གཞུང་འབྲེལ་གྱིས་གསུམ་བཅུའི་དུས་དྲན་སྔར་ལྟར་སྲུང་བརྩི་ཞུ་རྒྱུ་རེད་འདུག

བཞུགས་སྒར་རྡ་སར་གསུམ་བཅུའི་དུས་དྲན་སྔར་ལྟར་སྲུང་བརྩི་ཞུ་རྒྱུ་ཡིན་པ་དང་། བཙན་བྱོལ་བོད་མིའི་གནས་སྡོད་ས་གནས་ཁག་ཏུའང་དུས་དྲན་སྲུང་བརྩི་ཞུ་ཐུབ་པ་ཡིན་ན་ཡག་པོ་ཡོད་ཀྱང་། སྐབས་དེར་ཚང་མས་ས་གནས་ཀྱི་གནས་བབ་དང་ལམ་སྟོན་གཞིར་བཟུང་སྲུང་བརྩི་དང་། མཉམ་ཞུགས་གནང་མཁན་ཡོངས་ནས་ནད་ཡམས་དེར་སྔོན་འགོག་བྱ་རྒྱུ་གལ་ཆེན་པོ་བརྩིས་པའི་ཐོག་ནས་ཡིད་གཟབ་གནང་རོགས་ཞེས་བོད་མིའི་སྒྲིག་འཛུགས་ཀྱི་མགྲིན་ཚབ་པས་གསུངས་སོང་།

ཟླ་༣ པའི་ཚེས་༥ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་མིའི་སྒྲིག་འཛུགས་ཀྱི་མགྲིན་ཚབ་པ་དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་དང་། ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་མཉམ་ཞུགས་ཀྱིས་གསར་འགོད་གསལ་བསྒྲགས་ཤིག་སྤེལ་ཡོད་དོན། ཉེ་ལམ་རྒྱ་ནག་ཝུ་ཧན་གྲོང་ཁྱེར་ནས་ཐོག་མར་འགོ་བཙུགས་ཏེ་འཛམ་གླིང་ས་ཕྱོགས་གང་སར་ཏོག་དབྱིབས་ནད་དུག་ཁྱབ་གདལ་བྱུང་སྟེ་མི་གྲངས་མང་པོའི་ཚེ་སྲོག་ཤོར་ཡོད་པ་མ་ཟད། མི་གྲངས་མང་པོ་ཞིག་ལ་ད་དུང་ཡིན་ནའང་མུ་མཐུད་དཀའ་ངལ་འཕྲད་བཞིན་ཡོད་པར་བརྟེན་བོད་མིའི་སྒྲིག་འཛུགས་ནས་ཐུགས་འཚབ་ཧ་ཅང་ཆེན་པོ་བྱེད་བཞིན་ཡོད། ལྷག་པར་ཏོག་དབྱིབས་རིམས་ནད་ཕོག་པ་རྣམས་གང་མྱུར་དྲག་སྐྱེད་ཡོང་བ་དང་། རིམས་ནད་ཞི་བར་འགྱུར་བའི་རེ་བ་དང་སྨོན་ལམ་ཞུ་བཞིན་ཡོད།

བོད་མིའི་རང་དབང་སྒེར་ལངས་བྱས་ནས་མི་ལོ་༦༡ འཁོར་བའི་གསུམ་བཅུའི་དུས་དྲན་བསླེབ་ལ་ཉེ་བ་དང་། བཙན་བྱོལ་ནང་གནས་སྡོད་བོད་མི་ཡོངས་ནས་གསུམ་བཅུ་དུས་དྲན་སྲུང་བརྩི་ཞུ་བཞིན་ཡོད། བོད་ཀྱི་རྒྱལ་རབས་ལོ་རྒྱུས་ནང་གསུམ་བཅུ་དུས་དྲན་ནི་དུས་ཚིགས་ཧ་ཅང་གལ་ཆེན་པོ་ཞིག་ཆགས་ཡོད་སྟབས། འདི་གར་བཞུགས་སྒར་རྡ་སར་མཚོན་ན་དུས་དྲན་སྔར་ལྟར་སྲུང་བརྩི་ཞུ་རྒྱུ་ཡིན། བཙན་བྱོལ་བོད་མིའི་གནས་སྡོད་ས་གནས་ཁག་ཏུའང་དུས་དྲན་སྲུང་བརྩི་ཞུ་ཐུབ་པ་ཡིན་ན་ཡག་པོ་ཡོད། འོན་ཀྱང་སྐབས་དེར་ཚང་མས་ཡིད་གཟབ་གནང་དགོས་པ་ཞིག་ནི། ས་གནས་ཀྱི་གནས་བབ་དང་ལམ་སྟོན་གཞིར་བཟུང་སྲུང་བརྩི་ཞུ་དགོས། འདི་གར་ཧི་མ་ཅཱལ་མངའ་སྡེ་མཚོན་ན་མངའ་སྡེ་གཞུང་གིས་ལམ་སྟོན་ཡོད་པ་ལྟར་རྒྱལ་ཁབ་སོ་སོ་དང་མངའ་སྡེ་སོ་སོའི་གཞུང་ནས་ལམ་སྟོན་ཡོད་པ་དེ་དག་གཞིར་བཟུང་དང་། ཁྲིམས་དང་མཐུན་པའི་ཐོག་ནས་དུས་དྲན་སྲུང་བརྩི་ཞུ་དགོས། གཞན་ཡང་དུས་དྲན་ནང་མཉམ་ཞུགས་གནང་མཁན་ཡོངས་ནས་ནད་ཡམས་དེར་སྔོན་འགོག་བྱ་རྒྱུ་གལ་ཆེན་པོ་བརྩིས་པའི་ཐོག་ནས་ཡིད་གཟབ་གནང་རོགས། 

