གཞུང་འབྲེལ་མཆོད་འབུལ་སྨོན་ལམ་འཚོགས་པ།

ཉི་ཧོང་གི་སྲིད་བློན་ཟུར་པ་ཤིན་ཛོ་ཨ་བྷེ་ (Shinzo Abe)ཕྱི་ལོ་ ༢༠༢༢ ཟླ་ ༧ ཚེས་ ༨ ཉིན་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་བཀའ་ཤག་ནས་ཐུགས་ཕམ་དང་འབྲེལ། དམ་པ་ཁོང་བཞུགས་ཡུན་རིང་བོད་དོན་ཐོག་རྒྱབ་སྐྱོར་གཡོ་མེད་གནང་བར་རྗེས་དྲན་ཞུ་སླད། ཕྱི་ལོ་ ༢༠༢༢ ཟླ་ ༧ ཚེས་ ༡༡ ཉིན་གྱི་ཕྱེད་ཡོལ་ཆུ་ཚོད་ ༣  ཐོག་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ་དང་། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་གཞུང་འབྲེལ་མཆོད་འབུལ་སྨོན་ལམ་ཞིག་འཚོགས་གནང་འདུག 

དེ་ཡང་གཞུང་འབྲེལ་མཆོད་འབུལ་སྨོན་ལམ་སྐབས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་གསུང་དོན། ཉི་ཧོང་གི་སྲིད་བློན་ཟུར་པ་དང་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་དང་ཐུགས་ཧ་ཅང་ཉེ་བའི་བོད་ཀྱི་བློས་ཐུབ་གྲོགས་པོ་སྐུ་ཞབས་ཤིན་ཛོ་ཨ་བྷེ་ (Shinzo Abe) མཆོག་ཕྱི་ལོ་ ༢༠༢༢ ཟླ་ ༧ ཚེས་ ༨ ཉིན་འོས་བསྡུའི་དྲིལ་བསྒྲགས་གསུང་བཤད་གནང་བཞིན་པའི་སྐབས་མི་ཞིག་གིས་གློ་བུར་དུ་མེ་མདའ་བརྒྱབ་པར་བརྟེན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་རྗེས་བོད་མི་ཡོངས་ཀྱི་ཚབ་ཞུས་ཏེ་དམ་པ་ཁོང་གི་ནང་མིར་ཐུགས་གསོ་ཞུས་ཡོད། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་ཕམ་ཆེན་པོས་གསུང་འཕྲིན་ཞིག་བསྩལ་བའི་ནང་། ངོས་ཀྱི་མཛའ་གྲོགས་ཨ་བེ་ལགས་ལ་དེ་རིང་མེ་མདའ་བརྒྱབ་རྗེས་སྐུ་གཤེགས་པ་གོ་དུས་ངོས་རང་བློ་ཕམ་ཆེན་པོ་བྱུང་། ངོས་ཀྱིས་སྐུ་ཉིད་དང་ནང་མི་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན།

སྐུ་ཉིད་ཀྱིས་མཁྱེན་གསལ་ལྟར་དམ་པ་ཁོང་ནི་བོད་ཀྱི་བློས་ཐུབ་གྲོགས་པོ་ཞིག་ཡིན་པ་རེད། ངོས་ཀྱིས་ཁོང་གི་མཛའ་འབྲེལ་དང་། བོད་ཀྱི་ནང་ཆོས་དང་། བོད་མིའི་ངོ་བོ་བདག་གཅེས་སླད་རྒྱབ་སྐྱོར་གནང་བར་བསྔགས་བརྗོད་ཞུ་གི་ཡོད། ཅེས་ཐུགས་སྨོན་གནང་འདུག 

