གནམ་གྲུའི་བཟོ་བསྐྲུན་རིག་གནས་སློབ་གཉེར་བ་ཞིག་ལ་གཟེངས་བསྟོད།

ཟླ་འདིའི་ཚེས་༧ ཉིན་གྱི་སྔ་དྲོ་དྷ་ས་གངས་སྐྱིད་བཀའ་ཤག་ལས་ཁུངས་སུ། རྒྱ་གར་མཐོ་སློབ་ཏུ་བསྐྱོད་བཞིན་པའི་སློབ་མ་འཇིགས་མེད་ཚེ་རིང་ལ་ཤེས་རིག་ལས་ཁུངས་ཀྱི་ལེགས་གསོལ་བྱ་དགའ་ཧིན་སྒོར་འབུམ་གཅིག་ཐོབ་པའི་གསར་འགོད་ལྷན་ཚོགས་ཤིག་བསྐོངས་སོང་།

སྲིད་སྐྱོང་བློ་བཟང་སེང་གེས་སློབ་མ་འཇིགས་མེད་ཚེ་རིང་གིས་རང་ཉིད་ཀྱི་ནང་མིའི་གནས་སྟངས་སྐྱོ་བོ་ཡིན་ཡང། སེམས་ཤུགས་མ་ཆགས་པར་སློབ་ལ་བརྩོན་ཏེ་གྲུབ་འབྲས་ཤིན་ཏུ་ལེགས་པོ་བྱུང་བར་དགའ་བསུ་དང་བསྔགས་བརྗོད་གནང་སོང། དེ་བཞིན་ཤེས་རིག་བཀའ་བློན་དངོས་གྲུབ་ཚེ་རིང་གིས་ཁོང་ལ་དགའ་བསུ་དང་བསྔགས་བརྗོད་ཡང་གནང་སོང།

སློབ་མ་འཇིག་མེད་ཚེ་རིང་ནི་ཕ་ཚེ་རིང་རྡོ་རྗེ་དང་མ་ཟླ་བ་སྒྲོལ་མའི་ཕྲུ་གུ་གསུམ་པ་དེ་ཡིན་པ་དང། འཛིན་རིམ་བཅུ་པ་བར་རྡོ་རྗེ་གླིང་གཏན་སློབ་དང་འཛིན་རིམ་བཅུ་གཉིས་བར་ཚན་རིག་སྡེ་ཚན་མ་སུ་རི་གཏན་སློབ་ནས་ཐོན་ཡོད་པ་རེད། ད་ལྟའི་ཆར་རྒྱ་གར་ལྷོ་ཕྱོགས་ཆེ་ནའི་ཧིན་རྡུ་སི་ཊན་གཙུག་ལག་ཁང་དུ། གནམ་གྲུའི་བཟོ་བསྐྲུན་རིག་གནས་(b.Tech Aerospace Engineering) ཀྱི་ཉེ་བའི་གཙུག་ལག་རབ་འབྱམས་པར་སློབ་གཉེར་བྱེད་བཞིན་ཡོད་པ་དང། ཁོང་གིས་ལོ་རིམ་དང་པོའི་ཡིག་རྒྱུགས་ལ་བརྒྱ་ཆ་༩༧.༩ བླངས་ཏེ་ཤེས་རིག་ལས་ཁུངས་ཀྱིས་ལེགས་གསོལ་བྱ་དགའ་ཧིན་སྒོར་འབུམ་གཅིག་ཐོབ་མཁན་ཐེངས་དང་པོ་ཆགས་འདུག ཁོང་གི་ཕ་མ་གཉིས་ཀ་སློབ་སྦྱོང་མེད་ཁར་ནང་མིའི་གནས་སྟངས་ཡང་སྐྱོ་པོ་ཡོད་པས། ཤེས་རིག་ལས་ཁུངས་ཀྱི་སློབ་ཡོན་གྱི་ཐོག་ལ། གཞན་ལས་དངུལ་ཕོན་ཆེན་པོ་གཡར་ཏེ་སློབ་ཡོན་སྤྲད་དགོས་པ་བྱུང་འདུག

ཁོང་གིས་རང་ཉིད་སློབ་ཚན་དེ་ལ་དབྱིངས་ཡོད་པས། དཔལ་འབྱོར་གྱི་དཀའ་ངལ་ལས་གཞན་སློབ་ཚན་ལ་དཀའ་ངལ་འཕྲད་ཀྱི་མེད་པ་དང། རང་ཉིད་མ་འོངས་པར་ཉམས་ཞིབ་པ་བྱས་ཏེ། མེ་ཤུགས་ཕུར་མདའི་ཚན་རིག་པ་ཞིག་ཆགས་འདོད་ཡོད་སྐོར་དང། གསར་འགོད་པའི་དྲི་བའི་ལན་དུ། རང་ཉིད་ཀྱིས་སློབ་སྦྱོང་ཧུར་ཐག་བྱས་ནས་གྲུབ་འབྲས་ཐོན་ན། བོད་མི་རིགས་ཀྱི་མིང་ཡར་འདེགས་ཐུབ་པ་དང་བོད་ཀྱི་སློབ་ཕྲུག་ཚོར་སེམས་ཤུགས་འཕར་ཐུབ་ཀྱི་རེད་ཅེས་བརྗོད་སོང་།
གསར་འགོད་པ་སྐལ་བཟང་དོན་གྲུབ།