ཕྱོགས་མཚུངས་ཕྱི་ལོ་ ༢༠༢༠ ཟླ་ ༤ ཚེས་ ༢ ནས་ ༤ བར་ཉིན་གྲངས་གསུམ་གྱི་རིང་རྡ་སར་རྒྱལ་སྤྱིའི་བོད་རིགས་སྤྱི་མཐུན་ཚོགས་པ་དང་ཚོགས་སྡེ་ཁག་གི་སྐུ་ཚབ་རྣམ་པའི་ཚོགས་འདུ་ཆེས་ཐོག་མ་འཚོགས་གཏན་འཁེལ་ཡོད་ནའང་། ཏོག་དབྱིབས་ནད་དུག་ཁྱབ་བརྡལ་དུ་འགྲོ་བཞིན་པའི་རྐྱེན་གྱིས་མི་མང་གི་འཕྲོད་བསྟེན་གལ་ཆེར་བརྩིས་ཏེ་བོད་མིའི་སྒྲིག་འཛུགས་ནས་ལྔ་དང་ལྔ་བཅུའི་རྒྱལ་སྤྱིའི་བོད་རིགས་སྤྱི་མཐུན་ཚོགས་པ་ཁག་གི་ཚོགས་ཆེན་དེ་བཞིན་དུས་ཡུན་ངེས་མེད་རིང་ཕར་འགྱངས་གནང་ཡོད། གཞན་ཡང་ཕྱི་ལོ་ ༢༠༢༠ ཟླ་ ༨ ཚེས་ ༡༡ ནས་ ༡༤ བར་རྡ་སར་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གསུམ་པ་འཚོགས་རྒྱུའི་གསལ་བསྒྲགས་ཤིག་སྤེལ་ཡོད་པ་དེ་ཉིད་ད་ལྟའི་ཆར་འགྱུར་བ་གང་ཡང་ཕྱིན་མེད། ཚོགས་འདུའི་ཐོག་ཞུགས་བློ་ཡོད་རིགས་ནས་སྙན་ཞུ་ངེས་པར་དུ་འབུལ་རོགས། མ་འོངས་པར་དུས་ཡུན་ཕར་འགྱངས་དགོས་པའི་གནས་སྟངས་ཆགས་པ་ཡིན་ན། སྐབས་དེར་གསལ་བསྒྲགས་བྱ་རྒྱུ་ཡིན། ད་ལྟའི་ཆར་འགྱུར་བ་གང་ཡང་མེད། མཐའ་དོན། ཏོག་དབྱིབས་ནད་དུག་འདི་བཞིན་ད་ཆ་འཛམ་གླིང་ཡུལ་གྲུ་གང་སར་ཁྱབ་གདལ་ཤུགས་ཆེ་འགྲོ་བཞིན་ཡོད་སྟབས། བོད་མི་ཡོངས་ནས་སྔོན་འགོག་གི་ཐབས་ལམ་ཐོག་ཡིད་གཟབ་གནང་དགོས་རྒྱུ་ཧ་ཅང་གལ་ཆེན་པོ་རེད་ཅེས་ཞུ་རྒྱུ་ཡིན་ཞེས་གསུངས་འདུག

རྒྱ་གར་ནང་ཏོག་དབྱིབས་ནད་དུག་ཁྱབ་གདལ་སོང་བ་ལ་བརྟེན་ནས། སྔོན་འགོག་གི་ཆེད་དུ། བོད་ཁྱིམ་སློབ་གྲྭ་ཁག་གི་འཛིན་རིམ་བརྒྱད་པ་མན་ཆད་ཀྱི་སློབ་མ་རྣམས། དུས་ཚོད་ངེས་མེད་རིང་གུང་གསེང་བཏང་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།