དམ་པ་ཁོང་ནི་སྤྱི་ནོར༸གོང་ས་༸སྐྱབས་མགོན་ཆེན་པོ་མཆོག་ལ་གུས་བཀུར་ཧ་ཅང་ཞུ་མཁན་གྱི་ཐུགས་ཉེ་བའི་གྲོགས་པོ་ཞིག་དང་བོད་དོན་རྒྱབ་སྐྱོར་བ་ཞིག་ཡིན་པ་ཙམ་དུ་མ་ཟད། ཉི་ཧོང་མང་གཙོ་ཆབ་སྲིད་ཚོགས་པའི་ཚོགས་གཙོ་ཡིན་པའི་སྐབས། ཁོང་གིས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་སླད་ཐུགས་ཁུར་ཆེ་བཞེས་གནང་ཡོད། ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ནི་འཛམ་གླིང་ནང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་མང་ཤོས་ཡོད་པའི་རྒྱལ་ཁབ་ཅིག་ཡིན།

དམ་པ་ཁོང་གིས་ཉི་ཧོང་གི་སྲིད་བློན་གནང་བའི་སྐབས་དུས་རྟག་ཏུ་བོད་དོན་སྐོར་གླེང་སློང་ཤུགས་ཆེ་གནང་ཡོད་པ་མ་ཟད། རང་ནུས་གང་ཐུབ་ཀྱིས་བོད་ནང་བཟང་ཕྱོགས་ཀྱི་འགྱུར་བ་ཡོང་རྒྱུར་རྒྱབ་སྐྱོར་མུ་མཐུད་ཞུ་རྒྱུའི་འབད་བརྩོན་གནང་རྒྱུ་ཡིན་སྐོར་དང་། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་འགན་དེ་རྒྱ་ནག་དམར་ཤོག་གཞུང་ལ་འཁུར་དུ་འཇུག་དགོས་པའི་སྐོར་གསུངས་སྟབས། ཉི་ཧོང་བ་ཚོས་བོད་བརྒྱུད་ནང་བསྟན་དང་རིག་གཞུང་ལ་དོ་སྣང་དང་། དེ་བཞིན་བོད་དོན་ལ་རྒྱབ་སྐྱོར་གྱི་རྣམ་པ་ཉིན་རེ་བཞིན་ཤུགས་ཆེ་རུ་འགྲོ་བཞིན་ཡོད། དམ་པ་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཐེངས་ཁ་ཤས་ཞུས་གནང་ཡོད་པ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་ཡང་མཇལ་འཕྲད་གནང་ཡོད་པ་རེད། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དུ་ཕྱི་ལོ་ ༡༩༦༧ ལོར་ཐེངས་དང་པོ་ཆིབས་སྒྱུར་གནང་ཡོད་པ་དང་། དུས་དེ་ནས་བཟུང་ད་བར་མགོན་པོ་གང་ཉིད་མཆོག་ཉི་ཧོང་དུ་ཐེངས་ ༢༥ ལྷག་ཙམ་ཆིབས་སྒྱུར་བསྐྱངས་ཡོད། ༸གོང་ས་མཆོག་ཉི་ཧོང་དུ་ཆིབས་སྒྱུར་སྐབས་དམ་པ་ཁོང་གིས་གདན་ཞུས་མཚོན་རྒྱབ་སྐྱོར་གྱི་ལངས་ཕྱོགས་བརྟན་པོ་བཟུང་ཡོད། ཁོང་གིས་ཕྱི་ལོ་ ༢༠༡༨ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་གྲོས་ཚོགས་སུ་གདན་ཞུས་ཀྱིས་བཀའ་སློབ་གོ་སྒྲིག་ཞུས་ཡོད། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་དམ་པ་ཁོང་ལ་མྱ་ངན་གུས་འདུད་མཚོན་བྱེད་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་ལས་བྱེད་རྣམས་ཚང་འཛོམས་ཀྱིས་སྨོན་ལམ་གསུང་འདོན་ཞུ་རྒྱུ་དང་། དེ་རྗེས་གཞུང་འབྲེལ་མྱ་ངན་གུས་འདུད་མཚོན་ཕྱིར་བོད་མིའི་སྒྲིག་འཛུགས་ཀྱི་དབུས་ལས་ཁུངས་ཁག་ལས་མཚམས་གཞག་རྒྱུ་ཡིན། ཞེས་གསུངས་འདུག །

གསར་འགོད་པ་སྐལ་བཟང་དོན་གྲུབ།