྷན་བཅས་ཀྱིས་གོ་སྒྲིག་བྱས་ཡོད་པ་རེད།

གོ་སྒྲིག་པས་ཉིན་དེར་གསར་འགོད་གསལ་བསྒྲགས་ཤིག་སྤེལ་བའི་ནང་། “འདས་པའི་བདུན་ཕྲག་གཅིག་གི་གོང་ནས་བོད་མདོ་སྨད་བསང་ཆུ་རྫོང་། ཨ་མཆོག་ས་གནས་ཀྱི་མི་མང་ཚོས་རྒྱ་ནག་གཞུང་འབྲེལ་གཏེར་འདོན་ཚན་པ་ཞིག་གིས་ས་གནས་ཡུལ་མིས་མཆོད་བཀུར་བྱེད་སའི་གོ་སྔོན་བླ་རིར་གཏེར་ཁ་སྔོག་བཞིན་པར་མཚམས་འཇོག་དགོས་པའི་ཞི་རྒོལ་ལ་རྒྱབ་སྐྱོར་དུ་བཞུགས་སྒར་དྷ་སར་ངོ་རྒོལ་ཁྲོམ་སྐོར་གྱི་ལས་འགུལ་འདི་སྤེལ་གྱི་ཡོད། འདས་པའི་ཉིན་འགའི་ནང་ཨ་མཆོག་ཡུལ་གྱི་ཞི་རྒོལ་ལ་མི་མང་སྟོང་ཕྲག་གཉིས་གཉིས་ལྷག་འདུ་འཛོམས་བྱུང་ཡོད་འདུག་”ཅེས་དང་། “རྒྱ་ནག་གཞུང་གིས་ཞི་རྒོལ་བར་བསམ་ཤེས་བྱ་རྒྱུ་ལས་ལྡོག་སྟེ། དྲག་ཆས་ཉེན་རྟོག་པ་འབོར་ཆེན་བཏང་ནས་ཞི་རྒོལ་བ་ཚོར་དྲག་གནོན་རྡུང་རྡེག་གིས་མི་མང་པོར་རྨས་སྐྱོན་ཚབས་ཆེན་བཟོས་པ་མ་ཟད། སྨན་ཁང་དུ་ཉེན་སྐྱོབ་བྱེད་དགོས་པའི་གནས་སྟངས་འོག་ཚུད་འདུག་”ཅེས་འཁོད་འདུག

དྷ་ས་ས་གནས་བོད་ཀྱི་གཞོན་ལྷན་ཚོགས་གཙོ་དབང་ལྡན་སྐྱབས་ཀྱིས། “བོད་ཀྱི་རང་བྱུང་ཁོར་ཡུག་དང་། ལྷག་པར་བོད་མི་ཚོས་དད་མོས་མཆོད་བཀུར་བྱེད་ཡུལ་གྱི་བླ་རི་ལ་གཏོར་བཤིག་དང་གཏེར་འདོན་བྱེད་བཞིན་པ་ནི་བོད་མིའི་སྙིང་ལ་གྲི་བཙུགས་པ་དང་གཅིག་མཚུངས་ཡིན་པས། རྒྱ་ནག་གཞུང་གིས་ཨ་མཆོག་གོང་སྔོན་བླ་རིར་གཏེར་ཁ་སྔོག་བཞིན་པར་མཐའ་གཅིག་ཏུ་ངོ་རྒོལ་ཡོད་ལ། ང་ཚོས་སྤུན་ཟླ་ཨ་མཆོག་མི་མང་གི་ཞི་རྒོལ་ལ་རྒྱབ་སྐྱོར་དང་། རྒྱ་ནག་གིས་འཕྲལ་དུ་གཏེར་འདོན་ལས་གཞི་མཚམས་འཇོག་དགོས་པའི་བསྒྲགས་གཏམ་སྤེལ་གྱི་ཡོད་”ཅེས་བརྗོད་སོང་།

རྒྱ་གར་བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་ཇོ་སི་ནཱས། འདས་པའི་བཅུ་ཕྲག་གཉིས་རིང་རྒྱ་ནག་གཞུང་འབྲེལ་གཏེར་འདོན་ཚན་པ་ཁག་གིས་བོད་ནང་དུ་གསེར་དང་དངུལ། ཟངས་སོགས་སྔོག་འདོན་བྱེད་པའི་ལས་གཞི་རྒྱ་ཆེ་རུ་ཕྱིན་ཡོད་ལ། བོད་མི་ཚོས་ཡང་ནས་བསྐྱར་དུ་གཏེར་འདོན་ལས་གཞི་སྤེལ་བ་ཁག་སོ་སོར་ངོ་རྒོལ་རིམ་པར་བྱས་དང་བྱེད་མུས་ལ་དྲག་གནོན་གྱི་དཀའ་ངལ་ཆེན་པོ་འཕྲད་བཞིན་པ་མ་ཟད། རྒྱ་ནག་གཞུང་གིས་གཏེར་འདོན་ཞི་རྒོལ་བ་ཚོར་ཚད་ལས་བརྒལ་བའི་དམ་དྲག་དང་གཅར་རྡུང། བཙོན་འཇུག་སོགས་བྱེད་བཞིན་ཡོད། ཨ་མཆོག་མི་མང་གིས་མུ་མཐུད་རྒྱ་ནག་གི་གཏེར་ཁ་སྔོག་འདོན་ལ་ངོ་རྒོལ་བྱེད་བཞིན་པ་འདི་ནི་བོད་མི་ཚོས་ཆོད་སེམས་བརྟན་པོས་སོ་སོའི་ས་ཆ་སྲུང་སྐྱོབ་བྱེད་བཞིན་པའི་དཔེ་མཚོན་གསལ་པོ་ཞིག་ཏུ་གྱུར་ཡོད་”ཅེས་གསུངས་སོང་།།
གསར་འགོད་པ་ཆོས་ཉིད་འོད་ཟེར།