གནམ་སྡེ་སྒོ་མོའི་ལས་འགུལ་གྱི་བཙོན་པ་མཐའ་མ་དེ་གློད་གྲོལ་བྱེད་རྒྱུ།

ཕྱི་ལོ་༡༩༨༩ ལོའི་རྒྱ་ནག་པེ་ཅིན་གནམ་སྡེ་སྒོ་མོར་མང་གཙོའི་ལས་འགུལ་ཆེན་མོའི་སྐབས་སུ། འཇུ་བཟུང་བྱས་པའི་ཆབ་སྲིད་བཙོན་པ་མེའུ་ཌེ་ཤུན་ཕྱི་ལོ་༢༠༡༦ ལོའི་ཟླ་༡༠ པའི་ཚེས་༡༦ ཉིན་གློད་གྲོལ་གཏོང་འཆར་ཡོད་འདུག་པ་དང། ཁོང་ནི་གནམ་སྡེའི་སྒོ་མོའི་ལས་འགུལ་གྱི་བཙོན་པ་མཐའ་མ་དེ་ཆགས་ཀྱི་ཡོད་པ་རེད།

ཕྱི་ལོ་༡༩༨༩ ལོའི་ཟླ་༦ པའི་ཚེས་༤ ཉིན་མང་གཙོའི་ལས་འགུལ་ཆེན་མོ་དེ་རྒྱ་གཞུང་གི་དྲག་ཆས་དམག་མིས་དྲག་གནོན་བྱས་ཏེ། སློབ་ཕྲུག་བརྒྱ་ཕྲག་མང་པོ་དམར་གསོད་བཏང་ཡོད་པར་ངོས་འཛིན་བྱེད་ཀྱི་ཡོད་པ་དང། སྐབས་དེར་མི་གྲངས་༡༦༠༠ ལྷག་འཇུ་བཟུང་བྱས་ཡོད་པས། དེའི་ཁུངས་སུ་ཡོད་པའི་མེའུ་ཌེ་ཤུན་ནི་རང་ལོ་༢༥ ཡིན་འདུག ལོ་དིའི་ཟླ་༨ པའི་ནང་ཁོང་དང་རོགས་པ་བཞིས་མེ་འབར་བཞིན་པའི་འཐབ་འཁོར་ཞིག་སྟེང་དུ་སླེ་པོ་གཡུགས་ནས་མེ་བཏང་བའི་ཉེས་མིང་འོག ཁོང་ལ་ཐོག་མར་སྲོག་ཐོག་གི་ཉེས་པ་ཕོགས་ཡོད་ཀྱང། ཕྱིས་སུ་ཕྱི་ལོ་༡༩༩༡ ལོར་ཚེ་བཙོན་ལ་ཉེས་ཡང་གི་ཁྲིམས་བཅད་བྱས་ཡོད་འདུག

ཁོང་གི་ཁྲིམས་ཆད་དེ་ཐེངས་གསུམ་ལ་ཡང་དུ་བཏང་ཡོད་འདུག་པས། ལོ་འདིའི་ཟླ་༣ པའི་ནང་ཁྲིམས་ཆད་ཡང་དུ་བཏང་ནས་ཟླ་༡༠ པའི་ཚེས་༡༦ ཉིན་གློད་གྲོལ་བཏང་རྒྱུ་ཡིན་འདུག་པ་དང། ད་ལྟའི་ཆར་ཁོང་ལོ་༥༡ ལ་སླེབས་ཀྱི་ཡོད་འདུག་པས། བཙོན་ལ་ལོ་ངོ་༢༧ ཙམ་བསྡད་འདུག

བཙོན་རོགས་རྙིང་པ་ཁ་ཤས་ཀྱིས་བརྒྱུད་ལམ་ཁག་ཏུ། ཁོང་གི་འཕྲོད་བསྟེན་ཡག་པོ་མེད་ཁར། སེམས་མི་བདེ་བའི་དཀའ་ངལ་ཡོད་པས། གློད་གྲོལ་བྱུང་རྗེས་དེང་དུས་ཀྱི་རྒྱ་ནག་གི་འཚོ་བར་གོམས་རྒྱུར་དཀའ་ལས་འཕྲད་ངེས་ཡིན་སྐོར་འགྲེལ་བརྗོད་བྱས་འདུག

གནམ་སྡེ་སྒོ་མོའི་ངོ་རྒོལ་སྐབས་དམར་གསོད་བཏང་བའི་སློབ་ཕྲུག་ཚོའི་ནང་མི་ལ། རྒྱ་གཞུང་ནས་ད་བར་གུན་གསབ་དང་དྲང་བདེན་ཐོབ་མེད་པ་རེད། ལོ་ལྟར་གནམ་སྡེ་སྒོ་མོའི་དུས་དྲན་སྐབས་སུ། དམ་དྲག་ཤུགས་ཆེན་བྱེད་ཀྱི་ཡོད་པ་དང། རྒྱ་ནག་གི་དྲ་རྒྱའི་ཐོག་ལས་འགུལ་དེའི་སྐོར་བཙལ་ན་གང་ཡང་ཐོན་རྒྱུ་མེད་པ་བཟོས་ཡོད་པ་རེད། དེའི་སྐབས་ཀྱི་ལས་འགུལ་བའི་སློབ་ཕྲུག་མང་པོ་ཞིག དེང་གི་ཆར་ཕྱི་རྒྱལ་ཡུལ་གྲུ་ཁག་ཏུ་ཡོད་པ་དང། རྒྱ་ནག་དམར་ཤོག་ཚོགས་པའི་སྲིད་བྱུས་ལ་སྐྱོན་བརྗོད་བྱེད་མཁན་དང་མང་གཙོ་དོན་གཉེར་བར་གྱུར་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།